Францын Ерөнхийлөгч Эммануэл Макрон хагас шигшээгийн Франц-Марокко 2:0 тоглолтыг өнгөрсөн лхагва гарагт Катарт ирж “Эль Байт” цэнгэлдэхэд багаа дэмжиж үзсэн. Тэрбээр өнөөдөр нийслэл Парисаас тусгай онгоц хөлөглөн Катарын Лусаил хотод ирж Аваргын төлөөх финалын Аргентин-Франц тоглолтыг үзэх ажээ. Ерөнхийлөгч Эммануэл Макрон дөрвөн жилийн өмнөх “Россия 2018” ДАШТ-ий финалд Францын хөлбөмбөгчид Хорватыг хожиж дэлхийн аварга болоход цэнгэлдэхийн суудлаас үзсэн. 

Францын шигшээ баг ОХУ-д болсон ДАШТ-д түрүүлэхэд багагүй үүрэг гүйцэтгэсэн дундын шугамын Погба, Мане нарын шилдэг хөлбөмбөгчид бэртэл гэмтлийн улмаас “Катар 2022”-т оролцоогүй Катарт болж байгаа тоглолтуудыг гэртээ телевизээр үзэж байна.

​Энэ онд Дэлхийн шилдэг хөлбөмбөгчний “Балон де Ор” шагналын эзэн болсон довтлогч Бензема “Катар 2022” ДАШТ-ийг зорьсон Францын шигшээ багийн 26 хөлбөмбөгчинтэй бүрэлдэхүүнд багтсан ч Катарт ирсэн хойноо бэлтгэл дээр хуучин бэртэл нь сэдэрсний улмаас гэртээ буцаж эмчилгээ хийлгэж байгаа. Тэрбээр өмнөх 2014, 2018 оны ДАШТ-д шигшээд дуудагдаагүй тул тоглоогүй. Францын дасгалжуулагч Дидье Дешам нь Бенземагийн оронд зориуд шинээр тоглогч дуудаагүй багийн бүрэлдэхүүнд нэрийг нь хадгалж буй. Хэрвээ тэрбээр өөрөө зөвшөөрвөл ДАШТ-ий алт, мөнгө алин ч байсан түүнд медаль өгөхыг зорьжээ.  

​Францын төрийн тэргүүн Эммануэл Макрон дээр нэр дурдсан Погба, Мане, Бензема нарыг Катар руу нислэг хийх Ерөнхийлөгчийн онгоцоор өөртэй нь хамт зорчиж Лусаил хотын 88966 суудалтай төв цэнгэлдэхэд финалын Аргентин-Франц тоглолтыг үзэх санал тавьсан байна.

​Ташрамд хэлэхэд, Погба, Мане нар Ерөнхийлөгчийн урилгыг хүлээн авч Катарт очсон ч шигшээ багийн бүрэлдэхүүнд анхнаасаа багтаагүй тул ДАШТ-ий медалиар энгэрээ мялаах боломжгүй, зөвхөн Бенземад медалиар шагнуулах нь нээлттэй.

​