Хэдэн жилийн өмнө Монгол Улсын БХЯ зэвсгийн наймаанд оролцсон тухай шуугиан дотоодод төдийгүй олон улсад дэгдсэн билээ. Тодруулбал 1990-ээд оны сүүл үеэс манай улсад зэвсгийн наймаа цэцэглэж, төмрийн хог нэрээр Хятад руу ачуулдаг байсан явдал улам даамжирч, Израйль руу танк, хуягт гэх мэт зүйлүүдийг зарж борлуулсан байдаг гэх. Гэвч энэ явдал сүүлдээ замбараагаа алдаж, хувьдаа ашиг олох хэрэгсэл болсон нь өнөө дуулиан дэгдээгээд буй “Миг-21” онгоцны асуудал.
2011 онд “Миг-21” байлдааны нисэх онгоцны хуучин моторууд айлын хашаанд хэвтэж байгаад алга болсон, түүнчлэн цэргийн агуулахаас хулгайд алдагдсан гэх хачирхалтай хэргүүд ар араасаа гарсан нь асуудлыг анхаарлын төвд оруулж, Агаарын довтолгооноос хамгаалах цэргийн командлагчаар ажиллаж байсан бригадын генерал Т.Дашдэлэг нарын хүмүүсийг эл хэрэгт холбогдуулан шалгаж, шүүх 3.5- 7.1 жилийн ял оноосон билээ. Уг хэрэгт БНСУ-д цэргийн атташегаар ажиллаж байгаа генерал М.Борбаатар, Зэвсэгт хүчний Жанжин штабын дарга, дэслэгч генерал Л.Бямбажав нарын хүмүүс хүртэл холбогдоод авсан юм.
Тэгвэл одоогоос гурван жилийн өмнө шүүхээр шийдэгдсэн нь энэ хэрэг дахин олны анхаарлын орж эхлэв. Тагнуулын Ерөнхий газрын дарга асан Б.Хурц Монгол Улсаас БНСУ-д суух бүрэн эрхэт элчин сайдаар томилогдохоор Засгийн газар болон Ерөнхийлөгчөөс “виз”-ээ авчихаад байгаа билээ. Түүнд УИХ гэсэн ганцхан даваа үлдсэн. Харин УИХ-д орохын тулд байнгын хороогоор шалгагдах ёстой. Өчигдөр уг асуудлыг Аюулгүй байдал гадаад бодлогын байнгын хороо авч хэлэлцэв. Хуралдааны үеэр УИХ-ын гишүүн Л.Болд тус асуудлыг сөхөж тавьсан нь ийнхүү дуулиан тариад байна. Ингээд Б.Хурц VS Л.Болд нарын байр суурийг хүргэж байна.
|
Л.Болд: Амиа алдсан хүмүүсийн ар гэрээс хэн уучлал гуйх юм
Би Гадаад харилцаа, Батлан хамгаалах гээд хоёр яамны сайдын албыг хашиж байсан хүн. Өнгөрсөн 2-3 жил би бүх шатандаа шалгуулсан. Надтай хамт ажиллаж байсан хоёр ТНБД өнөөдөр амь насаа алдаад байна. Ямар учраас надтай хамт ажилласныхаа төлөө хоёр ч Төрийн нарийн бичгийн дарга амиа алдах болов. Тэр хүмүүс амь насаа алдах хүртэл нь юу нөлөөлөв, хэн шалгасан юм гэдгийг би асуумаар байна. Надад талийгаач болохынхоо өмнө ирээд “Ганц л мэдүүлэг өгчих. Л.Болдын эсрэг нэг өгүүлбэр хэлчихвэл асуудлыг чинь цайрууллаа гэдэг асуудал тавьдаг” гэсэн. Хэн ийм даалгавар өгсөн юм бэ. Үүний цаана хэн байгаа юм. Нэр дэвшигч Б.Хурцын ажиллаж байсан байгууллага л үүнийг шалгасан.
Ерөнхий сайд өөрөө өөрийгөө тагнасан гэсэн маш хүнд эрүүгийн хэрэгт холбогдоод явж байгаа. Энэ асуудлыг эцэслээд шийдчихсэн юм уу. Мөн Хууль зүйн дотоод хэргийн сайд Ц.Нямдорж болон нэр дэвшигч Б.Хурц нар бие биеийхээ өөдөөс маш ноцтой асуудлаар мэдэгдэл хийсэн. Хууль бус олон асуудлыг нийтээрээ хэлж ярьж байгаа ч яагаад өнөөдрийг хүртэл хууль хяналтын байгууллагууд шалгаж эцэслэхгүй байгаа юм бэ.
Б.Хурцын хувьд цэргийн хүн, генерал хүн. Би түрүүн хэлсэн надтай хамт ажиллаж байсан хоёр ч төрийн нарийн бичгийн дарга амиа алдсан гэж. Зохиомол хэрэг байсан учраас цагаадаад өнгөрсөн. Харин амиа алдсан хүмүүсийн ар гэрээс хэн уучлал гуйх юм. Гадаад харилцааны Төрийн нарийн бичгийн дарга байсан Цогтсайханыг маш хүнд өвчтэй байхад чирж аваачиж, байцаалт авсан байдаг. Тухайн үед Хүний эрхийн дэд хорооны хурал дээр “Яагаад тэр хүнийг хүнд өвчтэй байхад дөрвөн давхар өөд хөлийг нь мөргүүлэн барин аваачиж байцаах ёстой юм бэ” гэж асуухад “Дөрөв бишээ хоёр давхар” гэсэн. Батлан хамгаалах яамны Төрийн нарийн бичгийн даргаар ажиллаж байсан Борбаатар генералыг мөн л ажлаа хийж байхад нь дуудаж, өчнөөн жил сараар тамласаар байгаад бие нь муудаад тэсээгүй. Үүнийг асуух нь миний үүрэг. Төрд гавьяатай хүмүүс хэрэгтэн шиг байсаар тэнгэрт халилаа. Монголын төр яаж энэ хүмүүсээс уучлал гуйх вэ. |
Б.Хурц: Л.Болд гишүүнээ та бид хоёр ашиг сонирхолын зөрчилтэй
Л.Болд миний өмнө нь ажиллаж байсан ажилтай холбоотой зүйл ярилаа. Л.Болд Батлан хамгаалахын сайдаар ажиллаж байхдаа хоёр, гурван асуудалд орсон. АТГ-аар шалгуулж байсан. Нэгдүгээр асуудал бол Хойд Солонгост зэвсэг зарах гээд 300 мянган долларыг та авсан. Өнөөдөр хүртэл зургадугаар сарын 12-нд Хойд Солонгосын прокурор таниас 300 мянган ам доллар нэхэмжилсэн бичиг ирсэн. Танаас болж Хойд Солонгост хоёр хүн цаазлуулсан.
Танаас болж Батлан хамгаалах яамны генерал ял авсан. Энэ хүнээс болж Молекул \УИХ-ын Батж.Батбаяр\ гэж найзынх нь хүүхдүүд асуудалд орсон. Батлан хамгаалах яаман дээр техникийн нөхцөлгүй байсан орон сууц бариад тэр үед нь прокурорын зөвшөөрлөөр албан ёсны үзлэгт ороход 5-6 тамгатай кампанийн санал өгдөг.
Энэ хүнийг сайд байхад бланкан дээр санал өгөөд л тэр компани шалгараад байдаг. Та энэ Гадаад хэргийн яамны дотор барилыг бас тэд нараар бариулсан.
Та шударга хүн мөн үү. Та бид хоёр ашиг сонирхлын зөрчилтэй хүмүүс. Би одоо цааш нь юм ярих уу хэрэггүй юу. Борбаатар генералыг битгий хутга. Тэр хүн зүрхний шигдээсээр нас барсан.
Манай Мөрдөн шалгах хэлтэс дөрвөн давхарт байдаггүй. Та тэгж битгий хүн гүтгэ. Мөрдөн шалгах хэлтэс дөрвөн давхарт байдаг. Тэр үед юу болсныг мэдэхгүй. Та нар тодорхой бус юм яриад хуулийн байгууллага руу дайрдаг. Би хуучин ажиллаж байсан залуучуудаа өмөөрнө шүү.
Таниас болж Хойд Солонгост хүн цаазлуулсан шүү. 300 мянган ам долларыг нь та төлөх ёстой шүү. Зургадугаар сарын 12-нд ирсэн прокурорын бичиг нь ил байгаа. Үүнийг АТГ мэдэж байгаа. Хууль зүй дотоод хэргийн сайд Ц.Нямдорж ч мэдэж байгаа. |
Сэтгэгдэл (36)