Наадмын өмнөхөн Засгийн Газар Завхан аймгийн Засаг дарга Ж.Жамъянтивтэй хариуцлага тооцож огцруулах ёстой гэсэн албан бичгийг илгээсэн тухай яриа тархаж байна.

Энэ талаар Засгийн газрын албан эх сурвалжтай холбогдоход “Тийм агуулгатай бичиг илгээсэн. Энэ талаар нарийн мэдээлэл өгөхгүй. Дарга нар хэвлэлийн хурал хийж огцруулах үндэслэлийн талаар байр сууриа илэрхийлэх байх. Асуудлыг орон нутаг шийдвэрлэнэ” гэсэн утгатай тайлбар өгөв.

Ямар ч байсан Засгийн газар Завхан аймгийн Засаг даргыг огцруулах ёстой гэж үзсэн бололтой. Тэр ч бүү хэл АТГ-аар шалгуулах үндэслэл байгаа гэж Засгийн газрынхан үзсэн байна.

Завхан аймгийн Иргэдийн Төлөөлөгчид ээлжит хурлаа энэ сарын 31-нд хийнэ гэж өөрийн вэб хуудаснаа мэдээлэв. Энэ хурлаар асуудлыг хэлэлцэх бололтой. Харин ИТХ хэдэн төлөөлөгчидтэй, намуудын харьцаа ямар байх талаар тодорхой мэдээлэл алга.

Эх сурвалжийн мэдээлж байгаагаар бол 36 төлөөлөгчидтэй. Түүний 10 нь АН-ынх үлдсэн 26 нь МАН-ынх аж. Эндээс харвал Ж.Жамъянтивийг огцруулна гэдэг эргэлзээтэй. Хамгийн гол нь Засгийн газар дараалан огцруул гэсэн бичиг илгээгээд байвал асуудал улам л хүндэрнэ. Тэгээд АТГ-аар шалгуулаад эхэлбэл байдал эвгүйтнэ. Ингээд Засгийн газар огцруул гэж гэдийгээд Завханчууд хамгаалаад байдал сунжрах магадлалтай. Нөхцөл байдал ингэж өрнөх магадлалтай тул Засгийн газраас орлогчийг нь жинхэл эсвэл дотроос нь өөр хүн томилвол дэмжинэ гэсэн далд үүрэг өгсөн сураг гарлаа.

Завхан аймгийн Засаг даргын орлогчоор Ч.Пунцаг хэмээх залуу ажилладаг. Бас АН-ын ч орлогч байдаг гэнэ. Хэрэв МАН-ын тал нь Ч.Пунцагийгаа дэмжинэ гэвэл одоогийн даргаа огцруулж мэдэх аж.