Чөлөөт бөхийн эрэгтэй, эмэгтэйчүүдийн 2022 оны "Дэлхийн цом"-ын тэмцээн арванхоёрдугаар сарын 10-11-нд АНУ-ын Айова мужийн Коралвилль хотын "Xtream Arena"-д боллоо. Өнгөрсөн жилийн Белградын Дэлхийн аварга шалгаруулах тэмцээнд эрэгтэй, эмэгтэй төрөлд эхний таван байрт орсон багаас гадна дэлхийн шигшээ зургаан баг хоёр хэсэгт хуваагдан өрсөлдсөн юм. Монголын эмэгтэй бөхчүүд эхний өдөр хэсэгтээ Японыг 5:5-аар хожиж, Украинд 3:7-гоор ялагдсан. Хэсгээсээ хоёроор гарч тэмцээний сүүлийн өдөр зохион байгуулагч орон АНУ-ын багтай хүрэл медалийн төлөө өрсөлдөв. Тус барилдаанд манай баг Сэм авгын бөхчүүдийг нутгийн дэвжээн дээр нь 7:3-аар ялснаар хүрэл медалийн эзэн боллоо.
Монголын эмэгтэй бөхчүүд Дэлхийн цомд 2009 оноос хойш тасралтгүй оролцсон бөгөөд 2013 онд мөнгө, 2015, 2017, 2018, 2022 онд тус тус хүрэл медаль хүртээд байна. Сонирхолтой нь эмэгтэй бөхчүүд маань Дэлхийн цомд 4 удаа хүрэл медаль хүртэхдээ бүгдэд нь АНУ-ын багийг ялж байсан юм.
Манай зарим бөхчүүд визний асуудал, зардал мөнгөнөөс шалтгаалж бүтэн багаараа очиж чадаагүй. Хэрэв бүрэн бүрэлдэхүүнээрээ АНУ-д очсон бол эрэгтэй, эмэгтэй баг маань аль аль нь үүнээс ч илүү өндөр амжилт үзүүлэх боломжтой байв.
Л.Сайнаа
