“60” тэрбумын гэх тодотголтой хэрэг олон нийтэд ил болсноос хойш хэдийн дөрвөн жилийг ардаа үджээ. Он цагийн тооллыг ухрааваас, 2014 онд “үйлдэгдсэн” гэх энэ хэрэг шийдэгдэхгүй нь гэсэн гомдол иргэдийн дунд байсаар ирсэн. Тэгвэл уг хэргийг Тагнуулын ерөнхий газраас мөрдөн шалгаад шүүхэд шилжүүлэх саналтайгаар прокурорт шилжүүлжээ. Нэг үгээр хэлбэл, “60” тэрбумын бичлэгийн гол баатар болон А.Ганбаатар, Ц.Сандуй нарыг “төрийн эрхийг хууль бусаар авах” гэсэн зүйл ангиар буруутгасан бол иргэн Г.Доржзодовт хэрэг үүсгэхээс татгалзсан байна. Ийнхүү “60” тэрбум “ЖДҮ” гэсэн том хэргийн үнэн мөнийг тогтоохоор хуулийнхан ажиллаад эхэлжээ.
Хэргийг нэхэн сануулбал, 2014 соны наймдугаар сарын 1-ний өдөр “Шинэ Монгол хаад” группийн захирлуудын зөвлөлийн хурлаас гүйцэтгэх захирал А.Ганбаатарыг иргэн Г.Доржзодовтой контрактын гэрээ байгуулж, Стратеги хариуцсан захирлын албан тушаалд томилохыг үүрэг болгосноос эл хэргийн түүх эхэлсэн байдаг. Иргэн Г.Доржзодов дээрх албан тушаалыг аваад удаагүй байхад нь нийслэлийн МАН-ын 2014-2016 оны бүтэц, зохион байгуулалт, стратеги, үйл ажиллагааны төлөвлөгөө, ажил үүргийн хуваарь болон 2016 оны УИХ-ын сонгуулийн МАН-ын Төв штабын бүтэц, зохион байгуулалт, ажил үүргийн хуваарь, стратеги, үйл ажиллагааны төлөвлөгөө, сонгуулийн санхүүжилтийн схем, эдгээрийг нэгтгэн үзүүлэх презентшн зэргийг боловсруулах ажилд туслуулахаар болжээ. Ингээд схемийг Ц.Сандуй, А.Ганбаатар нар хамтдаа санаачилж, танилцуулав.
Схем бэлэн болж, танилцуулсны дараа А.Ганбаатар нь Г.Доржзодовын боловсруулсан бүх бичиг баримтыг сейфэндээ цоожилж, устгахыг нь устгажээ. Үүний дараа яагаад ч юм бэ, Г.Доржзодовтой байгуулсан аман гэрээнээсээ буцаж түүний ажилласан 40 гаруй хоногийн ажлын хөлсөнд 50 мянган төгрөг өгсөн байдаг. Асуудал эндээс эхэлсэн байна.
Г.Доржзодов өөрийн хийсэн аудио бичлэгээ хоёр жил хадгалсны эцэст 2016 оны УИХ-ын сонгуулиас хэдхэн хоногийн өмнө задалсан байдаг. Удалгүй хэрэг мандав. Энэ хугацаанд Ц.Сандуй хэргээ хүлээж, хариуцлага хүлээхээ мэдэгдсэн бол А.Ганбаатар “Ийм зүйл болоогүй, миний дуу хоолойг дуурайсан байна” гэж гүрийсээр ирсэн юм. Гэвч Шүүх шинжилгээний үндэсний хүрээлэнгийн шинжилгээгээр дуу хоолой нь мөн болох нь нотлогдсон. Энэ ч утгаараа хэргийг прокурорт шилжсэн боловч “Ийм яриа болсон нь үнэн байна. Гэхдээ хэрэгжүүлээгүй байна” гэдэг шалтгаанаар хэрэг үүсгэхээс татгалзсан юм. Цаг хугацаа өнгөрсөөр хэрэг олны анхаарлаас гарав. Учир нь ЖДҮ хэмээх том хэрэг мандсан учир хүссэн хүсээгүй замхрах шатандаа орсон нь энэ. Гэвч хуулийнханд мартах гэсэн ойлголт барагтай байдаггүй. Үүнийх нь ч ашиг гарав.
Хэргийг Тагнуулийн ерөнхий газар харъяалалын дагуу шилжүүлж авсан байна. Улмаар нягталж шалгах явцад цөөнгүй учир битүүлэг зүйл болсон нь иргэн Г.Доржзодов болон бусад эх сурвалжийн баримтаар нотлогддог. Иргэн Г.Доржзодовын бичсэнээр “2017 оны дөрөвдүгээр сарын 5-ны өдөр А.Ганбаатар намайг отож, саатуулан “Чи бидний үгээр байхгүй бол чамайг С.Зоригийн амь насыг хөнөөсөн хэрэг шиг болгочихно шүү” гэж заналхийлжээ. Түүгээр зогсохгүй түүнийг хаана, юу хийж явсан, гэр бүл нь хаана байгаа зэргийг судалснаа хэлсэн байдаг.
Үүний дараа буюу 2017 оны дөрөвдүгээр сарын 14-нд ТЕГ-ын долоон ажилтан “Ариг” банкны “Кафе Бене”-гоос иргэн Г.Доржзодовыг баривчилжээ. Шалтгаан нь А.Ганбаатарын гомдлоор юмсанж.
Үүний дараа Г.Доржзодов Эрүүгийн цагдаагийн газарт “Иргэн А.Ганбаатар намайг мөрдөж мөшгисөн, отолт хийсэн, заналхийлсэн” гэх гомдол гаргасан байдаг. Хэрэг ийнхүү сунжирсаар эцэстээ А.Ганбаатар болон Ц.Сандуй нар гэм буруутайд тооцогдож байх шиг байна.
Юутай хэрэг прокурорт шилжлээ. Прокуророос хэргийн мөрдөн шалгах процесс хуулийн хүрээнд, нотлох баримт хавтаст хэрэгт бүрэн авагдсан гэж үзвэл шүүхэд шилжүүлнэ. Эс бөгөөс мөрдөн шалгах ажиллагаанд буцаана. Ийм л хоёр сонголт бий. Хэрвээ шүүхэд шилжүүлбэл, төрийн эрхийг хууль бусаар авах гэсэн хэрэгт анх удаагаа яллагдсан хэрэгтнээр дээрх эрхмүүд тодрох нь тодорхой юм.
Г.Нацаг-Эрдэнэ
