Наадам сайхан боллоо, бөхчүүд ч үнэн хүчийг үзэн барилдлаа. Хоёр барилдааныг эс тооцвол шүү дээ. Бөхийн барилдааны хоёрын даваанд аймгийн арслан Д.Алтанцоож, долоогийн даваанд даян аварга Н.Батсуурь нар учраа бөхөө даваагүй байж туг тойрч наадлаа. Өнгөрсөн жил бас ийм үйл явдал болж, хэд хэдэн бөх нулимстай нутаг буцсан юм. Дүрэм ингэж батлагдсан болохоор давсан бөхөд буруу алга. Унасан бөхчүүд л гомдолтой хоцорлоо.

Ер нь монголчууд учраа бөхөө даваагүй байж туг тойрохыг ихэд цээрлэдэг. Тэр тусмаа бөхчүүд.

Сүүлийн хоёр жил энэ дүрмээр хэд хэдэн бөх туг тойрч, харин нэг хэсэг нь учраа олохгүй гайхах үлдэх ийм нөхцөлийг “Цагаан захтан”-гууд хуулчилж, бас бүрдүүлсэн нь алдаа байна. Ийм бүдэг судалгаатай, бөхчүүдээсээ асуулгүй оруулж ирсэн хачин дүрмээ яаралтай залруулахыг аварга цолтонгууд шаардах нь түмэн зөв. Наадамчин олон талцаж, бөхчүүд эв түнжин хагарах шинжтэй байна.

Монгол Улсын дөрөв дэх Ерөнхийлөгч Ц.Элбэгдорж эзний албанаас буухаасаа өмнө нэгэнтээ туг тойроход түмэн олноос хэрхэн шүүмжлэл ирсэн билээ. Тэр бол 2016 оны наадам бөгөөд түүнд индэрээс наадамлах сүүлчийн тохиол байлаа.

Төрийн тэргүүн маань өндөр индэрээс зодог тайлахдаа туг тойрсон нь энэ буюу. Туг тойрох гавьяа түүнд байсан уу. Инээх, ичих зэрэгцэх гэгч болсон юм. Наадмаар давсан бөх туг тойрдог болохоос эрх мэдэлтэй нь туг тойрдоггүй, бас бөхийн дүрмийг өөрчилж болохгүй юм. Учраа бөхөө даваагүй бөхийг Есөн хөлт цагаан тугийг тойруулмааргүй байна.

А.Болд