Монгол Улсын Ерөнхийлөгчийн долоо дахь удаагийн сонгуулийн санал хураалтаар “ялагч” тодроогүй. Тиймээс ирэх сарын 7-ны өдөр дахин санал хураалт явуулахаар болоод буй. Анхны санал хураалтаар Х.Баттулга 517478, М.Энхболд 411748, С.Ганбаатар 409899 санал авч, АН-аас нэр дэвшигч Х.Баттулга, МАН-аас нэр дэвшигч М.Энхболд нар дараагийн санал хураалтад оролцохоор болсон. Харин үүнийг МАХН-ынхан эсэргүүцэж, СЕХ сонгогчдын саналыг будилаантуулж, М.Энхболдын саналыг зориудаар нэмж, дахин санал хураалтад оролцуулах боломжтой болголоо. Тиймээс СЕХ татан буугдах ёстой хэмээн мэдэгдээд байгаа. Харин СЕХ-оос өчигдөр мэдээлэл хийж, сонгогчдын саналд ямар нэгэн будилан ороогүй гэдгийг албан ёсоор мэдэгдсэн юм. Тэгвэл тэдний байр суурийг “24 VS 24” буландаа онцолж байна.
|
Ц.Оюунбаатар: СЕХ Ерөнхийлөгчийн үе үеийн сонгуулийг будилаантуулдаг байдлаа зогсоох хэрэгтэй
Сонгуулийн дүн гарсан шөнө МАХН-аас шуурхай мэдээлэл хийж, СЕХ-г сонгогчдын саналыг будилаантуулж, МАН-д үйлчиллээ хэмээн мэдэгдэв. Энэ үеэр МАХН-ын сонгуулийн штабын дарга Ц.Оюунбаатар “СЕХ бидэнтэй уулзахгүй байна. Сонгуулийн хэсгийн хороон дээр гарсан талонууд цагаараа хэвлэгдсэн байх ёстой. Цагтаа хэвлэгдээгүй бол луйврын нотолгоо.
СЕХ Ерөнхийлөгчийн үе үеийн сонгуулийг будилаантуулдаг байдлаа зогсоох хэрэгтэй. Сонгуулийн дүн гаргах үйл ажиллагаа удааширч чирэгдэж байна. Энэ хугацаанд ноцтой нөхцөл байдал гарч болзошгүйг манай сонгуулийн штаб болон иргэд бухимдаж байна.
Энэ асуудлаар СЕХ-ны удирдлагуудтай уулзая гэсэн боловч уулзахгүй байна. Сүүлийн хэдхэн минутын дотор МАН 10 гаруй мянган саналыг авч байгаа нь сонгуулийг луйвардах байдал явж байна. Сонгуулийг шударга явуулах бүх үйл ажиллагаанд хяналт тавьж тооллогыг ил тод байлгах хэрэгтэй” гэлээ. |
Ч.Содномцэрэн: Сонгогчдын саналд ямар нэгэн засвар өөрчлөлт ороогүй
СЕХ-ноос өчигдөр мэдээлэл хийв. Энэ үеэр СЕХ-ны дарга Ч.Содномцэрэн “Сонгуулийн Ерөнхий Хороо Монгол Улсын ерөнхийлөгчийн 2017 оны ээлжит сонгуультай холбогдуулж зохих шийдвэр гарсныг мэдээлж байна. Хоёр дахь санал хураалттай холбоотой хүсэлт шаардлагыг нам, холбоодоос ирүүлсэн. Уг санал хураалт хуулийн хугацаатай. Сонгуулийн Ерөнхий Хорооны тогтоол гарсан. Саналын хуудасны хэвлэлт, хоёр дахь санал хураалтад бэлтгэх, санал авах техник хэрэгсэл хүргэх гэх мэт бүх боломжийг судалсны үндсэн дээр хоёр дахь санал хураалтыг долдугаар сарын 07-ны өдөр /Баасан гарагт/ явуулахаар боллоо.
Нам холбоод, иргэд хөндлөнгөөс оролцож, бидний ажлыг зааж зааварлах явдал дэндэж байна. СЕХ бие даасан хараат бус байгууллага. Бид хуулийн хүрээнд сонгуулиа зохион байгуулж байна. Анхан шатны сонгуулийн дүнг дэлгэцээр нийтэд ил тод мэдээлсэн. Санал авах байруудаас ирж буй дүнг иргэн, нам, нэр дэвшигчи ажиглагчид эхнээс нь дуустал харсан. Тийм учраас сонгуулийн дүнд эргэлзэх хэрэггүй. Саналын дүн шөнөдөө өөрчлөгдлөө, СЕХ будлиан хийлээ гэх мэдээ явсан. Үүнд ямар нэгэн засвар өөрчлөлт ороогүй гэдгийг хэлмээр байна” гэв. |
Сэтгэгдэл (12)