Ардын жүжигчин, уртын дууч Ш.Чимэдцэеэгийн нэрэмжит уртын дууны наадмыг энэ сарын 20-23-нд Сүхбаатар аймгийн Дарьганга суманд зохион байгуулахаар болжээ. Наадамд оролцох мэргэжлийн дуучид хоёр хоёр шаттайгаар зургаан дуу дуулах юм байна. Харин сайн дурын уран сайханчид буюу ардын авьяастнууд дөрвөн дуу дуулж өрсөлдөх аж. Ингэхдээ өөр өөрийн ангилалд удирдамжийн дагуу заасан дууг дуулах гэнэ. Мөн өөр дуу дуулвал журмын дагуу тэмцээнээс хасагдах гэнэ.

Энэ тухай ардын жүжигчин Ш.Чимэдцэеэ “Алтын-Овооныхоо энгэр, Ганга нуурын хөвөө бол  дарьганга уртын дууны үнэр, амт шингэсэн газар орон юм даа. Тэр л газар нутагт наадмаа зохион байгуулах нь сайхан байлгүй яах вэ. Алтан-Овооны энгэр, Ганга нуурын хөвөө бол нэг ёсондоо тал нутгийн минь байгалийн театр шүү дээ.

Би хэсэг хугацаанд Өвөрмонголд  багшилж байгаад ирсэн. Урд хөршид байх хугацаандаа “Дарьганга зүгийн эгшиглэн” нэртэй цомог хэвлүүлсэн. Цомогтоо дарьгангынхаа 10 уртын дуу, таван “Морины явдал”-ыг оруулж, дарьганга марзай, бүүвэй ер нь Дарьганга нутгаас эгшиглэх юу л байна, бүгдийг оруулсан. Ирээд шавь нартаа  өгсөн, гадуур ч нэлээд тарсан. Манай дуучид энэ цомгийг авч дуугаа сураад уралдаанд оролцох боломжтой. Хугацаа  байна шүү дээ. Цомгоос БСШУСЯ  300, Сүхбаатар аймаг 500 ширхэгийг авсан. Цаашаа тараагдах байх. Худалдаанд бол “HI FI” хөгжмийн дэлгүүрт тавигдсан  байгаа. Наадам зохион байгуулах удирдамжийг аль эрт  гаргаад   яамандаа  өгчихсөн. Удирдамж бол нэлээн эрт, 2018 оны наймдугаар сарын 2-нд  яам руу очсон. Тэндээс 2019 оны наймдугаар сарын 20-23-ны хооронд зохион байгуулахаар  тов гаргаж баталсан. Яамны зүгээс удирдамжийг бүх аймгийн Соёлын төвд тараах байх. Би хувиараа  босоо монгол бичигт хөрвүүлээд Өвөрмонгол шавь нартаа өгчихсөн. Олон газраас дуучид ирнэ гэж харж байна” хэмээн ярьжээ.

Наадмын дараа нэгдсэн концерт зохион байгуулах юм байна. Сонирхуулахад Ш.Чимэдцэеэгийн  нэрэмжит “Тэнгэрийн нулимс шиг аялгуу” гурван октав дууны дэлхийн уралдаан ирэх оны наймдугаар сард зохион байгуулах тов гарчээ.

С.Сүлд