Хөлбөмбөгийн “Катар 2022” ДАШТ-ий аваргын төлөө финалд тоглох эхний багаар хагас шигшээд Хорватыг 3:0-ээр хожсон Аргентин тодорлоо. Финалд тоглох хоёр дахь нь ямар баг байх вэ гэдэг манайхаар XII.15-ны 03.00 цагаас эхлэх хагас шигшээгийн Франц-Марокко тоглолтоор шийдэгдэнэ.
_____Аргентин-Хорват 3:0. гоол: Месси торгуулийн цохилтоор 34 мин (1:0), Альварес 39 мин (2:0), Альварес 69 мин (3:0).
Тоглолтын эхлэхийн өмнө Катарын найрал хөгжимчид Оросын хөгжмийн зохиолч Б.Фомины “Dear long” романсыг тоглолоо. Үгийг нь Оросын яруу найрагч К.Педровский бичсэн энэ романс нь 1920-иод оны эхээр Франц дахь Орос цагаачдын дунд ихэд алдаршжээ. Хожмоо 1962 онд Америкийн Южин Раскин бага зэрэг ондоо аялгуутай, англи шинэ үгтэй “Those Were the Days” романс болгож өөрчилснөөр дэлхий даяар түгэж алдаршсан байна. Өнөөдрийн байдлаар уг романсыг Вьетнам, Япон, Хятад, Еврей, Англи, Испани, Герман, Португал, Турк, Нидерланд, Литва, Эстони, Финланд, Швед, Чех, Словак, Польш, Белорусь, Хорват, Румын, Унгар, хорин нэгэн хэлээр дуулдаг ажээ.
Тоглолт хоёр багийн бие биенээ тандсан, довтолгоо зохион байгуулахыг хорьсон аядуу тайван эхэллээ. Аргентины хөлбөмбөгчид гоол хийх боломж үүсгэсэн анхны довтолгоо нь эхний үе талдаа орж байхад хагас хамгаалагч Фернандесийн хаалга оносон цохилт байв. Үүнээс хойш Аргентинчууд хурдтай сөрөг довтолгоо удаа дараа хийж Хорватын хаалганд гоол хийхээр эрэлхийлсэн. Үр дүн ч удаан хүлээлгэсэнгүй. Английн “Манчестэр Сити” клубт тоглодог легионер Альверас айлын торгуулийн талбайд ганцаар гарч ирэхэд Хорватын хаалгач Ливакович алдаа гаргаж зогсоолоо. Шүүгч Орсато торгуулийн цохилт заасан. Багийн ахлагч Месси торгуулийн цохилтыг амжилттай гүйцэтгэж тоог 1:0 болгож багтаа тэргүүллийг авчирлаа. Энэ гоол нь Мессигийн 2006-2022 оны таван ДАШТ-ий 25 дахь тоглолтдоо Аргентины шигшээ багийнхаа төлөө хийсэн 11 гоол байв. Урьд өмнө нь ДАШТ-д тус улсын шигшээ багийн тоглогчдоос хамгийн олон 10 гоол оруулсан Батистутагийн дээд амжилтыг эвдэж шинээр тогтоолоо. Тэрбээр энэ тоглолтод талбайд гарснаар ДАШТ-ий бүх цаг үеийн түүхэнд хамгийн олон 25 тоглолтод оролцсон Германы домогт хөлбөмбөгчин Маттеусийн дээд амжилтыг давтсан. Месси одоо “Катар 2022”-ын финалд тоглоход л дээд амжилтыг 26 болгож бас шинэчлэн тогтоох юм.
Эхний гоол орсноос ердөө таван минутын дараа, энэ өдөр нь ёндоотой байгаа довтлогч Альверас талбайн дунд шугамаас бөмбөг тууж явсаар Хорватын хаалганы тор хөдөлгөж тоог 2:0 болгосон. Тэрбээр хоёрдугаар үе эхэлснээс хойш 14 дэх минутад хаалгачийн талбайд Мессигийн ур чадвараа гайхуулж дамжуулсан бөмбөгийг цохиж өөрийн хоёр дахь, багийн гурав гоолыг оруулж тоог 3:0 болголоо.
Хорватуудад энэ тоглолтод үндсэн цагт тэнцэх, хожих нь байтугай, гоол оруулах боломж ч гарсангүй. Гарсангүй гэхээсээ, гайхалтай формтой байгаа Месси, Альверас тэргүүтэй Аргентинчууд тэдэнд боломж гаргасангүй гэвэл үнэнд ойрхон байх.
Өмнөд Америкийн улс орнуудад хөлбөмбөг үндэсний спорт байдаг учраас багаасаа тоглож байгалийн өгөгдөл авьяас нь тодорсон залуучууд олноор цойлон гарч ирдэг. Эдгээр авьяаслаг залуучууд Европын том клубүүдэд шилжин ирж хөлбөмбөгийн тактикийн цагаан толгойг сурснаар дэлхийн хэмжээний шилдэг тоглогч болдог. Европын хөлбөмбөгийн топ клубүүдэд тоглодог легионеруудаас бүрдсэн шигшээ багтай Өмнөд Америкийн төлөөллүүд ДАШТ-д амжилт гаргадаг билээ. Финалд шалгарсан Аргентины шигшээ багийн гарааны үндсэн 11 тоглогч гэхэд Месси, хагас хамгаалагч Паредес, хамгаалагч Тальяфико нар Францын, хаалгач Мартинес, довтлогч Альверас, хагас хамгаалагч Макалистер, хамгаалагч Ромеро нар Английн, хамгаалагч Молино, хагас хамгаалагч Родриго нар Испанийн, хагас хамгаалагч Фернандес, хамгаалагч Отаменди нар Португалын лигт тус тус тоглож байна.
Аргентины баг хөлбөмбөгийн ДАШТ-ий түүхэнд финалд зургаа дахь удаа шалгарлаа. Өмнөх таван финалын тоглолтод 1978, 1986 онд өрсөлдөгчөө хожиж дэлхийн аварга болж байсан. Бусад гуравт нь 1930, 1990, 2014 онд хожигдож ДАШТ-ий мөнгөн медаль хүртсэн. Месси нь 2014 онд Германы багт хожигдоход багийн ахлагч байлаа. Одоо 35-тай Мессид хөлбөмбөгчин болсны хамгийн том хүсэл мөрөөдөл биелж дэлхийн аварга болох ганц боломж нь энэ удаагийн “Катар 2022”ДАШТ-ий финалын тоглолт.
Финалын тоглолт Арванхоёрдугаар сарын 18-ны 23.00 цагаас, Аргентин-Хорватын тоглолт болсон “Лусиал” цэнгэлдэхэд эхэлнэ. Аргентины баг хагас шигшээд Франц-Мароккогийн аль хожсонтой нь Аваргын төлөө тоглоно.
Харин хагас шигшээд хожигдсон Хорватын баг Арванхоёрдугаар сарын 17-ны 23.00 цагаас хүрэл медалийн төлөө Франц-Мароккогийн аль хожигдсонтой нь тоглоно. Өмнөх “Россия 2018” ДАШТ-ий мөнгөн медальт Хорватуудад өрсөлдөгчөө хожиж медалиа ихэрлүүлэх сайхан боломж байна.
