Хөдөлмөрийн баатар, Ардын багш, гавьяат дасгалжуулагч, жүдо бөхийн шигшээ багийн ахлах дасгалжуулагч асан, Улсын ерөнхий дасгалжуулагч Ч.Насантогтохтой ярилцлаа.

-“Токио-2020” олимпийн наадам нөгөөдөр эхэлнэ. Монголын баг тамирчид олимпод бэлэн үү?

-Манай тамирчдын бэлтгэл сайн байна аа. Өнөөдөр надтай хамт дасгалжуулагч, тамирчин, эмч, албаны хүн нийлсэн 73 хүн Япон явах гэж байна.

-Та жүдо бөхийн шигшээ багийг олон жил удирдаж явсан болохоор асууя. Энэ удаагийн олимпод зодоглох Монголын жүдогийн баг бүрэлдэхүүн таны сэтгэлд хэр нийцэж байна?

-Сонголт нь зөв болсон. Би “Рио-2016” олимпийн наадмын жүдо бөхийн баг бүрэлдэхүүнд шүүмжлэлтэй хандаж байсан. Өмнө баг бүрэлдэхүүний үзүүлсэн амжилтаас нь харж болно. Харин энэ удаагийн баг бүрэлдэхүүн бол давгүй юм.  

-Тэгвэл Улсын ерөнхий дасгалжуулагчийн тань хувьд асууя. “Токио-2020” олимпоос Монголын баг хэдэн медаль авахаар байна. Судалгаа шинжилгээнд үндэслэн таамаг гаргасан байлгүй?

-4-5 медаль авч магадгүй. Гэхдээ алтан медаль хэцүү. Алтан медаль авбал сайн байна. Олимпийн эрх олгох тэмцээний үеэр манай олон тамирчин коронавирус туссан.  Жүдочид тэр чигтээ, чөлөөт бөх, хүндийн өргөлт, боксын хэд хэдэн тамирчин ковидын халдвар авсан. Эмнэлэгт хэвтэн эмчлүүлэх, тусгаарлалтад хугацаа алдах гэх мэт асуудал гарсан.   

-Медаль хүртэх өндөр магадлалтай нь хэн бэ?

-Чөлөөт бөхийн хөнгөн жингийн охидууд өнгөтэй байгаа бол боксоос Э.Цэндбаатарын бэлтгэл давгүй байна. Мөн жүдогоос 2-3 медаль горилж байна. Энэ олимпод охидууд сайн оролцох болов уу гэж харж байна.

-Чөлөөт бөхийн олимпийн баг бүрэлдэхүүнийг олон хүн шүүмжилж байна?

-Юу гэж байна.

-Олимпийн эрх авсан жин бүр дээр сонгон шалгаруулалт явуулах байсан гэж?

-Тэр тусгүй. Эрхээ авсан нь олимпод орох нь зөв юм. Олимпийн эрх авчирна гэдэг хувь хүний нэг сайн үзүүлэлт юм шүү.   

 Б.Жаргал