Хөлбөмбөгийн ДАШТ-ий шөвгийн наймын тоглолтууд урд шөнө болж өнгөрлөө. Уг тоглолтуудаас онцлох сонирхолтой үйл явдлуудыг та бүхэнд хүргэж байна.
Нэг. Бразилын шигшээ багийнхан гэртээ буцлаа
Урд шөнө болсон шөвгийн наймын эхний тоглолтод Бразилын шигшээ баг Хорватын шигшээ багтай учирч ялагдал хүлээснээр гэртээ буцлаа. Тоглолтын нэмэлт минутад Бразилын шигшээ багийн тоглогч Неймар гоол оруулсан ч 117 дахь минутад Хорватын шигшээ баг гоолдож, оноо тэнцсэн юм. Улмаар нэмэлт цагт торгуулийн цохилтоор Хорватын шигшээ баг дараагийн шатанд шалгарлаа.
Хоёр. Неймарын нулимс
Неймар "Катар-2022" ДАШТ-ий өмнөхөн "Би энэ ДАШТ-ий дараа дахиад ДАШТ-д оролцоно гэдгээ баттай хэлж чадахгүй. Үнэндээ би мэдэхгүй байна. Би сүүлийн ДАШТ-дээ орж байгаа мэт л тоглох болно" гэжээ. Хожигдлынхоо дараа тэрбээр нулимсаа барьж дийлээгүй юм.
Гурав. Торгон мөч
Хорватын шигшээ багийн тоглогч Иван Перишичийн хүү тоглолтын дараа Неймарыг тайвшруулахаар гүйн очсон байна. Хамгаалагч нар зогсоосон ч Неймар түүнийг хармагцаа дөхөж ирээд тэвэрчээ.
Дөрөв. Мессигийн баяр
Урд шөнийн хоёр дахь тоглолтод Аргентины шигшээ баг Нидерландын шигшээ багийн эсрэг тоглож, хожил байгууллаа. Тэд оноо тэнцэж, нэмэлт цагт торгуулийн цохилтоор хожлыг авсан юм. Тоглолтын эхнээс Аргентинчууд хоёр ч гоолыг оруулаад байв. Гэвч тоглолтын 83, 101 дэх минутад Нидерландын шигшээ баг гоол оруулж тэнцсэн юм.
Тав. Месси
Аргентины шигшээ багийн домогт тоглогч Леонел Месси тав дахь ДАШТ-дээ оролцон дөрвөн гоол, хоёр гоолын дамжуулалт өглөө. Тэрбээр мэргэн буучдын жагсаалтын эхний тавд өрсөлдөж байна.
Зургаа. Аргентин ба Хорват
Хэсгээ өнгөлж, хүчирхэг багуудыг бохируулж яваа Аргентин, Хорватын шигшээ багууд шөвгийн дөрөв рүү орж ирлээ. Тэд дараагийн шат буюу хагас шигшээд хоорондоо тоглох бөгөөд хожсон нь аваргын төлөө, хожигдсон гуравдугаар байрын төлөө өрсөлдөнө.
Долоо. Неймарын гоол
Өчигдрийн тоглолтод Бразилын шигшээ багийн тоглогч Неймар нэг гоол оруулсан. Ингэснээр тэр алдарт тоглогч Пелетэй ижилслээ. Хэрвээ тэр дахин хоёр гоол оруулсан бол Бразилын бүх цаг үеийн мэргэн бууч болох байв.
Найм. Үнсэлт
Олны анхаарлыг татаад байсан Хорватын мисс бүсгүй Бразилын шигшээ багийнханд үнсэлт илгээн, гэрт нь буцаажээ.
Л.Сайнаа
