Цээж бодолтын олон улсын тэмцээн Узбекистан Улсын нийслэл Ташкент хотноо болж байна. Тус тэмцээнд долоон улсын 360 тамирчин таван насны ангилалд өрсөлдөж байна. Тэмцээний хамгийн бага насны ангилалд эх орноо төлөөлөн оролцсон зургаан настай Л.Сийлэн тэргүүн байр, харин С.Гэгээн-Оюун удаахь байрт жагсчээ.

Тэмцээний аварга болсон Л.Сийлэн, С.Гэгээн-Оюун нар нь Монголын оюун ухааны академийн тамирчин, академийн харьяа Язгуур бага сургуулийн нэгдүгээр ангийн сурагчид юм байна. Бага насны ангилалд өрсөлдсөн тус тэмцээнд манай тамирчид бусад тамирчнаас оноогоороо тэргүүлэн 0.1 секундын давтамжтай гарч ирж буй тоонуудыг чадамгай бодсон байна.

Тэмцээний талаар Монголын оюун ухааны академийн захирал Х.Хатанбаатар “Хоёр шавь маань оноо тэнцсээр, хамгийн сүүлийн шатанд хоёулханаа үлдэн 0.1 секундын давтамжтай анивчиж байгаа бодлогыг бодож, хүмүүсийг алмайрууллаа. Л.Сийлэн аварга болсон бол С.Гэгээн-Оюун хоёрдугаар байрт орлоо” гэжээ. Тэмцээний 9-10 насны ангилалын тэмцээн өнөөдөр болох бөгөөд Д.Хүслэн, 11-12 насны ангилалд Г.Лхагва-Очир нар тус тус өрсөлдөх юм байна.

Г.Нацаг