УИХ-ын дарга Г.Занданшатар Засгийн газрын Хэрэг газрын даргаар ажиллаж байхдаа Дундговь аймгийн Гурвансайхан сумын нутаг дэвгэр дэх Салхитын мөнгөний ордын тусгай зөвшөөрлийг цуцалж, төрд эргүүлэн авахаа мэдэгдсэн.
Үүний дараа Баян-Өлгий аймгийн Ногоон нуур сумын нутагт ОХУ-ын Алтайн хязгаартай хиллэдэг Асгатын мөнгөний ордыг мөн төрийн мэдэлд буюу "Эрдэнэс Монгол" компанид шилжүүлэхээ мэдэгдэж байв. Тэгвэл дээрх ордын үйл ажиллагааг нээхээр онцгой байдлын аврагчид өдөр, шөнөгүй ажиллаж байгаа юм. Энэ талаар УИХ-ын дарга Г.Занданшатараас энэ сарын 9-ний өдөр тодруулахад "Онцгойгийн алба хаагчид ажиллаж байгааг сайн мэдэхгүй байна. Мэдээллийг нягтлаад дэлгэрэнгүй мэдээлэл өгье" гэсэн юм. Тэгвэл УИХ-ын дарга Г.Занданшатар цагаан сараас өмнө дээрх уурхайг ашиглалтад оруулна, стратегийн төлөвлөгөө батална гэж мэдэгдэж байсны дагуу далд уурхайн нөхцөл байдлыг үнэлэх хамтарсан ажлын хэсэг далд уурхайн 1 болон 1А амнуудыг нээх, далд малталтын бэхэлгээг сэргээх, технологийн дээж бэлтгэх шатандаа орсон байна.
Тодруулбал, Баян-Өлгий аймгийн Ногооннуур сумын нутагт байрлах ОХУ-ын Алтайн хязгаартай хиллэн оршдог уг ордоос технологийн дээж авахаар “Асгаткент” ХХК-ийн 16 ажилтан зургаан техниктэй ажиллаж байгаа бол тус компанийн туслан гүйцэтгэгчээр Онцгой байдлын ерөнхий газрын харьяа Үндэсний аврах бригадын Уул уурхайн аврах албаныхан тус ордын 1А хэвтээ амыг бүрэн нээж, 1-р хэвтээ ам руу 40 метр орчим нэвтрэлтийг хийсэн байна. Өөрөөр хэлбэл, далд уурхайн хоёр амыг нээх ёстой байснаас ийнхүү эхний амыг нээж, нэвтрэлтийн ажил үргэлжилж байгаа аж. Уурхайн амнуудыг нээж технологийн дээж авах, малталтуудыг сэргээх ажлыг "Эрдэнэс Монгол" ХХК зохион байгуулж байгаа юм байна. Харин “Эрдэнэт үйлдвэр” ТӨҮГ-аас элемент тодорхойлогч багаж хэрэгслийн туслалцаа авч, УУХҮЯ, АМГТГ, Хил хамгаалах ерөнхий газар, ОБЕГ-ын харьяа Уул уурхайн аврах анги, Баян-Өлгий аймгийн аврах ангитай хамтран ажиллаж байгаа талаар зарим хэвлэл дурдсан.
Угтаа бол Асгатын мөнгөний ордыг төрд эргүүлэн авлаа гэх сүртэй мэдэгдлийг УИХ-ын дарга Г.Занданшатар ЗГХЭГ-ын даргаар ажиллаж байхдаа мэдэгдэж байсан. Энэ утгаараа эл орд нь түүний алба, албан тушаалтай хамт мөнхийн сэдэв байх нь ойлгомжтой. Гэсэн атал уурхайг нээхээр алба хаагчид дүн өвлөөр өдөр шөнөгүй ажиллаж байгааг ч мэдээгүй байгаа нь хачирхалтай юм. Нөгөөтэйгүүр, сүр бадруулж, төрийн мэдэлд авсан Асгатын ордоо урин дулаан цагт нээхгүй, гэнэт ухаан орсон мэт цас зуднаар хүрз жоотуундаа хүрдэг нь ямар учиртай юм бол.
Г.Нацаг-Эрдэнэ
