Хууль зүйн сайд Х.Тэмүүжинтэй нууц амрагийн холбоотой гэх Г.Сарангэрэл нарын таван хүнд холбогдох шүүх хурал өнөөдөр Дүүргийн эрүүгийн хэргийн нэгдүгээр шүүхэд хаалттай эхэлсэн. Тэд хар тамхи хэрэглэсэн, хадгалсан, борлуулсан гэх хэргээр шүүгдэж байгаа бөгөөд шүүх бүрэлдэхүүн шүүх хурлыг хойшлуулж, Г.Сарангэрэл нарыг цагдан хорих шийдвэр гаргасан байна.

Үүнтэй зэрэгцэн энэ сарын 5-нд буюу уржигдар Г.Сарангэрэлд халдсан гэх мэдээлэл байна. Тодруулбал Г.Сарангэрэлийн өмгөөлөгч Г.Батбаяр "Г.Сарангэрэлийг уржигдар "Service" худалдааны төвийн урд явж байхад нь залуучууд зодож, биед нь халдсан. Г.Сарангэрэлийн тархи доргиж, нэг гар нь бэртсэн, биеийн байдал нь хүндэвтэр байгаа. Бусдад зодуулж, биеийн байдал нь тааруу байхад шүүх бүрэлдэхүүн "Шүүгчээс татгалзлаа" гэх шалтгаанаар түүнийг цагдан хорих гэж байгааг эсэргүүцэж байна" гэжээ.

Г.Сарангэрэлд халдсан гэх энэхүү хэрэг Баянгол дүүргийн цагдаагийн газарт шалгагдаж байгаа юм.