Хөлбөмбөгийн ДАШТ-ий хагас шигшээ тоглолтоос Аргентин, Францын шигшээ баг финалд шалгарлаа. Бид та бүхэнд урд шөнө болсон Марокко, Францын шигшээ багуудын тоглолтоос онцлох сонирхолтой баримт, үйл явдлуудаас тоймлон хүргэж байна.
Нэг. "Атласын арслан"-гууд номхорлоо
Африк тивийн төлөөлөл Мароккогийн шигшээ баг энэ ДАШТ-д Бельги, Испани, Португалийн хүчирхэг багуудыг хожиж, хаалгандаа нэг ч гоол алдалгүйгээр ДАШТ-ий хагас шигшээд шалгарсан юм. Тэгвэл тэд урд шөнийн тоглолтод өнгөрсөн ДАШТ-ий аварга болох Францын шигшээ багт 2:0-ээр хожигдож, хүрэл медалийн төлөө Хорватын шигшээтэй тоглохоор боллоо.
Хоёр. Түүх
Мароккогийн шигшээ баг түүхэндээ анх удаа шөвгийн найм болон хагас шигшээд шалгарлаа. Тэдний хагас шигшээд шалгарсан уг амжилт нь Африк тивийн улсуудаас анх удаагийн тохиолдол болон түүхэнд үлдлээ. Мөн тэд одоогоор ДАШТ-д хаалгандаа хоёрхон гоол алдаад буй нь өнгөрсөн шөнө Францын эсрэг хийсэн тоглолтод байв.
Гурав. Мессигийн эсрэг Мбаппе
Өнгөрсөн ДАШТ-ий аварга Францын шигшээ баг Аргентины шигшээ багийн эсрэг аваргаа хамгаалах тоглолт хийнэ. Леонел Мессигийн хувьд сүүлийн ДАШТ учир аварга аваасай хэмээн олон шүтэн бишрэгчид нь сонор тавин хүлээж буй.
Дөрөв. Хэн нь мэргэн бууч болох вэ?
Өчигдрийн тоглолтод Францын шигшээ багийн довтлогч Мбаппе гоол оруулаагүй тул энэ удаагийн ДАШТ-ий мэргэн буучдын жагсаалтад өөрчлөлт орсонгүй. Тус тоглолтод Рандал Коло Муани 44 дэх минутад, Тео Эрнандес тав дахь минутад тус тус гоол оруулсан билээ. Ингэснээр Мбаппе, Месси нар мэргэн буучдын жагсаалтыг тэргүүлж, аваргын төлөөх тоглолтод хэн нь мэргэн бууч болохоо үзнэ.
Тав. Хамтрагч
Францын шигшээ баг Марокког буулган авсны дараа Мбаппе ПСЖ клубийн хамтрагч Мароккогийн шигшээ багийн тоглогч Ачраф Хакимигийн пудболкыг өмсөн хожлын баяраа тэмдэглэв.
Зургаа.Гризманн
Францын шигшээ багийн тоглогч Антуан Гризманнаас илүү гоолын боломж үүсгэсэн тоглогч энэ ДАШТ-д байхгүй. Тэрбээр Мессиг давж, ганцаараа жагсаалтыг тэргүүлж эхэллээ.
Долоо. Арслангуудын архиралт
Мароккогийн шигшээ багийн улаан фанатууд урд шөнийн тоглолтод багаа үнэхээр хүчтэй дэмжиж чадлаа. Тэд архирдаг арслангийн зурагтай пудболк өмссөн нь гэрэл зурагт үлджээ.
Л.Сайнаа
