Арванхоёрдугаар сарын 18 нь хөлбөмбөгийн ДАШТ-ийг зохион байгуулагч Катар улсын Үндэсний баярын өдөр. Катарчууд баярынхаа энэ өдөр дэлхийн аварга тодрох ДАШТ-ий финалын тоглолтыг хийхээр урьдчилан товлосон байсан.
Катарын Лусиал хотын 88966 үзэгчийн суудалтай төв цэнгэлдэхэд болсон финалын тоглолтод Аргентины баг Францыг торгуулийн цохилтоор хожиж дэлхийн аварга боллоо. Тоглолтын үндсэн цагийн 90 минут 2:2 тэнцээгээр өндөрлөж, шүүгчийн сунгасан 30 минутад хоёр баг тус бүр нэг гоол нэмж оруулан тоог 3:3 болгосон. Дахиж гоол ороогүй учраас тэмцээний дүрмийн дагуу ялагчийг торгуулийн цохилтоор тодруулахад Аргентины баг Францыг 4:2-оор буулган авч дэлхийн аваргын алтан медаль хүртэж Цом өргөлөө. Дэлхий даяарх хөлбөмбөг сонирхогч үзэгчдийн уулга алдуулсан драмтай энэ тоглолтын 6+6 гоол хэрхэн орсныг танилцуулъя.
_20 мин 57 сек. Торгуулийн цохилт. Аргентины довтлогч Ди Мария айлын хаалгачийн талбай руу бөмбөг тууж орж ирэхэд хамгаалалтын шугамд байсан Францын довтлогч Дембеле түүнийг араас нь хөл тавьж унагалаа. Талбайн польш шүүгч Марциняк торгуулийн цохилт заалаа.
_22 мин 24 сек. Гоол. 1:0. Аргентины багийн ахлагч Месси торгуулийн цохилтыг амжилттай гүйцэтгэж гоол хийж тоог 1:0 болгон багтаа тэргүүллийг авчирлаа.
_35 мин 30 сек. Гоол. 2:0. Аргентины зүүн жигүүрийн довтлогч Ди Мария хагас хамгаалагч Макалистерийн дамжуулсан бөмбөгийг тууж айлын хаалгачийн талбайд орж ирэн солгой цохиж Францын хаалгач Уго Льорисийн хаалганд гоол хийж тоог 2:0 болгов.
_78 мин 23 сек. Торгуулийн цохилт. Аргентины төвийн хамгаалагч Отаменди өөрийн хаалгачийн талбайд Францын довтлогч Коло-Муанийг араас нь дэгээдэж унагав. Талбайн польш шүүгч Марциняк торгуулийн цохилт заалаа.
_ 79 мин 28 сек. Гоол. 2:1. Францын довтлогч Мбаппе торгуулийн цохилтыг баруун хөлөөрөө гүйцэтгэж бөмбөгийг хаалганы зүүн талын шороон буланд зоож гоолын зөрүүг ойртуулж тоог 2:1 болгов.
_80 мин 59 сек. Гоол. 2:2. Францын довтлогч Мбаппе довтлогч Тюрамын оновчтой дамжуулсан бөмбөгийг баруун хөлөөрөө шууд цохин Аргентины Мартинесийн хаалганд гоол оруулж тоог 2:2 болгон тэнцүүлэв.
_107 мин 58 сек. Гоол. 3:2. Аргентины Месси айлын хаалгачийн талбай дотор бужигнаан дундаас ойсон бөмбөгийг өөрийн болгож Францын хаалганд гоол хийж тоог 3:2 болгон багтаа тэргүүллийг авчрав.
_115 мин 38 сек. Торгуулийн цохилт. Францын довтлогч Мбаппегийн хаалга руу цохьсон бөмбөгийг Аргентины хамгаалагч гараараа хааж дүрмийн алдаа гаргав. Талбайн польш шүүгч Марциняк торгуулийн цохилт заалаа.
_115 мин 50 сек. Гоол. 3:3. Францын Мбаппе торгуулийн цохилтоос тэнцээний гоол хийж тоог 3:3 болгов. Тэрбээр “Катар 2022”-т хет-трик хийсэн анхны тоглогч болов.
Ялагчийг тодруулах торгуулийн цуврал 5 цохилт. Францын баг эхэлж гүйцэтгэв
_Гоол. 1:0. Францын багаас Мбаппе амжилттай гүйцэтгэж тоог 1:0 болгов.
_Гоол. 1:1. Аргентины багаас Месси амжилттай гүйцэтгэж тоог 1:1 болгов.
_Хаалгач хаав. 1:1. Францын багаас довтлогч Коман цохиход Аргентины хаалгач Мартинес хааж гоол хийлгэсэнгүй. Тоо өөрчлөгдсөнгүй 1:1 хэвээр үлдэв.
_Гоол. 1:2. Аргентины багаас довтлогч Дибала амжилттай гүйцэтгэж гоол хийж тоог 1:2 болгон багтаа тэргүүллийг авчрав.
_Хаалга оносонгүй. 1:2. Францын шилдэг хагас хамгаалагч Чуамени хаалганы зүүн хажуугаар гадуур цохиж торгуулийн цохилт алдав. Тоо өөрчлөгдсөнгүй 1:2 хэвээр үлдэв.
_Гоол. 1:3. Аргентины багаас хагас хамгаалагч Паредес баруун хөлөөр цохиж Францын хаалганы зүүн доод буланд гоол оруулав. Тоог 1:3 болгов.
_Гоол. 2:3. Францын багаас довтлогч Коло-Муани амжилттай гүйцэтгэж тоог 2:3 болгов.
_Гоол. 2:4. Аргентины багаас хамгаалагч Монтьел амжилттай гүйцэтгэж, Францын хаалганд гоол оруулж тоог 2:4 болгов. Гоолын зөрүү 2 болсон тул багууд сүүлчийн тав дахь торгуулийн цохилт хийх шаардлагагүй болов. Аргентины баг торгуулийн цохилтоор /4:2/ Францыг хожиж дэлхийн аварга болов.
Урьд нь 1978, 1986 оны ДАШТ-д Цом өргөсөн дэлхийн хошой аварга Аргентины баг “Катар 2022”-аас гурав дахь түрүүгээ авлаа. Өмнөх “Россия 2018” ДАШТ-ий түрүү, дэлхийн аварга цолоо хамгаалахаар Катарт ирсэн Францын баг “Катар 2022”-оос мөнгөн медаль хүртлээ.
Б.Ерэнтэй
