УИХ-ын хаврын ээлжит чуулган хуралдаж байна. Чуулганаар “Алсын хараа 2050” бодлогын баримт бичгийн талаар хэлэлцэж байна.  

Б.Баттөмөр: Ардчилал зах зээлийн нийгэмд шилжсэн 30 жилийн хугацаанд хүний эрх  чөлөө, чөлөөт эдийн засаг, олон намын тогтолцоо зэрэг ардчиллын чухал үзүүлэлт тогтсон гэдэгтэй санал нэг байна. Нөгөө талаар засаглалын тогтворгүй байдал үүсч, баян, ядуугийн харьцаа, шударга бус байдал алдагдсантай санал нэг байна.  Аудитын тухай хуулийг хэлэлцээд эхэлсэн. Бодлогын энэ баримт бичгээ баримтлаад гүйцэтгэлээ хийвэл ажил хэрэг болно. Манай улс авлигын индексээр дэлхийн бусад улсаас доогуур үзүүлэлттэй байна. Нэг хүнд ногдох ДНБ 2030 оноос 2050 онд ухарсан байна. Энэ дээр тайлбар авмаар байна. 

Л.Оюун-Эрдэнэ: Эдийн засагтай холбоотой шалгуур үзүүлэлтийг би өмнө нь дурдсан. Бодлогын баримт бичиг анх удаа эрсдэлийн үнэлгээ хийж үзсэн. Шалтгаант холбоог гаргаж ирсэн. Ингэхдээ хамгийн дээд болон дунд, бага түвшинд ямар байх талаар суурь үзүүлэлтийг гаргасан юм. Бодлогын баримт бичигт хамгийн багийг нь тусгасан юм. Хэрэв бодлогын баримт бичгийг хэрэгжүүлж чадвал Монгол Улс азидаа тэргүүлэх байр суурьд хүрч болох зүйлийг боловсруулсан юм.

Ажлын хэсэг: Хөгжлийн загварын асуудал их чухал. Монгол Улс бусад орнуудтай харьцуулахад өөрийн гэсэн өнгө төрхтэй, ялгагдах онцлогтой. Нүүдлийн болон суурин соёл иргэншлийн огтлолцод байдаг. Тиймээс суурин соёл иргэншлийн хөгжлийн давуу талтай нүүдлийн ирнэшлийг хослуулж үндэсний бүтээмжийг хэрхэн дээшлүүлэх, иргэдийн амьдралын чанар, орчин нөхцөл, орон зай цаг хугацааг бий болгох нь загварын гол үндэс. Энэ нь мэдээж эдийн засагтай холбоотой. Бага зүйлээр их зүйлийг бий болгох нь чухал. Монгол Улсын цаашдын суурь хөгжил өөрөө өөрийгөө тэтгэдэг эдийн засаг байх нь чухал.

Б.Лхам