Хөлбөмбөгийн түүхэн дэх хамгийн амжилттай хоёр багийн тулаан Дэлхийн гурван удаагийн аварга Германы шигшээ багийн үнэмлэхүй ялалтаар өндөрлөлөө. Тэд ДАШТ-ийг зохион байгуулагч Бразилын шигшээ багийг 7:1-ийн харьцаатай хожиж, аваргын төлөө тоглох эрхээ авсан юм.

Германчууд ДАШТ-ий хагас шигшээ тоглолтын 30 дахь минут гэхэд өрсөлдөгчийнхөө хаалганд таван гоол оруулж, нэгэн дээд амжилтыг тогтоосон бөгөөд энэхүү дээд амжилт нь хагас шигшээ эхний үед хамгийн хурдан таван гоол оруулсан гэдэг үзүүлэлт юм. Харин Бразилчууд нэгэн сөрөг дээд амжилтыг тогтоолоо. ДАШТ-ий хагас шигшээ тоглолтын эхний 45 минутыг тав гоолын зөрүүтэй хожигдож, өндөрлүүлсэн шигшээ баг үгүй. Харин Бразил хагас шигшээ тоглолтын эхний 45 минутад таван гоол алдсан анхны баг боллоо.
Тоглолтын хоёрдугаар хагаст Бразилчууд зөвхөн хожигдох гэж талбайд гаргасан гэлтэй. Бразилын шигшээн довтлогч Неймар гэмтсэн учир довтолгоо нь урагш ахихгүй, хамгаалалтын ноён нуруу, багийн ахлагч Тиагу Сильва торгуулийн улмаас тоглоогүй учир хамгаалалтдаа маш том алдаа гаргаж байлаа. Улмаар сэлгээгээр талбайд гарсан Германы шигшээ багийн довтлогч Андре Шюррле 69, 79 дахь минутад хоёр гоол оруулж, дубль хийлээ. Харин 90 дэх минутад Бразилын шигшээн хагас хамгаалагч Оскар гоол оруулж, шигшээ багтаа, эх орондоо нэр төрийг авчирлаа. Магадгүй Германчууд Оскарын энэ гоолыг бэлэглэсэн ч байж болох. Ийнхүү Германы шигшээ Бразилыг эх оронд нь, сая хөгжөөн дэмжигчдийнх нь 7:1-ийн харьцаатай “бут ниргэлээ”.