-
2016 оны 7 сарын 18
БНСУ-ын Ерөнхийлөгч хатагтай Пак Гын Хэгийн Монгол Улсад хийж байгаа айлчлал үргэлжилж байна.
-
2016 оны 7 сарын 18
Ардчилсан намын Үндэсний зөвлөлдөх хороо өнөөдөр хуралдана.
Хуралдаанаар намын шинэчлэлийн
-
2016 оны 7 сарын 17
Баримт бичгүүдэд гарын үсэг зурсны дараа Монгол Улсын Ерөнхийлөгч Ц.Элбэгдорж, БНСУ-ын Ерөнхийлөгч Пак Гын Хэ нар сэтгүүлчдэд зориулан хэвлэлийн бага хурал хийж айлчлалын талаар мэдээлэл өгөв.
Монгол Улсын Ерөнхийлөгч Ц.Элбэгдорж:
- БНСУ-ын Ерөнхийлөгч Эрхэмсэг хатагтай Пак Гын Хэ энэ өдрүүдэд Монгол Улсад албан ёсны айлчлал хийж байна. Эрхэмсэг Ерөнхийлөгч АСЕМ-ын 11 дэх удаагийн дээд түвшний уулзалтад амжилттай оролцсон. АСЕМ-ын уулзалтыг зохион байгуулахад БНСУ-ын Засгийн газрын зүгээс, мөн Эрхэмсэг Ерөнхийлөгчийн зүгээс анхаарал хандуулж хамтарч ажилласанд баярлаж байна.
Хоёр сарын өмнө би БНСУ-д айлчилсан. Тэр үед ярьсан олон асуудал өнөөдөр Эрхэмсэг Ерөнхийлөгчийн айлчлалын үеэр ажил хэрэг болж, санал нэгдэж, гарын үсэг зурж байгаад баяртай байна.
Манай хоёр орны харилцаа нэгдмэл үнэт зүйлд суурилж, иргэдийн харилцаанд тулгуурласан онцлогтой харилцаа юм. Манай хоёр орны харилцаанд Монгол- БНСУ-ын Засгийн газар хоорондын хамтарсан хороо маш их амжилттай үүрэг гүйцэтгэдгийг тэмдэглэе.
Эрхэмсэг Ерөнхийлөгчийн айлчлалын үеэр “Ухаалаг боловсрол” төслийг хэрэгжүүлэх ажиллагаа эхэлж байгаад баяртай байгаа. Төсвийн хүндрэлтэй үед ерөнхий боловсролын сургуулиудын мэдээллийн технологид суурилсан сургалтын чанарыг сайжруулахад энэ төсөл маш их чухал үүрэг гүйцэтгэх юм.
Мөн Эрхэмсэг Ерөнхийлөгчийн айлчлалын үеэр Мэдээлэл, технологийн хамтарсан коллеж байгуулах, цаашид инженер техникийн мэргэжилтнүүдийг тус улсад үе шаттайгаар бэлтгэх зэргээр хамтарч судалж ажиллая гэсэн зүйлийг ярилцлаа.
Монгол бол байгалийн их өвтэй орон. Улаанбаатар хотод байгалийн түүхийн музейн шинэ барилга барих асуудал энэ айлчлалын үеэр шийдэгдэж байгаа. Энэ их чухал зүйл юм. Нийтийн тээврийн үйлчилгээнд дэмжлэг үзүүлэх төслийн хоёр дахь шат мөн энэ айлчлалын үеэр гарын үсэг зурагдаж, эхэлж байгаад баяртай байна.
Сая мөн сэргээгдэх эрчим хүчний хотхоныг Монголд байгуулах, сэргээгдэх эрчим хүч гаргах, цахилгаан нөөцлөх, сургалт, судалгаа хийх гэсэн бүхэл бүтэн цогцолбор бий болгох талаар тохиролцлоо.
Монголд оношлогооны төв байгуулах ажил эхэлж байгаа. Үүн дээр БНСУ дэмжлэг үзүүлж ажиллаж байгаад маш их баяртай байна. Агаарын салбарт хамтарч ажиллах гэсэн чиглэлээр мөн бид хамтарч ярилцлаа. Ирээдүй үеийн солилцоонд анхаарсан хөтөлбөр хэрэгжүүлэхээр бас ярилаа.
Хоёр орон Солоносын хойгийг цөмийн зэвсгээс ангид байлгах, энэ бүс нутагт энх тайван, аюулгүй байдлыг сахин хамгаалах чиглэлд хамтарч ажиллах талаар ярилцлаа.
НҮБ болон бүс нутгийн байгууллагууд, олон улсын хүрээнд хамтарч бие биеэ дэмжих талаар тохиролцсон нь чухал байлаа.
Хатагтай Ерөнхийлөгчийн Монголд хийж байгаа айлчлал үнэхээр ганзага дүүрэн айлчлал байлаа. Энэ айлчлал хоёр орны хамтын ажиллагааг урагшлуулан бэхжүүлэхэд маш чухал хувь нэмэр оруулна гэдэгт итгэж байна. Ингээд таньд Монгол Улсад тавтай саатан морилохыг дахин хүсэн ерөөе.
БНСУ-ын Ерөнхийлөгч Пак Гын Хэ:
-Юуны түрүүнд манай төлөөлөгчдийг халуун дотноор хүлээн авсан Монгол Улсын Ерөнхийлөгч Эрхэмсэг ноён Ц.Элбэгдорж таньд болон Монголын ард түмэнд чин сэтгэлийн талархал илэрхийлье.
Энэ жил АСЕМ-ын дээд хэмжээний чуулга уулзалтын 20 жилийн ой тохиож буй бөгөөд энэ нь онц чухал ач холбогдолтой үйл явдал юм. Монгол Улс АСЕМ-ын 11 дэх удаагийн дээд хэмжээний чуулга уулзалтыг амжилттай зохион байгуулсанд баяр хүргэе.
Өнгөрсөн онд БНСУ, Монгол хоёр орны хооронд дипломат харилцаа тогтоосны 25 жилийн ой тохиосон бөгөөд бид дахин шинэ 25 жилийг угтах гараан дээр зогсож байна.
Өнгөрсөн 5 дугаар сард Эрхэм Ерөнхийлөгч та БНСУ-д айлчилснаас хойш ердөө 2-хон сарын дараа миний бие ийнхүү Монгол Улсад айлчилж байгаа нь хоёр орны харилцааны хөгжлийн талаарх бидний хүсэл эрмэлзлийг тодорхой харуулж байна хэмээн бодож байна.
Өнөөдрийн албан ёсны хэлэлцээ нь бидэнд олон салбарт хоёр орны харилцаа, хамтын ажиллагааг бэхжүүлэх арга замын талаар үр дүнтэй санал солилцох боломжийг олгосон.
Сүүлийн үед хоёр орон хоорондын өндөр дээд хэмжээний айлчлал урьдынхаас илүү идэвхжсэн бөгөөд миний бие энэхүү боломжуудыг үр дүнтэй ашиглан, хоёр орны улс, төр аюулгүй байдлын салбарын хамтын ажиллагааг улам илүү батжуулан бэхжүүлэхийг хүсч байна.
Манай хоёр орон Солонгосын хойг, Зүүн хойд Азийн бүс нутгийн энх тайван, тогтвортой байдлыг хангах тал дээр стратегийн хувьд ижил байр суурийг хадгалж байдаг.
Өнөөдрийн албан ёсны хэлэлцээний үеэр бид Хойд Солонгосын цөмийн зэвсгийг үл дэлгэрүүлэх талаар хатуу байр суурин дээр үндэслэн Солонгосын хойг болон бүс нутгийн тогтвортой байдлын төлөө хамтран хүчин чармайлт гаргахаар тохиролцсон билээ.
Миний бие эрхэмсэг ноён Ерөнхийлөгч Ц.Элбэгдоржид өнгөрсөн хугацаанд Хойд Солонгосын цөмийн зэвсгийг үл дэлгэрүүлэх, хоёр Солонгосын нэгдлийг дэмжиж буйгаа илэрхийлж ирсэн явдалд нь дахин гүнээ талархаж буйгаа илэрхийлсэн.
Цаашид ч миний бие бүс нутгийн тогтвортой байдалд хамгийн их аюул учруулж буй Хойд Солонгосын цөмийн хөтөлбөр гэх мэт өдөөн хатгасан үйлдлийн эсрэг арга хэмжээн дээр Монгол Улстай үргэлжлүүлэн нягт хамтран ажиллахыг хүсч байна.
Миний бие сүүлийн үеийн олон улсын эдийн засгийн хүнд нөхцөл байдлын дунд чөлөөт худалдааг хумих биш, эсрэгээрээ өргөтгөн хөгжүүлэхийн тулд бид бүхэн хамтран хичээх хэрэгтэй гэж бодож байна. Энэ талаас авч үзвэл энэ удаагийн Монгол Улсад хийж байгаа айлчлалын үеэр Монгол Улс, БНСУ-ын хооронд эдийн засгийн түншлэлийн хэлэлцээрийг байгуулах зорилго бүхий хамтарсан судалгааг эхлүүлэхээр болсонд туйлын баяртай байна.
Энэхүү хүчин чармайлт нь алс хэтдээ манай хоёр орны хооронд гадаад худалдаа, хөрөнгө оруулалтыг өргөжүүлэх үр дүнг авч ирнэ гэж найдаж байна.
Энэ удаагийн албан ёсны хэлэлцээгээр дамжуулан хоёр орны Төрийн тэргүүнүүд цахилгаан станц, шинэ болон сэргээгдэх эрчим хүчний төсөл, байгаль орчинд ээлтэй эрчим хүчний хотхон байгуулах загвар төсөл хэрэгжүүлэх зэргээр эрчим хүчний салбарын хамтын ажиллагааг илүү үр дүнтэй болгохын тулд хүчин чармайлт гаргахаар тохиролцсон.
Мөн бид эрдэс баялаг, эрчим хүч зэрэг уламжлалт салбараас гадна хамтын ажиллагааны салбар чиглэлийг солонгоруулах арга замын талаар санал солилцсон.
Үүний нэг тод жишээ нь, өргөн уудам газар нутаг бүхий Монгол Улсын онцлогоос харахад алсын зайн эмчилгээ, оношлогооны бүтэц нь Монголын ард түмний эрүүл мэндийн үйлчилгээг сайжруулахад дөхөм болно хэмээн үзэж буй бөгөөд энэ удаа байгуулагдсан холбогдох Санамж бичиг нь энэхүү салбарт хоёр орны хамтын ажиллагаа ахин дэвших сайн үндэс суурь нь болно хэмээн найдаж байна.
Хөгжлийн хамтын ажиллагааны талаас авч үзвэл Монгол Улс нь манай чухал түнш орон юм. Монголын талаас санал тавьсан нэлээд хэд хэдэн төслийг судалж байгаа бөгөөд Солонгосын хөгжлийн туршлага, Монголын хөгжлийн стратегид хувь нэмрээ оруулах чиглэлээр хөгжлийн хамтын ажиллагааг хөгжүүлэх тал дээр цаашид ч анхаарах болно.
Хоёр улсын иргэд хоорондын харилцаа өргөжиж буй нь хоёр улсын харилцааны нэн чухал баялаг юм. Хоёр улсын Төрийн тэргүүнүүд цаашид ч хоёр орны иргэд хоорондын харилцааг улам илүү өргөжүүлэх үүднээс хүчин чармайлт гаргахаар болсон бөгөөд ялангуяа харилцан зорчих асуудлыг тогтворжуулах, оршин суух баталгааг хангах зэрэг бүтцийн чанартай асуудал дээр холбогдох арга хэмжээг авч ажиллахаар болсон.
Агаарын тээврийн нислэгийн хүчин чадлыг нэмэгдүүлэх асуудлаар талууд нэгдмэл байр сууринд хүрэхийн тулд үргэлжүүлэн анхаарч ажиллахаар боллоо.
Миний бие иргэд хоорондын харилцаа, ялангуяа ирээдүй хойч үеийн харилцааг чухал хэмээн үзэж буй бөгөөд үүний зэрэгцээ хоёр орны иргэд хоорондын харилцан ойлголцлыг нэмэгдүүлэх үүднээс соёлын харилцаа, хамтын ажиллагааг тасралтгүй бэхжүүлэх нь чухал гэж бодож байна.
Энэ удаа соёлын харилцааны талаар Санамж бичиг байгуулснаар бүтцийн хувьд үндэс суурь нь тавигдсан учир цаашид соёлын харилцаа, соёлын аж үйлдвэрийн салбарын хамтын ажиллагаа бодит үр дүнд хүрнэ хэмээн найдаж байна.
Эрхэм зочид оо,
Өнөөдрийн албан ёсны хэлэлцээгээр дамжуулан манай хоёр тал зөвхөн хоёр улсын түвшинд төдийгүй Зүүн хойд Азийн бүс нутгийн энх тайван, хөгжил цэцэглэлтэд ч мөн адил хамтдаа хувь нэмэр оруулах түнш гэдгийг дахин нотлох завшаан тохиов.
Энэ удаагийн айлчлал Монгол Улсын агуулж буй асар том нөөц бололцоо, хоёр орны харилцааны гэрэлт ирээдүйг тольдон харах боломжийг олгосон ач холбогдолтой айлчлал болж байна.
Өнөөдрийн албан ёсны хэлэлцээ цаашид хоёр орны хамтын ажиллагааны шинэ 25 жилийн түүхэн хуудсыг нээх чухал эхлэл болж бичигдэнэ хэмээн итгэж байна.
Цаашид хоёр орон илүү нягт хамтран ажиллахын ерөөл дэвшүүлэхийн зэрэгцээ найрсаг дотноор хүлээн авсан Эрхэм Ерөнхийлөгч танд болон Монголын ард түмэнд дахин гүн талархал илэрхийлье” гэлээ.
Үүгээр хэвлэлийн бага хурал өндөрлөв.
-
2016 оны 7 сарын 17
БНСУ-ын Ерөнхийлөгч Пак Гын Хэ-гийн Монгол Улсад хийж байгаа албан ёсны айлчлалын үеэр баримт бичгүүдэд гарын үсэг зурах ёслол Төрийн ордны Ёслол, хүндэтгэлийн их танхимд боллоо.
Монгол Улсын Засгийн газар, БНСУ-ын “Экзим” банк хооронд Ухаалаг боловсрол төслийг хэрэгжүүлэх зээлийн хэлэлцээрт Монгол Улсын Сангийн сайд Б.Болор, БНСУ-ын “Экзим” банкны ерөнхийлөгч Ли Док Хүн нар гарын үсэг зурав.
Монгол Улсын Засгийн газар, БНСУ-ын “Экзим” банк хооронд Улс, хот хоорондын нийтийн тээврийн үйлчилгээнд дэмжлэг үзүүлэх 2 дахь шатны төслийг хэрэгжүүлэх зээлийн хэлэлцээрт Монгол Улсын Сангийн сайд Б.Болор, БНСУ-ын “Экзим” банкны ерөнхийлөгч Ли Док Хүн нар гарын үсэг зурав.
2016-2019 оны соёлын солилцооны тухай Монгол Улсын Засгийн газар, БНСУ-ын Засгийн газар хоорондын хөтөлбөрт Монгол Улсын БСШУ-ны сайд Л.Гантөмөр, БНСУ-ын Гадаад хэргийн сайд Юн Бён Сэ нар гарын үсэг зурав.
Соёлын өвийн салбарт хамтран ажиллах тухай Монгол Улсын БСШУЯ, БНСУ-ын Соёлын өвийн захиргаа хоорондын харилцан ойлголцлын Санамж бичигт Монгол Улсын БСШУ-ны сайд Л.Гантөмөр, БНСУ-ын Соёл, спорт, аялал жуулчлалын дэд сайд Чон Гван Жү нар гарын үсэг зурав.
Соёлын бүтээлч үйлдвэрлэлийн салбарт хамтран ажиллах тухай Монгол Улсын БСШУЯ болон БНСУ-ын Соёл, спорт, аялал жуулчлалын яам хоорондын харилцан ойлголцлын Санамж бичигт Монгол Улсын БСШУ-ны сайд Л.Гантөмөр, БНСУ-ын Соёл, спорт, аялал жуулчлалын дэд сайд Чон Гван Жү нар гарын үсэг зурав.
Цөлжилт, шар шороон шуургатай тэмцэх чиглэлээр хамтран ажиллах тухай Монгол Улсын БОНХАЖЯ, БНСУ-ын Байгаль орчны яамны харьяа Солонгосын Ойн агентлаг хоорондын ойлголцлын Санамж бичигт Монгол Улсын БОНХАЖ-ын сайд Н.Батцэрэг, БНСУ-ын Ойн агентлагийн дарга Шин Вон Соб нар гарын үсэг зурав.
Мэдээлэл, технологид сурилсан эрүүл мэндийн технологийн салбарт хамтран ажиллах тухай Монгол Улсын ЭМСЯ болон БНСУ-ын Эрүүл мэнд, нийгмийн халамжийн яам хоорондын тохиролцоонд Монгол Улсын Эрүүл мэнд, спортын сайд С.Ламбаа, БНСУ-ын Эрүүл мэнд, нийгмийн халамжийн дэд сайд Бан Мүн Гюү нар гарын үсэг зурав.
Нийгмийн хамгааллын салбарт хамтран ажиллах тухай Монгол Улсын ХАХНХЯ, БНСУ-ын Эрүүл мэндийн яам хоорондын харилцан ойлголцлын Санамж бичигт Монгол Улсын ХАХНХЯ-ны Төрийн нарийн бичгийн дарга Г.Нарангэрэл, БНСУ-ын Эрүүл мэнд, нийгмийн халамжийн дэд сайд Бан Мүн Гюү нар гарын үсэг зурав.
Эрчим хүчний салбарын хамтын ажиллагааг бэхжүүлэх тухай Монгол Улсын Эрчим хүчний яам, БНСУ-ын Худалдаа, аж үйлдвэр, эрчим хүчний яам хоорондын харилцан ойлголцлын Санамж бичигт Монгол Улсын Эрчим хүчний яамны Төрийн нарийн бичгийн дарга Б.Намхайнямбуу, БНСУ-ын Худалдаа, аж үйлдвэр, эрчим хүчний сайд Жү Хён Хван нар гарын үсэг зурав.
Байгаль орчинд ээлтэй эрчим хүчний хотхон байгуулах туршилтын төсөл дээр хамтран ажиллах тухай Монгол Улсын Эрчим хүчний яам, БНСУ-ын Худалдаа, аж үйлдвэр, эрчим хүчний яам хоорондын харилцан ойлголцлын Санамж бичигт Монгол Улсын Эрчим хүчний яамны Төрийн нарийн бичгийн дарга Б.Намхайнямбуу, БНСУ-ын Худалдаа, аж үйлдвэр, эрчим хүчний сайд Жү Хён Хван нар гарын үсэг зурав.
-
2016 оны 7 сарын 17
Монгол Улсын Ерөнхийлөгч Ц.Элбэгдорж, БНСУ-ын Ерөнхийлөгч Пак Гын Хэ нар Төрийн ордны “Жанжин Сүхбаатар” танхимд албан ёсны хэлэлцээ хийлээ.
Хэлэлцээний эхэнд Монгол Улсын Ерөнхийлөгч Ц.Элбэгдорж “БНСУ-ын Ерөнхийлөгч Эрхэмсэг хатагтай Пак Гын Хэ таныг Монгол Улсад албан ёсны айлчлал хийж байгаад манай ард түмэн, төр, засгийн зүгээс гүн талархал илэрхийлж, таныг болон таныг дагалдан яваа төлөөлөгчдийг манай оронд тавтай саатан морилохыг хүсье.
Хоёр сарын өмнө би БНСУ-д айлчилсан. Тэр үед ярьсан олон зүйл өнөөдөр ажил хэрэг болох боломжтой болж байгаад туйлын баяртай байна. Монгол Улсад АСЕМ-ын дээд хэмжээний уулзалтыг амжилттай зохион байгууллаа. Ингэж зохион байгуулахад БНСУ-ын Засгийн газрын зүгээс, таны зүгээс дэмжлэг үзүүлж, хаамтарч ажилласанд талархал илэрхийлье. Таны айлчлалын дараа Монгол Улс, БНСУ-ын харилцаа улам шинэ шатанд гарна гэдэгт бид итгэж байна. Таны айлчлалд улам их амжилт хүсье. Баярлалаа” гэлээ.
БНСУ-ын Ерөнхийлөгч Пак Гын Хэ хариу хэлэхдээ “Баярлалаа. Юуны өмнө АСЕМ-ын дээд хэмжээний уулзалтыг амжилттай зохион байгуулсанд баяр хүргэе. Би 2009 онд анх удаа Монголд ирж байсан. Долоон жилийн дараа дахиад ирлээ. Долоон жилийн хугацаанд Монгол Улсын эдийн засаг болон ардчилал улам илүү хөгжсөнийг энд тэндгүй харлаа. Эрхэм Ерөнхийлөгч болон Монголын ард түмний хичээл зүтгэл Монголын хөгжлийг авчирсан гэж бодож байна.
Өнгөрсөн 5 дугаар сард Ерөнхийлөгч та БНСУ-д айлчилсан. Түүний дараа миний Монгол Улсад хийх айлчлал болж байна. Нэг жилийн дотор хоёр улсын Ерөнхийлөгч харилцан айлчилж байгаа юм.
Ганц жил дотор хоёр улсын Ерөнхийлөгч харилцан айлчилна гэдэг бол дипломат ажилд ховор тохиолдол бөгөөд хоёр талын харилцааг хөгжүүлэх гэсэн хоёр улсын эрмэлзлийн илэрхийлэл юм гэж бодож байна” гэв.
Албан ёсны хэлэлцээгээр харилцан байгуулах баримт бичгүүдээ тохиролцож, худалдаа, эдийн засаг, дэд бүтэц зэрэг салбарын асуудлаар харилцан ярилцлаа.
-
2016 оны 7 сарын 17
Монгол Улсын Ерөнхийлөгч Ц.Элбэгдорж, Монгол Улсад албан ёсны айлчлал хийж байгаа БНСУ-ын Ерөнхийлөгч Пак Гын Хэ нар ганцаарчилсан уулзалт хийлээ.
Уулзалтын үеэр Монгол Улсын Ерөнхийлөгч Ц.Элбэгдорж Эрхэмсэг хатагтай Ерөнхийлөгчтэй хоёрхон сарын дараа дахин уулзсандаа баяртай байгаагаа илэрхийлж, Улаанбаатар хотноо зохион байгуулагдсан АСЕМ-ын дээд хэмжээний уулзалтад оролцож, арга хэмжээний ач холбогдлыг нэмэгдүүлсэн явдалд талархал илэрхийллээ
БНСУ-ын Ерөнхийлөгч Пак Гын Хэ Монгол Улс олон улсын дээд түвшний уулзалтыг эх орондоо амжилттай зохион байгуулсанд талархал илэрхийлж, хоёр орны хооронд дээд, өндөр түвшний айлчлал, яриа хэлэлцээ ойр ойрхон хэрэгжиж байгаа нь БНСУ, Монгол Улсын харилцааг эрчимжүүлэх, хамтын ажиллагааг гүнзгийрүүлэн хөгжүүлэхэд чухал ач холбогдолтойг дурдаж байв.
Мөн хоёр орны харилцаа, хамтын ажиллагааг цаашид өргөжүүлэн хөгжүүлэх талаар санал солилцон ярилцлаа.
-
2016 оны 7 сарын 17
БНСУ-ын Ерөнхийлөгч Пак Гын Хэ-гийн албан ёсны айлчлал эхэллээ
-
2016 оны 7 сарын 17
АН-ын Гүйцэтгэх зөвлөл хуралдана
-
2016 оны 7 сарын 16
Өчигдөр чуулганыг нэгдсэн хуралдаанаар байнгын хороодын бүрэлдэхүүнийг баталсан. Харин өнөөдөр Ерөнхий сайдыг томилно. Тэгвэл Засгийн газрын сайд нар болон байнгын хороодын дарга нарыг наадмын дараа сонгон, батлахаар болжээ. Ингэснээр УИХ дахь томилгоо дуусч үйл ажиллагаа нь жигдрэх юм.
-
2016 оны 7 сарын 16
Өмнөд Хятадын тэнгисийг эзэмших тал дээр Хятад улстай хэд хэдэн улсууд маргаантай байгаа билээ. Тэдний тоонд Вьетнам, Филиппин, Бангладеш, Тайланд зэрэг улс орж байгаа билээ. Тэгвэл АСЕМ-ын уулзалтын үеэр энэхүү маргаантай асуудлаар БНХАУ-ын Ерөнхий сайд Ли Көцян Вьетнамын Ерөнхий сайд Нгуен Суан Фук-т хандан “Бид энэ асуудлыг яриа хэлэлцээрийн замаар шийдвэрлэх хэрэгтэй” гэж хэлжээ.
Тэд Улаанбаатарт Дээд түвшний уулзалтын өмнө буюу өнгөрсөн пүрэв гаригт уулзсан юм байна. Хятадын тал Өмнөд Хятадын тэнгисийн түүхийг аваад үзвэл манай улстай илүү холбоотой бөгөөд бид нээсэн гэж үзэж бүхлээр нь эзэмшихийг хүсч байгаа юм байна. Харин Гааг хотод төвтэй Олон улсын арбитрын шүүхээс тухайн орнууд хамтран эзэмших ёстой гэсэн шийдвэр гарсан. Гэвч энэ шийдвэрийг хүлээн зөвшөөрч, дагаж мөрдөхгүй гэдгээ Хятадын тал мэдэгдээд байсан билээ.
-
2016 оны 7 сарын 16
АСЕМ-ын дээд түвшний уулзалтын үеэр БНХАУ-ын Төрийн зөвлөлийн Ерөнхий сайд Ли Көцяны Монгол Улсын Засгийн газрын урилгаар энэ сарын 13-15-ний өдрүүдэд Монгол Улсад албан ёсны айлчлал хийсэн билээ.
Айлчлалын үеэр Монгол Улсын Ерөнхий сайд Ж.Эрдэнэбат БНХАУ-ын Төрийн зөвлөлийн Ерөнхий сайд Ли Көцянтай албан ёсны хэлэлцээ хийж, хоёр улсын харилцаа, хамтын ажиллагаа болон олон улс, бүс нутгийн харилцан сонирхсон олон асуудлаар санал солилцсон юм. Мөн хоёр талын хамтын ажиллагааны баримт бичигт гарын үсэг зурах ёслолын арга хэмжээ болсон. Ёслолын ажиллагаанд Монгол Улсын Ерөнхий сайд Ж.Эрдэнэбат, БНХАУ-ын Төрийн зөвлөлийн Ерөнхий сайд Ли Көцян нар оролцож албан ёсны 15 баримт бичигт гарын үсэг зурсан билээ.
Энэ үеэр Хятадын тал 38 тэрбумын төгрөгийн өрөөс чөлөөлж, гэр хорооллын дахин төлөвлөлт, орон сууцжуулах чиглэлээр 350 сая юанийн буцалтгүй тусламж үзүүлэхээ мэдэгдсэн юм.
Ийнхүү БНХАУ-ын Төрийн зөвлөлийн Ерөнхий сайдын албан ёсны айлчлал амжилттай өндөрлөж, улмаар өнөөдөр 11.00 цагт нутаг буцлаа.
-
2016 оны 7 сарын 16
Л.Пүрэвсүрэн: АСЕМ-ын нийт уулзалт, хурлуудад 5600 гаруй хүн гаднаас ирж оролцсон. Зөвхөн дээд түвшний уулзалтаар гэхэд 2600 гаруй зочин Улаанбаатарт саатлаа. Монгол Улсын зүгээс зохион байгуулалтад 9000 гаруй хүн оролцлоо. Дээр нь 1100 гаруй сайн дурынхан, аж ахуйн нэгж байгууллагууд, төрийн бус байгууллага гээд нийтдээ 20 мянга гаруй хүн АСЕМ-ыг сайн зохион байгуулахад гар бие оролцлоо. Та бүхэнд маш их баярлалаа.
-
2016 оны 7 сарын 16
АСЕМ-ын дээд түвшний 11 дүгээр уулзалтын үр дүнгийн талаар Монгол Улсын Ерөнхийлөгч Ц.Элбэгдорж мэдээлэл хийлээ. Хэвлэлийн бага хуралд Мьянмар улсын Ерөнхийлөгч У Тин Чяу, Словак улсын Ерөнхий сайд Роберт Фицо, Европын Зөвлөлийн Ерөнхийлөгч Доналд Туск, Европын Комиссын Ерөнхийлөгч Жан-Клод Юнкер нар оролцсон юм.
Мэдээллийн эхэнд Монгол Улсын Ерөнхийлөгч Ц.Элбэгдорж “Хоёр тивийн удирдагчид нэгдэж чадлаа. АСЕМ-ын уулзалтын үеэр Монгол Улс зохион байгуулагчийн хувьд соёл уламжлалаа танилцуулж наадам зохион байгууллаа. Дараагийн удаа АСЕМ-ын уулзалт бараг 100 жилийн дараа Монгол Улсад зохион байгуулагдаж магадгүй. Сэтгүүлч нар маань маш сайн ажиллаа. Дэлхийн 1.5 тэрбум хүн та бүхний бэлтгэсэн мэдээллийг үзсэн байгаа. Та бүхэн Монгол оронтой танилцаж амжсан байх гэж найдаж байна. Та бүхнийг эргэж ирэх байх гэдэгт итгэлтэй байна” хэмээн онцолсон юм.
Европын Комиссын Ерөнхийлөгч Жан-Клод Юнкер “Хурлын үеэр олон уулзалтууд боллоо. Улс орон бүр өөр өөрийн гэсэн бэрхшээлтэй. Онцлог шинж чанартай. Гэхдээ төрийн тэргүүнүүд бүгд улс орныхоо төлөө явж байгаа. Энэ уулзалтыг зохион байгуулагч Монгол Улс үнэхээр сайн ажиллалаа. Мэргэжлийн түвшинд өндөр хэмжээнд зохион байгуулсанд талархал илэрхийлж байна. АСЕМ-ын дээд хэмжээний уулзалт бол уян хатан байдлаар хамтран ажиллах талбар байдагт баярлаж байна. Дараагийн уулзалт хоёр жилийн дараа Брюсельд болно” гэлээ.
Словак улсын Ерөнхий сайд Роберт Фицо “Бид хоорондоо нягт хамтарч ажиллах шаардлага үүссээр байна. Бид өөр өөрсдийн байр суурьтай боловч улс орнуудын харилцан ашигтай байдал дээр хамтрах шаардлага үүсэж байна. Монгол Улсын ард түмэнд гүн талархал илэрхийлж байна. Миний хувьд энэ уулзалтад улс орноо төлөөлөн оролцож байгаа нь нэр төрийн хэрэг юм. Бид байгалийн гамшиг, уур амьсгалын өөрчлөлт гээд олон чухал сэдвүүдийн талаар ярилцлаа. Цаашид АСЕМ-ийг зохион байгуулах өндөр ач холбогдолтой нь харагдаж байна” гэж тодотгосон юм.
-
2016 оны 7 сарын 16
Монгол Улсын Ерөнхийлөгч Ц.Элбэгдорж Бүгд Найрамдах Латви Улсын Ерөнхийлөгч Раймондс Вейонистэй уулзлаа
-
2016 оны 7 сарын 16
Ардчилсан намын Гүйцэтгэх зөвлөлийн хуралдаанаас АН-ын даргын үүргийг УИХ-ын гишүүн Д.Эрдэнбатыг түр орлон гүйцэтгүүлэхээр томилжээ.
Мөн хуралдаанаас АН-ын даргын үүрэгт ажлаас З.Энхболдыг чөлөөлсөн байна.
УИХ дахь АН-ын бүлгийн даргаар УИХ-ын гишүүн С.Эрдэнийг, УИХ дахь АН-ын бүлгийн дэд даргаар Б.Пүрэвдорж, Ж.Батзандан нарыг томилох асуудлыг АН-ын Гүйцэтгэх зөвлөл сайшаав.
Мөн Үндэсний зөвлөлдөх хорооны хурлыг энэ сарын 18-нд хуралдуулахаар товложээ.
-
2016 оны 7 сарын 16
МОНГОЛ УЛСЫН ЕРӨНХИЙ САЙД Ж.ЭРДЭНЭБАТ БҮГД НАЙРАМДАХ ЛИТВА УЛСЫН ЕРӨНХИЙ САЙД АЛГИРДАС БУТКЕВИЧЮСТАЙ УУЛЗЛАА
-
2016 оны 7 сарын 16
АСЕМ-ын дээд түвшний 11 дүгээр уулзалтыг “АСЕМ-ын 20 жил: Уялдаа холбоотой байж ирээдүйн төлөө түншлэх нь” сэдвийн хүрээнд зохион явууллаа. Уг уулзалтаас хоёр чухал баримт бичгийг гаргасан бөгөөд нэг нь Улаанбаатарын тунхаглал юм.
Тунхаглалыг бүрэн эхээр нь хүргэж байна.
-
2016 оны 7 сарын 16
АСЕМ-ын дээд түвшний уулзалтад оролцохоор ирсэн төлөөлөгчид эхнээсээ буцаж эхэллээ. Одоогийн байдлаар ОХУ-ын Ерөнхий сайд Д.А. Медведев Японы Ерөнхий сайд Шинзо Абэ, Вьетнамын Ерөнхий сайд Нгуен Суан Фук, гэргий Чан Нгуен Тү нар эх орон руу гаа буцаад байна.
Тэднийг Гадаад хэргийн сайд Л.Пүрэвсүрэн тэргүүтэй албаныхан үдэж өглөө.
-
2016 оны 7 сарын 16
Монгол Улсын Ерөнхий сайд Ж.Эрдэнэбат захирамж гарган Увс аймгийн Засаг даргаар Дайвийнямын Батсайханыг томиллоо.
-
2016 оны 7 сарын 16
Ерөнхий сайд Ж.Эрдэнэбат Бүгд Найрамдах Польш Улсын Ерөнхий сайд Беата Шыдлотой уулзлаа
