“Нийслэл Өргөө” компанитай холбоотой олон асуудал гарах болоод багагүй хугацаа өнгөрч байна.  Тус компанийг авсан тендерээ дамлан зардаг мэтээр мэдээлэх нь ч бий. Тэгвэл ийн бөөн асуудлыг дагуулсан уг компанитай холбоотой нэгэн хар мэдээлэл бидэнд ирлээ.

 Тодруулбал, энэ сарын 19-нд Сүхбаатар дүүрэгт Хүн амын хөгжил, нийгмийн хамгааллын яамны захиалгаар "Нийслэл өргөө" компанийн барьж байсан  барилгаас 27-28 насны гурван хүн унаж амиа алдсан байна.

Баттай эх сурвалжийн мэдээлж буйгаар амиа алдсан гурван иргэн 14 давхарт цахилгаан шатны хэв хашмал хийх гэж байсан ч ийн харамсалтайгаар хорвоог орхижээ. Талийгаачдын хувьд "Нийслэл Өргөө"-гийн хамтарч ажиллаж байсан туслан гүйцэтгэгч компанийн ажилчид аж.

Юутай ч бид хэргийн талаар Мэргэжлийн хяналтын байгууллагын холбогдох албаны хүнээс  тодруулахад "Уг барилгын ажил дээр хөдөлмөр, аюулгүй ажиллагааны наад захын шаардлага хангаагүй байсан. Ажилчид хамгаалах бүсгүй ажиллаж байсан. Мөн шаардлага хангаагүй давцан ашиглаж байсан нь тогтоогдсон. Тэр давцан нь ачааллаа дийлэхгүй эвдэрсэнээс гурван хүн унаж амиа алдсан" гэв.

Ер нь цахилгаан шатны хонгилын  давхар бүрт хамгаалалт байх ёстой аж. Гэвч "Нийслэл Өргөө" компанийн барьж байгаа барилгын 4-14 давхарт огт хамгаалалт байхгүй байжээ. Мөн барилгын 10 давхараас дээш гадна хамгаалалт хийгээгүй гэх зэрэг маш эрсдэлтэй нөхцөлд хүмүүс ажиллаж байсныг мэргэлжийн байгууллагынхан тогтоогоод байгаа гэнэ.

Түүнчлэн, анх 10 давхар барилга барихаар зураг төсөл гаргасан ч гүйцэтгэгч компани нь зураг төслийг дур мэдэн өөрчилж 14 давхар болгосон байжээ.

Удаа дараа Мэргэжлийн хяналтын байгууллагаас анхааруулга, санамж явуулсаар байхад хэрэгжүүлэхгүй өөрсдийнхөөрөө авирласан "Нийслэл Өргөө"-гийн удирдлагууд ийн ид хийж бүтээх насандаа яваа залуусын аминд хүрлээ.

Хэргийг Сүхбаатар дүүргийн цагдаагийн хэлтэст шалгаж байна.

Хэргийн талаар дэлгэрэнгүй мэдээллийг удахгүй хүргэнэ.