Шөнийн цэнгээний гадна хар тамхи хэрэглэж байсан цайрсан хэдэн охиныг цагдаагийхан дөрвөн сарын өмнө баривчилсан байдаг. Гэтэл тэдний нэг нь явж, явж Хууль зүйн сайд Х.Тэмүүжинтэй холбоотой байж таарсан. Сайдтай нэр холбогдсон саваагүй охины нэр Г.Сарангэрэл. Бүх зүйл эндээс л эхлэлтэй. Цагдаа нарыг баривчилснаас хойш саяханыг хүртэл Г.Сарангэрэл урьдчилан хорих төвд саатуулагдаж байв. Харин  батлан даалтаар гарсан даруйдаа “Хоёрдугаар суваг” телевизийн “Цензургүй яриа” нэвтрүүлэгт орж “Х.Тэмүүжин сайдтай бэлгийн харьцаатай байсан уу?” гэсэн сэтгүүлчийн асуултанд “тийм” гэж хариулснаараа энэ бүх сенсаацийн эзэн болоод байгаа юм. Гэтэл тэрбээр төд удалгүй хэлсэн ярьснаасаа буцаж сэтгүүлч асуухад нь тулгамдаад “тийм, тийм” гээд хариулчихсан гэсэн тайлбарыг өгсөн. Үүний дараагаар тэрбээр Х.Тэмүүжинтэй унтсан гэж хэлснээ  залруулах гэж энд, тэндхийн хэвлэлд өөрөө гүйж очиж ярилцлага өгсөн ч тусыг эс олсон. Бүр өмгөөлөгчдийн хамтаар хэвлэлийн бага хурал хүртэл хийсэн юм.

Бүр сүүлдээ сэтгүүлч Л.Мөнхбаясгаланг айлган сүрдүүлж, тулган шаардаж байгаад Х.Тэмүүжинтэй унтсан гэж хэлүүлсэн хэмээн ярьж эхэлсэн юм. Үнэхээр тулган шаардсан уу, үгүй юу гэдэг тусдаа асуудал. Хууль хяналтын байгууллагынхан шалгаад өгнө.

Харин  үүнээс илүү ноцтой нэг үйл яригдсан нь Г.Сарангэрэлээр Х.Тэмүүжинтэй унтсан гэж хэлүүлсэн хүмүүс нь цагдаагийн нэр бүхий өндөр албан тушаалтнууд байсан нь олны анхаарлыг ихээхэн татаж байгаа юм. Тодруулбал Г.Сарангэрэлээр Х.Тэмүүжиний эсрэг зүйл яриулахыг цагдаагийн байгууллагынхан тэр дундаа Эрүүгийн цагдаагийн газрын дэд дарга Б.Ариунболд зохион байгуулсан гэх мэдээллийг Г.Сарангэрэлийн өмгөөлөгч Г.Батбаяр олон нийтэд баримттайгаар дэлгэсэн. Бүр тодруулбал, Б.Ариунболдын “Чи гол нь тэгж хэлүүл. Заавал бөгс рүү хилгэдэг барьдаг гэж хэлэхгүй, надтай гаж маягаар сексддэг байсан. Би тэрэнд дургүй байсан. Х.Тэмүүжин өөрөө дурлаад хийгээд байдаг байсан учраас би хүслийг нь дагаж хийдэг байсан. Надад их эвгүй байдаг байсан. Та нарын бодож байгаа тэр шударга ариун Х.Тэмүүжин гэж хүн чинь үнэн хэрэгтээ гаж донтой тийм хүн. Би маш их гомдож байгаа. Одоо үнэн учрыг нь дэлгэе. Эцсээ хүртэл явна. Нэр төрөө сэргээлгэнэ. Ийм л өгүүлбэр хэлүүлмээр байна. Өчигдөр өгсөн ярилцлага дээр нэмэлтээр ийм хоёр, гурван өгүүлбэр хэлүүлмээр байна. Чиний утсыг өгчихсөн байгаа. Чамруу ярьна. Хэн гэж хүн ярих вэ? Ууганбаяр даргаа? /цаана байгаа хүнээсээ асуув/ Отгонжаргал гэдэг хүн ярина шүү” гэсэн утсаар ярьсан бичлэг хадгалагдан үлдсэнийг нийтэд ил болгосон юм. Үүнийг сонссон хүмүүс Г.Сарангэрэлийг бусдын хүчинд автаж худлаа хэлжээ гэх ойлголттой болсон.

Өмгөөлөгч Г.Батбаяр  миний үйлчлүүлэгчийг сэтгүүлч Л.Мөнхбаясгалан болон цагдаагийхан сүрдүүлээд  Х.Тэмүүжиний эсрэг зүйл яриулчихлаа хэмээн гуравхан хоногийн өмнө ярьж явсан. Мөн тэрбээр Г.Сарангэрэлийн хэрэг дээр ажиллаж эхэлснээсээ хойш  өнөөдрийг хүртэл  өөрийнх нь үйлчлүүлэгчийг нэр бүхий албан тушаалтнууд дундаа хийж өшиглөөд улс төрийн золиос болгож байна. Би үйлчлүүлэгчдээ тусална, аврана гэх мэт утгатай зүйлийг ярьж ирсэн.

Гэтэл хачир дээрээ мань хүн өөрөө энэ хэргийн цаад үйл ажиллагаанд нь хутгалдаж Г.Сарангэрэлийг золиосонд гаргахад гар бие оролцсон байна. Үүнийгээ ч хүлээн зөвшөөрч “Би цагдаагийн албан хаагчидтай нийлээд Г.Сарангэрэлээр тоглочихлоо” гэж хэвлэлээр ярьж явна. Өмгөөлөгч Г.Батбаяр яагаад Г.Сарангэрэлийн эсрэг ажиллав. Өөрийнх нь тайлбарлаж буйгаар түүнийг цагдаагийнхан дарамталсан гэнэ. Бас албан тушаал, эрх мэдлийг амалжээ. Сүрдүүлэг нь аймар байсан ч албан тушаал нь түүнд гоё санагдсан учраас ийнхүү үйлчлүүлэгчийнхээ эсрэг ажилласан байна.

Тодруулбал Эрүүгийн цагдаагийн газрын дэд дарга Б.Ариунболд түүн рүү яриад  “Арав гаруй жилийн өмнө хийж байсан наймааг чинь дэлгэнэ. Хүн амины хэргүүдийг тохно. Бас чиний үйлчлүүлэгчийн холбогдсон хэргийн хүнд ял болох хоёр жилийг хорих ял онооно. Хэрвээ О.Баасанхүүгээс 10 сая төгрөг нэхэмжилснээ буцааж татвал чамд тэр мөнгийг нь өгье. Г.Сарангэрэлийг Х.Тэмүүжинтэй унтсан гэж яриулж чадвал гурван сар хорих ял өгүүлье. Гурван сарын ял нь ганц худагт суусан хоногтой нь таарна. Тэгээд ялгүй үлдэнэ биз. Засгийн газар аравдугаар сард унана. Шинэ засгийн газар бүрдэхэд чамд хууль зүйн яамны Газрын даргын тушаал өгье” гэжээ.

Тиймээс Г.Батбаяр, Г.Сарангэрэлийг хуурч гэрт нь ч очуулалгүй зочид буудалд аваачин телевизүүдэд ярилцлага өгүүлжээ. Угаасаа ингэх үүргийг цагдаагаас түүнд үүрэг болгосон байж. Тэгсэн мөртлөө тэрбээр өнөөдөр “Би цагдаагийханд дарамтлуулсан ч Г.Сарангэрэлээр Х.Тэмүүжинтэй унтсан гэх зүйлийг яриулаагүй. Г.Сарангэрэл өөрөө л “Хоёрдугаар суваг” телевизэд очоод унтсан, хэвтсэнээ дураараа ярьчихлаа” гэх утгатай зүйлийг яриад сууж байна. Төрийн өмнө тангараг хүлээсэн өмгөөлөгч хүн ийм зүйлийг хэвлэлээр мэдэгдээд сууж болох уу.

Мэдээж үзэл бодол нь төлөвшөөгүй Г.Сарангэрэл өмгөөлөгчтэйгээ зөвлөлдөхгүйгээр телевизийн нэвтрүүлэгт очиж ноцтой зүйлийг ярих уу гэдэг нь  хүн үнэмшихээргүй зүйл. Сэтгүүлч Л.Мөнхбаясгалан энэ талаар “Өмгөөлөгч Г.Батбаяр өөрөө л Г.Сарангэрэлээр Х.Тэмүүжинтэй унтсаныг нь яриулаарай гэж хэлсэн. Гол нь Х.Тэмүүжинг Г.Сарангэрэлтэй ёс бусаар харьцдаг байсан гэдгийг яриулах хэрэгтэй байна гэж надтай ярилцсан” гэсэн.

Тэгэхээр Г.Батбаяр өөрийн үйлчлүүлэгчээр Х.Тэмүүжиний эсрэг зүйл яриулаагүй гэдэг нь эргэлзээтэй асуудал.

Энэ бүгдээс үзвэл Г.Сарангэрэлийн тарьсан жонхууг Г.Батбаяр өмгөөлөгч зуурсан болж таарч байна. Мөн тэрбээр Г.Сарангэрэлийн төлөө бус албан тушаал, эрх ашгийн шуналдаа хөтлөгдөн бусадтай нийлэн өөрийн үйлчлүүлэгчийг золиосложээ. Нөгөө айхтар өмгөөлөгчийн ёс зүй, тангараг хаана байн вэ?.

Тэрбээр энэ талаар “Би хууль бус үйлдэл хийж хуйвалдаанд нь оролцсон учраас шалгаад өгөөч гэж ТЕГ, АТГ-т хандсан ч шалгахгүй байна. Б.Ариунболд “Аав ээжид нь аваачаад өгөөрэй. Тэгээд Баасанхүүд гаргасан нэхэмжлэлээ татаарай” гээд надад таван сая төгрөгийг сонинд боогоод өгсөн. Үүгээрээ би авлигад зуучлагч болж байгаа юм. Би маш олон гэмт хэрэг үйлдлээ. Намайг шалгаад өгөөч. Хамаагүй бүгдээрээ шоронд оръё. Хуйвалдаанд оролцсоноороо би ч шоронд орж Г.Сарангэрэлийн нэрийг цэвэрлэе. Бүгдээрээ нийлж байгаад тэр охиноор тоглочихлоо. Би ч тоглосон” гэж хэвлэлд ярьжээ.

Мөн тэрбээр энэ бүх хэргийн цаана УИХ-ын гишүүн Х.Баттулгыг байгаа гэсэн байна.

Тэгэхээр  Х.Тэмүүжин, О.Баасанхүү, Х.Баттулга, Г.Батбаяр нар нийлж байгаад 19 хэн настай охины энэ насны амьдралаар тоглочихжээ. Г.Сарангэрэлд цаашдын урт, удаан амьдрал бий. Гэтэл тэр өнөөдөр гудамжинд ч тайван алхаж чадахгүй явна. Залуу хүн алдаа гаргалгүй амьдрана гэдэг өөрөө сонин үзэгдэл. Их, бага хэмжээндээ л учир байгаа юм. Тэгэхэд нэг охиныг алдсаныг нь далимдуулж хайр, найргүй гишгэчиж байгаа нь энэ цаг үед хүний ёс зүй хаа ч байхгүйгээр доройтсоныг харуулж байна. Мөн тангараг өргөсөн өмгөөлөгч хүн албан тушаалын төлөө үйлчлүүлэгчээ худалдаж болдгийн жишээг Г.Батбаяр харуулж чадлаа. Түүнээс болж нийт өмгөөлөгчдийн нэр хүнд уналаа. Иргэдийн өмгөөлөгчид ч итгэх итгэл буурлаа. Одоо Г.Сарангэрэл Г.Батбаяр өмгөөлөгчөөсөө татгалзах хэрэгтэй гэж олон нийт зөвлөж байна.
 
Угтаа бол Х.Тэмүүжин сайдын эхлүүлсэн хууль зүйн салбарын шинэчлэл цагдаагийн хэдэн даргад таалагдаагүйн улмаас амьдралд дөнгөж хөл тавьж яваа нэгэн охин хохирох ёсгүй билээ.