Хөлбөмбөгийн “КАТАР 2022” ДАШТ-ий хасагдах шатны шөвгийн 16-д ямар багууд шалгарахыг эцэслэн шийдвэрлэх C, D хэсгийн III тойргийн тоглолтууд манайхаар лхагва гаргаас пүрэвт шилжих шөнө боллоо.
C хэсэг. Месситэй Аргентин, Левандовскийтэй Польш шөвгийн 16-д шалгарч,
Мексик, Саудын Араб тэмцээнээ дуусгав
__Польш-Аргентин 0:2. гоол: Макаллистер 47 мин (0:1), Альварес 68 мин (0:2).
Эхний хоёр тойрогт нэг хожиж, нэг тэнцэж 4 оноо авсан, супер довтлогч Левандовскийтэй Польшийн баг хожихын төлөө гэхээсээ хаалгандаа гоол алдахгүй гэж, эсрэгээрээ нэг хожигдож, нэг хожиж ердөө 3-хан оноотой Мессигээр ахлуулсан Аргентины баг хожих гэж тоглолоо. Скалони дасгалжуулагчтай Өмнөд Америкийн баг нэгдүгээр үед Польшийн хаалга руу есөн удаа оновчтой цохилт хийсэн ч гоол оруулсангүй. Дээр нь хөлбөмбөгийн амьд домог Месси тоглолтын 39 минутад торгуулийн цохилт гүйцэтгэж алдлаа. Энэ тоглолтын баатрууд нь Аргентины багаас Английн Премьер лигт тоглодог легионерүүд, Польшоос хаалгач Щенсный байлаа. Өмнөд Америкийн хожлын гоолыг Английн “Брайтон” клубт тоглодог Макаллистер 47 дахь, “Манчестэр Сити” клубын довтлогч Альварес 68 дахь минутад оруулсан бол хаалгач Щенсный нь алдарт Мессигийн цохьсон торгуулийн цохилтыг нэгдүгээр үед 39 дэх минутад хааж Аргентинчуудын тэргүүлж эхлэх цаг хугацааг хойшлуулсан. Хэрвээ энэ гоол нэгдүгээр үед орж, хоёрдугаар үеийн хоёр гоол дээр нэмэгдэж тооны харьцаа 0:3 болсон бол шөвгийн 16-д Польшууд өөрсдөө бус зэрэг явагдаж байсан Саудын Араб-Мексик тоглолтод хожиж ижил 4 оноотой болсон Мексикийн баг оруулсан гоолын зөрүүний илүү сайн үзүүлэлтээр хэсэгтээ хоёрдугаар байрт орж шөвгийн 16-д шалгарах байсан. Польшийн Щенсный нь хөлбөмбөгийн түүхэнд нэг ДАШТ-д торгуулийн хоёр цохилт хаасан гурав дахь хаалгач боллоо. Урьд нь Ян Томашевский 1974 оны, Брэд Фридел 2002 оны ДАШТ-д хоёр цохилтыг тус тус хааж байжээ. Польшийн багийг 2:0-ээр хожиж нийт оноогоо 6 болгосон Аргентины баг хэсгээсээ нэгдүгээр байраар, хожигдсон ч эхний хоёр тойргоос авсан 4 оноо, гоолын бага зөрүүтэй үзүүлэлттэй Польшийн баг хэсгээсээ хоёрдугаар байраар шөвгийн 16-д шалгарлаа. Гурав, дөрөвдүгээр байрын Мексик, Саудын Арабын багууд тэмцээнээ өндөрлүүлж үзэгчийн эгнээнд шилжлээ. Шөвгийн 16-д Польшийн баг Францтай, Аргентины баг Авсралитай оноолт таарч тоглоно.
__Саудын Араб-Мексик 1:2. гоол: Мартин 47 мин (1:0), Чавес 52 мин (2:0), Аль-Давсари 90 мин (1:2).
Эхний тойрогт Аргентиныг хожиж сенсаац дэгдээсэн Саудын Араб, Өмнөд Америкийн Мексик, хоёр баг хоёулаа хожлын бүтэн 3 оноо авбал хэсгээсээ шөвгийн 16-д шалгарах магадлал, боломжтойгоор талбайд гарсан. Тоглолт 2:1-ээр Мексикийн ялалтаар өндөрлөлөө. Сүүлчийн энэ III тойргийн өмнө “C” хэсгийн дөрвөн баг дөрвүүлээ шөвгийн 16-д шалгарах боломжтой, гагцхүү хоорондын тоглолтын үр дүнгээс ямар хоёр нь цааш шалгарах вэ гэдэг нь шийдэгдэх байсан тул “үхлийн хэсэг” гэж нэрлэгдэж байв.
Багууд эхний үед гоол оруулаагүй. Хоёрдугаар үед Мексикчүүд тоглолтын 47 дахь, 52 дахь минутад дараалан гоол хийсэн. Дахиад нэг гоол нэмж хийж тоог 3:0 болгосон бол ижил 4 оноотой Польшуудаас гоолын илүү сайн үзүүлэлтээр өмнө нь гишгэж хэсэгтээ хоёрдугаар байр эзэлж шөвгийн 16-д шууд шалгарах боломж үүссэн. Гэсэн ч дахин гоол хийж боломжоо ашиглаж чадсангүй, эсрэгээрээ тоглолтын төгсгөлд сөрөг довтолгооноос хаалгандаа гоол алдлаа. Саудын Арабаас нэр төрийн нэг гоолыг багийн лидер тоглогч Аль-Давсари Мексикийн хаалганд хийж тооны харьцааг 1:2 болгож ойртуулсан. Хожсон Мексик, хожигдсон Саудын Арабын хоёулаа “Катар 2022”-ын шөвгийн 16-д шалгарч чадалгүй тэмцээнийг Хэсгийн шатанд өндөрлүүлж гэрийн зүг авто хөлгийн жолоог заллаа.
D хэсэг. Дэлхийн аварга Франц, ногоон тивийн Австрали шөвгийн 16-д шалгарч, Тунис, Дани тэмцээнээ өндөлүүлэв
__Тунис-Франц 1:0. гоол: Хазри 58 мин (1:0).
Дэлхийн аварга цолоо хамгаалахаар Катарт ирсэн Францын баг эхний хоёр тоглолтод дараалан хожиж, зургаан гоол хийж хаалгандаа хоёрхон гоол алдан сүүлчийн энэ тоглолтоос үл хамааралтайгаар Хэсэгтээ нэгдүгээр байр эзэлж шөвгийн 16-д тоглох болзлоо нэгэнт биелүүлээд байсан. Иймээс гарааны үндсэн багийн 11 тоглогчоосоо есийг амрааж оронд нь нөөц хоёрдугаар бүрэлдэхүүний хөлбөмбөгчдийг талбайд гаргалаа. Үндсэн багаас зөвхөн хоёр тоглогч, хамгаалагч Варан, хагас хамгаалагч Чуамени нарыг гараанд багтаасан байв. Бүрэлдэхүүн өөрчлөгдсөнөөс хамаарч Францын баг тун тааруу төвшинд тоглож, нэгдүгээр үед гэхэд Тунисын хаалгыг оносон ганц ч оновчтой цохилт хийсэнгүй. Тунисын баг талбай дээр Француудаас илүүрхэж тоглон хоёрдугаар үеийн 13 дахь минутад довтлогч Хазрийн оруулсан гоолоор 1:0-ээр тэргүүлж эхэлсэн. Хожигдож буй үр дүнтэй эвлэрээгүй Францын дасгалжуулагч Дешам хоёрдугаар үеийн дундуур сэлгээнээс үндсэн багийн шилдэг довтлогч Мбаппе, Гризман, Дембеле нарын таван тоглогчийг солилцоогоор талбайд гаргасан. Довтолгооны чанар давамгайлал Францын багт шилжсэн ч Тунисчууд тэдний довтолгоог нурааж багаараа хамгаалан хаалгандаа гоол алдалгүй хожлын 1:0 үр дүнгээ хадгалж тоглолтыг дуусгаж чадлаа. Тунисчууд хэсэгтээ гуравдугаар байр эзэлж шөвгийн 16-д шалгарч чадалгүй ДАШТ-ээ өндөрлүүлж гэртээ харих болсон ч Дэлхийн аваргыг хожиж дуулиантай ялалт байгуулж хөгжөөн дэмжигчдийнхээ баяр бахдалыг төрүүллээ. “Гурван өнгөтүүд” хэмээх Францын баг хэсэгтээ Австралитай адил 6 оноо авсан ч, гоолын зөрүүний чанараар өмнө нь орж нэгдүгээр байр эзэлж плей-оффод шалгарч шөвгийн 16-д “C” хэсгийн хоёрдугаар байрын Польштой тоглохоор боллоо. Хөлбөмбөгийн шинжээчид энэ шатнаас Францын багийг шалгарч шөвгийн 8-д Англитай оноолт таарч тоглоно гэсэн таавар дэвшүүлж эхэллээ. Тэд Английн баг Африк тивийн аварга Сенегалыг шөвгийн 16-д хожиж 8-д шалгарна гэж тооцож байна.
__Австрали-Дани 1:0. гоол: Леки 60 мин (1:0).
Хэсгийн шийдвэрлэх гуравдугаар тойргийн хоёр тоглолт нэг цагт эхэлж зэрэгцэн явагдах дүрэм үйлчилдэг. Тунисын баг Францын хаалганд тоглолтын 58 дахь минутад гоол хийж 1:0-ээр тэргүүллийг авч, оноогоо 4 болгож хэсгээсээ хоёрдугаар байраар шөвгийн 16-д шалгарах боломж гарч эхэлснээс дөнгөж хоёрхон минутын дараа тухайн үед 3 оноотой байсан Австралийн баг Данийн хаалганд гоол хийж тооны харьцааг 1:0, оноогоо 6 болгосон. Хэрвээ ийм дүнгээр тоглолт дуусбал Австралийн баг хэсэгтээ Тунисын өмнө Францын дараа хоёрдугаар байрт орж цааш плей-оффод шалгарах боломж гарсан. Ногоон тивийн хөлбөмбөгчид энэ боломжоо зуун хувь ашиглаж нэмж гоол хийгээгүй ч, хаалгаа хуурай манаж чадсанаар Данийг буулган авч хожлын бүтэн гурван оноо авлаа. Хасагдах шатанд шалгарна гэж нэрлэгдэж байсан Данийн баг таавар эвдэж нэг тэнцээ, хоёр хожигдол, нэг оноотойгоор хэсэгтээ хомоол хамж дөрөвдүгээр байрт орж тэмцээнээ өндөрлүүлж үзэгчдийн эгнээнд шилжлээ. Ногоон тивийн Австрали шөвгийн 16-д “С” хэсгийн нэгдүгээр байраар шалгарсан Аргентинтай тоглоно.
ЖИЧ: Өнөөдөр XII.1-ний пүрэв гаргийн орой E, F хэсгийн гуравдугаар тойргийн 4 тоглолт болно. "Шөвгийн 16-д одоогоор шалгарсан 8 баг дээр нэмэгдэж хоёр хэсгийн нийт 8 багаас ямар 4 баг нь плей-оффод шалгарах вэ гэдэг нь эцэслэн тодорно. Үүнд:
- Оройн 23.00 цагаас Хорват-Бельги, Канад-Марокко
- Шөнийн 03.00 цагаас Япон-Испани, Коста Рика-Герман тоглолттой.
Б.Ерэнтэй
