Хөлбөмбөгийн ДАШТ-ий Хэсгийн шатны “A”, “B” хэсгийн II тойргийн тоглолтууд манайхаар баасан гаргийн шөнө боллоо. Өнөөдөр XI.26-ны бямба гаригийн орой “C”, “D” хэсгийн II тойргийн тоглолттой. Үүнд:
- Польш-Саудын Араб
- Аргентин-Мексик
- Тунис-Австрали
- Франц-Дани.
Өнгөрсөн шөнө болсон “A”, “B” хэсгийн II тойргийн тоглолтуудын дүнг танилцуулъя.
Зохион байгуулагч Катар хэсгээс шалгарахгүй нь тодорхой боллоо
__“A” хэсэг. Катар-Сенегал 1:3. гоол: Диа 41 мин (0:1), Дьедиу 48 мин (0:2), Мунтари (1:2), Дьенг 84 мин (1:3).
ДАШТ-ийг зохион байгуулагч Катарын баг Хэсгийн шатанд хоёр дахь ялагдлаа хүлээж дараагийн тойрогт хожсон ч шөвгийн 16-д шалгарах боломжгүй боллоо. Африк тивийн аварга Сенегалын баг тоглолтын 41, 48 дахь минутад дараалан гоолдож тэргүүллийг баттай авсан. Катарчууд хариу гоол хийхээр довтолж эхэлсэн нь үр дүнд хүрч 67 дахь минутад гоол оруулж тооны харьцааг 1:2 болгон ойртуулсан. Нэмж тэнцээний гоол оруулахаар хэтэрхий шунаж довтолсон тэдний эсрэг Сенегалчууд дундын болон арын шугамын сул орон зайд чөлөөтэй тоглож эцэст нь 84 дэх минутад гурав дахь гоол хийж ялалтаа баталгаажууллаа. Катарчууд ДАШТ-д одоогоор оноо аваагүй ч анхны гоолоо оруулсан нь зохион байгуулагч улсын хувьд нэр төрийн хэрэг байлаа. Катарын баг дараагийн тойрогт 4 оноотой Нидерландтай тоглоно. З оноотой Сенегал дараагийн тойрогт хэсгийг тэргүүлэгч 4 оноотой Эквадортой тоглоно, хожсон тохиолдолд шөвгийн 16-д шалгарах боломжтой
Тэнцсэн Нидерланд, Эквадор, хоёр багийн 16-д шалгарах эсэх нь III тойрогт болж хойшлогдлоо
__“A” хэсэг. Нидерланд-Эквадор 1:1. гоол: Гакпо 6 мин (1:0), Валенси 49 мин (1:1).
Энэ тоглолтод хожсон баг нь 6 оноотой болж шөвгийн 16-д шалгарах болзлоо биелүүлэх байлаа. Тоглолт тэнцээгээр өндөрлөж оноо хуваасан болохоор сүүлчийн гуравдугаар тойрогт шалгарах, эс шалгарах нь шийдэгдэнэ гэсэн үг.
Голландын баг эхлэлийг сайн тавьж тоглолтын 6 дахь минутад гоол оруулж 1:0-ээр хошуучилсэн. Эквадорын баг эхний үеийн 20-иод минутаас гэнэт сэрсэн мэт тэнцээний гоол хийхээр шуурхайлан довтоллоо. Нэгдүгээр үед гоол оруулах дөхсөн тоглогч нь өмнөх тоглолтод Катарын хаалганд хоёр гоол хийсэн мэргэн бууч Валенси байлаа. Тэрбээр нэгдүгээр үед чадаагүйгээ хоёрдугаар үед гүйцээж тоглолтын 49 дэх минутад тэнцээний гоол хийж тооны харьцааг 1:1 болгосон. Хоёр баг нэмж хоёр дахь гоол оруулж чадсангүй, тоглолтын үр дүн хэвээр хадгалагдав. Хамгийн харамсалтай нэгэн үйл явдал болж Эквадорын довтлогч Валенси тоглолтын 89 дэх минутад бэртэл авч эмнэлгийн дамнуурган дээр талбайг чөлөөллөө. Түүний гэмтэл хүнд байвал дараагийн маш чухал гуравдугаар тойргийн тоглолтод оролцохгүй болно. Энэ нь Эквадорын багт хүнд цохилт болно. Учир нь 4 оноотой Эквадорчууд шөвгийн 16-д шалгарах эсэхээ 3 оноотой Сенегалтай хийх тоглолтоор шийдвэрлэнэ.
Английн баг АНУ-тай оноо хуваасан нь ДАШТ-ий тав дахь гоолгүй тэнцээ байв
__“B” хэсэг. Англи-АНУ 0:0.
Өнгөрсөн онд нутагт нь болсон хөлбөмбөгийн Европ тивийн АШТ-ий мөнгөн медальт Английн баг АНУ-ыг хожиж оноогоо 6 болговол шөвгийн 16-д шалгарах эрхээ урьдчилан халааслах байлаа. Гэвч тэднээс АНУ-ын шигшээгийн хөлбөмбөгчид огт эмээсэнгүй тоглолтын эхнээс талбай дээр эн тэнцүү, зарим үед илүүрхэж тоглолоо. Нэгдүгээр үеийн 27 дахь минутад Италын алдарт “Ювентус” клубт тоглодог легионер Маккени, 33 дахь минутад Английн “Челси” клубт тоглодог легионер Пулишич нар Английн хаалганд гоол оруулах дөхсөн. Хэн хэнд нь спортын ёндоо дутаж айлын хаалганы тор хөдөлгөж чадаагүй. Хоёрдугаар үед багууд харилцан довтолсон боловч гоол орсонгүй тоглолт 0:0-ээр дууслаа. Англи-АНУ, хоёр баг оноо хуваасан нь “Катар 2022” ДАШТ-ий тав дахь гоолгүй тэнцээ байлаа. Хэсгийн сүүлчийн шийдвэрлэх III тойрогт, 4 оноотой Англичууд хэсэгтээ хомоол хамж яваа 1 оноотой Уэльсийг хожих, эсвэл тэнцэхэд л шөвгийн 16-д шалгарна.
Англитай тоглохдоо дуулаагүй Төрийн дууллаа энэ удаад дуулсан Иранчууд хожил байгуулав
__“B” хэсэг. Иран-Уэльс 2:0. гоол: Чешми 90+8 мин (1:0), Резаян 90+ 10 мин (1:0).
Ираны шигшээ баг Уэльсийг шүүгчийн мэдлийн сунгасан нэмэлт цагт оруулсан гоолуудаараа 2:0-ээр хожлоо. Энэ тоглолт “Катар 2022” ДАШТ-ийн түүх намтарт онцгойлон бичигдэх үйл явдлаар дүүрэн байв.
Ираны хөлбөмбөгчид цэнгэлдэхэд тэмцээний дүрмийн дагуу тоглолтын эхэнд Төрийн дууллыг нь эгшиглүүлэхэд дагаж дуулсан нь өмнөх Англитай хийсэн тоглолтын үеэс ялгаатай байв. Шигшээ багийн тоглогчид тухайн үед Төрийн дууллаа санаатайгаар огт дуулалгүй амаа жимийж, эх оронд нь өрнөсөн эмэгтэйчүүдийн эрхийг хамгаалах хөдөлгөөнийг дэмжиж байгаагаа илэрхийлсэн билээ. Эргэн сануулахад, Иранд өнгөрсөн есдүгээр сард Шашны ёс суртахууныг сахиулагч цагдаа нар Махса Амина гэдэг 22 настай курд бүсгүйг үс, толгойгоо тогтоосон стандартаас илүү хэмжээнд ил гаргасан байна гэж буруутган баривчилж, тэр эмэгтэй нь саатуулах газарт зодуулсны улмаас амь насаа алдсан хэрэг гарсан. Энэ хэрэг явдлын дараагаар тус улс даяар эмэгтэйчүүдийн эрх чөлөөний төлөөх хөдөлгөөн эхэлж улмаар бослого тэмцлийн хэмжээнд хүрч одоо ч үргэлжилж байна. Олон улсын хүний эрхийн байгууллагуудын мэдээллээс харахад Ираны эрх баригчид эсэргүүцлийн хөдөлгөөнд оролцсон 21 хүнд цаазлах ял оноож, нийт 17 мянган хүнийг баривчлан шоронд хорьжээ. Арабын улсуудын хэвлэлийнхэн одоогийн байдлаар нийт 400 хүн, эдгээрийн 60 нь бага насны хүүхэд, амь насаа алджээ гэж мэдээлж байна.
Тоглолтын 87 минутад Уэльсийн хаалгач Хеннеси Ираны тоглогч Таремийн довтолгоог зогсоохын тулд хаалгаа орхин торгуулийн талбайн гадна тосч очихдоо түүнийг өвдгөөрөө дэлсэж унаган бүдүүлэг алдаа гаргасан тул талбайн шүүгч Эскобар халааснаасаа торгуулийн “улаан хуудас” гаргаж үзүүлэн түүнийг талбайгаас хөөлөө. Энэ торгуулийн “улаан хуудас” нь “Катар 2022” ДАШТ-ий анхных байлаа. Хаалгач нь ийнхүү хөөгдөж Уэльсчүүд талбайд арвуулаа үлдэхээс арван минутын өмнө Ираны дасгалжуулагч Кейрош дөрвөн сэлгээ хийж шинэ тоглогчдыг талбайд гаргаж хүч сэлбэсэн байв. Сэлгээний энэ тактик ч Ираныг шүүгчийн нэмэлт цагт эцсийн мөчид Уэльсийн хаалганд дараалан хоёр гоол оруулахад чухал ач холбогдолтой болсон. Хамгийн эхний чухал гоолыг тоглолтын 77 дахь минутад сэлгээний сандлаас талбайд орж ирсэн хамгаалагч Чешми оруулж тооны харьцааг 1:0 болгосон. Тоглолт нь сэргэсэн Иранчуудаас хагас хамгаалагч Резаян, эсрэгээрээ гоол алдсандаа тоглолт нь унасан Уэльсийн багийн хаалганд дараагийн гоол оруулснаар Ираны хөлбөмбөгчид 2-0-ээр түүхэн ялалт гэж нэрлэгдэх хожил байгууллаа.
Энэ хэсгийн хоёрдугаар байраар шөвгийн 16-д шалгарах шийдвэрлэх “тулаан” хамгийн сүүлчийн III тойрогт энэ сарын 29-ноос 30-нд шилжих шөнө манайхаар 03.00 цагаас 3 оноотой Иран, 2 оноотой АНУ-ын багуудын хооронд болно.
