Хөлбөмбөгийн хаан хэмээх, 1958, 1962, 1970 оны дэлхийн аварга домогт Пеле 78 гоолоор Бразилын шигшээгийн бүх цагийн шилдэг мэргэн буучийн рекорд эзэмшдэг. Энэ жагсаалтын хоёрт “Катар 2022”-т тоглож буй шинэ зууны супер довтлогч Неймар 76 гоолтой бичигддэг.
Одоо 30-тай Неймар дөрвөн жилийн дараа 2026 онд АНУ, Канад, Мексие, гурван улс хамтран зохион байгуулах ДАШТ-д оролцох боломжгүй гэж өөрөө сайн мэдэж байгаа. Бразилын шигшээ багт тоглогчийн, тэр тусмаа довтлогчийн 34 нас бол хөгшиднө. Бразил хөлбөмбөгийн орон учраас дараагийн залуу довтлогчид түрж гарч ирэн ахмадууддаа шигшээгийн бүрэлдэхүүнд багтах орон зай өгдөггүй. Тиймээс “Катар 2022” нь Неймарын хувьд сүүлчийн ДАШТ. Тэрбээр түрүүлэх тааварт яваа Бразилын багтайгаа дэлхийн аварга болох хүсэл мөрөөдөлтэйгээр Катарт газардсан. Неймар хэсгийн шатны эхний Бразил-Серби 2:0 тоглолтод шигшээ багийнхаа өмсгөлтэй 123 дахь удаа талбайд гарсан. Гоол оруулаагүй ч өөрийгөө сайн талаас нь харуулсан. Харамсалтай нь энэ тоглолтын үеэр хуучин бэртэл нь сэдэрч 80 дахь минутад талбайг орхисон. Гэмтлээсээ болж хэсгийн шатны дараагийн хоёр тоглолтод талбайд гараагүй, харин эмнэлгийн орон дээр сэргээх эмчилгээ хийлгэж байв.
Неймар арван хоёр хоногийн хугацаанд бэртэл гэмтлээ бүрэн эдгээж хасагдах шатны Бразил-Өмнөд Солонгос 4:1 тоглолтод гараанд гарсан. Тоглолтын 13 дахь минутад торгуулийн цохилтоос гоол хийж, шигшээ багийнхаа төлөө хийсэн гоолын тоог 76 болгосон. Тэрбээр бэртлээ сэдрээсэн талаар “Миний бэлтгэл ханасан, Катарт сайн тоглоно гэдэгтээ өөртөө маш итгэлтэй байлаа. Гэтэл ийм байдалд орчихсон. Эхний шөнө амар унтаж чадаагүй, хүүхэд шиг маш их уйлсан. Гэхдээ гэмтлээ бүрэн эдгээгээд хасагдах шатны тоглолтуудад оролцож болох байх гэж өөрийгөө тайвшруулсан” гэж ярьжээ.
Маргааш баасан гаргийн орой 23.00 цагаас хасагдах 1/4 шатны Бразил-Хорват тоглолт болно. Неймар талбайд гараанд гарна. Хэрвээ Хорватын хаалганд хоёр гоол хийвэл домогт Пелегийн рекордыг давтана. Гурван гоол оруулбал 79 гэсэн тоогоор шинээр рекорд тогтоож Бразилын бүх цаг үеийн шилдэг мэргэн бууч болно.
Бразил-Хорватын ялагчтай дараагийн хасагдах шатны хагас шигшээд оноолт таарах багийг тодруулах Аргентин-Нидерланд тоглолт манайхаар бямба гаргийн 03.00 цагаас эхэлнэ.
