Эрх баригчдын зарим үйлдэл үндэсний бизнес эрхлэгчдийн бухимдлыг төрүүлэх болоод удлаа. Хамгийн сүүлд “Номин холдинг” группын ерөнхийлөгч Ш.Баярсайханы бухимдал цахим ертөнцөд тавигдсаныхаа дараа дуулиан тарилаа.

Учир нь “Номин холдинг” групп нь Их тэнгэрийн аман дахь орон сууцыг 18 жилийн хугацаатай түрээслэн хэрэглэж байжээ. Түрээсийн хугацаа дуусаагүй байхад ардчилагчид “Номин холдинг” группээс шууд булаан авч. 18 жилээр мөнгөө төлсөн Ш.Баярсайхан ч бухимдах нь аргагүй. Эх сурвалжийн мэдээлж байгаагаар бол Төрийн өмчийн хорооноос байрыг буцаан авч төрийн тусгай хамгаалалтад шилжүүлжээ. Өөр нэг эх сурвалжийн мэдээлж байгаагаар бол “Номин холдинг” группээс төрийн тусгай хамгаалалтад шилжүүлэх нэрээр буцаан авч хувьчилахаар болсон гэнэ. Мэдээж хувьчлан авах эзэн нь тодорч хор найруулж эхэлсэн бололтой. Энэ жил төрийн өмчийн нилээд олон аж ахуйн нэгж, объектуудыг хувьчлахаар шийдвэр гарсан. Энэ хүрээнд Их тэнгэрийн амны орон сууцны зориулалттай байрыг хувьчлах бололтой. Хамгийн гол нь уг байрыг хувьчлан авах луйврын цаана Их тэнгэрийн амны хэсэг газрыг давхар эзэмшилдээ оруулах тулаан өрнөж байгаа гэнэ.

Хэдэн жилийн өмнө Монгол Улсын Ерөнхийлөгч асан Н.Багабанди Их тэнгэрийн аманд зуслангийн зориулалттай жижиг газар өгөхийг төрөөс хүссэн байдаг. Гэтэл тухайн үеийн С.Батболдын Засгийн газар “уучлаарай” өгөх боломжгүй. “Таныг Ерөнхийлөгч байсан гээд илүү эрх эдлүүлж болохгүй” гэсэн хариу барьсан гэдэг. Ийм чухал газрын төлөө АН-ынхан өрсөлдөөнд орж эхэлжээ. Одоогийн маргаан тариад байгаа байранд Монголын улс төр, бизнесийн томчууд амьдардаг бөгөөд өвөл ч, зун ч хотын утаанаас зайдуу чимээ анир багатай, байнгын хамгаалалттай тансагхан сууцгаадаг. Харин энэ дуулиант байрыг АН-ын хэн гэдэг улс төрч хувьчлан авах гэж байгааг урьдчилан хэлэх боломжгүй. Эсвэл дуулианаас болоод, Ш.Баярсайхны гэрэл цохиулснаас үүдээд уг байрыг хувьчилахаа зогсоож ч болох юм.

Ямар байсан Их тэнгэрийн амны орон сууц, түүнийг дагасан газраас болоод нилээд том асуудал үүсэх нь тодорхой боллоо. Үүнд бухимдсан “Номин холдинг” группын ерөнхийлөгч Ш.Баярсайхан “Би энэ Их тэнгэрийн байшинг 18 жилээр гэрээлж авсан Баярсайхан гэдэг хүн байнаа. Тэгэхээр энэ бол айдас хүйдэст автагдсан, АТГ нь шалгасан, аймшигтай жилүүд болж байна. 22 жил бизнес хийхдээ ийм юм үзээгүй, ард түмээн. Сайн бичээрэй. Наашаа бүгдээрээ хүрээд ир. Би хэлээд өгье. Наашаа, наашаа. Айдас, хүйдэст автагдсан аймшигтай жилүүд болж байнаа. 22 жил бизнес эрхлэхдээ ийм юм үзээгүй ээ. Төр хувийн хэвшлийг уландаа гишгэлж, АТГ олон дахиж шалгасан аймшигтай жилүүд болж байна. Тэгэхээр та нар нэг өдөр л нэг юм болно шүү за юу, би хэлчихье. Одоо хэн та нарт даалгавар өгснийг надаа хэлчих. Дээрээс, дээрээс гэж байгаад та нар хүн алдаг. Хувийн хэвшлийг алж байгаа хүмүүс наашаа хүрээд ир. Энэ бичлэгийг сонсож байгаа Ч.Сайханбилэг юмуу, Ерөнхий сайд нь юмуу хэн нь байдаг юм сайн сонсож ав за юу. Цаг нийгэм өөрчлөгдөнө өө. Би уг нь ардчиллыг дэмждэг хүн. Ардчилалд маш их тусалсан. Цаг өөрчлөгдөнө шүү. Миний хэлсэн үгийг өлгөж авах гэж байгаа юм уу тэ. Бариад хорьчих, шорондоо хийчих. Та нар зүгээр байгаа хүнийг шоронд хийж байна. Араас нь эмийг нь оруулахгүй алчихдаг юм байна лээ. Тэрэн шигээ алчих, за юу. Зөндөө юм байгаа шүү, цаана чинь. Айдаггүй л юм бол, за юу” хэмээн бухимдлаа илэрхийлсэн нь олон хүний анхаарлыг татлаа. Огт чимээгүй байдаг “Номин”-гийн боссын энэ тэсрэлт нийгэмд шинэ дуулианыг тарьж мэдэх юм.

Ерөнхийлөгч асан Н.Энхбаярын шоронд байгаа бичлэгийг шүүхийн шийдвэр гүйцэтгэлийнхэн задалсан. Түүн шиг Ш.Баярсайханы энэ бичлэгийг ТӨХ-ныхон нийтэд задалж байгаа бололтой. Харин Ш.Баярсайхан энэ бичлэгийг нийтэд задлана гэдгийг мэдээд нилээд сайн хэлээд авсан аж. Тэр ч бүү хэл “наашаа, наашаа” гэж уриалан дуудаж байгаад сонсох ёстой хүмүүсийн нэрсийг хэлж байгаад байр сууриа илэрхийллээ. Ийнхүү эрх баригчдын зарим бодлогоос болж үндэсний бизнес эрхлэгчдийн тэсрэлт эхэлж байна. Энэ нь юунд хүргэхийг хэлэхэд эрт юм.