Налайхад найзыгаа зургаан удаа буудаж хөнөөсөн этгээдэд 25 жилийн ял оноолоо
Налайх дүүрэгт өнгөрсөн оны аравдугаар сарын 17-18-нд шилжих шөнө нэгнийгээ зургаан удаа буудаж хөнөөсөн хэрэг гарсан талаар бид мэдээлсэн.  Тэгвэл талийгаач М.Эрхэмбаярыг түүний танидаг хүн А.Мэндбаяр гэгч буудаж хөнөөсөн нь тогтоогдсон байдаг. Тухайн хэргийн мөрдөн байцаалт дуусч хэргийг шүүхэд шилжүүлсэн юм. Тэгвэл уг хэргийн шүүх хурал өчигдөр Хорих 461 дүгээр ангид болж шүүгчдэгч А.Мэндбаярын чанга дэглэмтэй хорих ангид 25 жил хорих шийдвэр гарчээ.

Хэвлэл мэдээллийн хэрэгслээр талийгаачийг  хар тамхичин мэтээр, аавыг нь өмнө нь ял шийтгэл хүлээж байсан болгож бичсэн. Гэвч үүнийг талийгаачийн ар гэрийнхэн эрс эсэргүүцэж, харин хүүг буудсан А.Мэндбаяр гэгчийг хэргийг үйлдэх үедээ хар тамхи, сэтгэцид нөлөөлөх эм бэлдмэл хэрэглэсэн байж мэднэ. Мөн түүний аав Н.Алтансүхийг өмнө нь хэрэгт холбогдож, ял авч байсан гэв.

Талийгаачийг машинаас нь 3 метрийн зайд аваачиж араас нь зургаан удаа буудаж хөнөөсөн байдаг. Тэгэхээр амьд хүнийг араас нь зургаан удаа буудаж хөнөөж байгаа хүн яав ч эрүүл биш, тиймээс сэтгэцид нөлөөлөх ямар нэг зүйл хэрэглэсэн байх гэж талийгаачийн ар гэрийнхэн үзэж байгаа.

Хороололд ойролцоо амьдардаг байсан учир нэгнээ танидаг байсан. Учиргүй сайн найзууд байгаагүй. Гэхдээ А.Мэндбаярын гэгчийн аав Алтансүх талийгаачийг “чамайг заавал ална” гэж сүрдүүлж байсан гэдэг.  Харин сэжигтний аав талийгаачийг ингэж сүрдүүлсэний яг сарын дараа тухайн хэрэг гарсан. Энэ талаар гэрчлэх хүмүүс байгаа ч сэжигтний ар гэр, хуулийн байгууллагынхны хүнд суртлаас болоод гэрчийн мэдүүлэг өгдөггүй. 

Энэ хэрэгт Эрүүгийн хуулийн 91.3 гэсэн зүйл анги буюу өш хонзонгийн сэдэлтэй хүн амины хэрэг гэдгээр хэрэг үүсгэсэн. Өчигдөрхөн шүүхээр шийдвэрлэлээ. Хэвлэл мэдээллийн хэрэгслээр хэрэг гарсаны дараахан уг хэргийг хар тамхи болоод найз охиноо булаацалдсанаас  үүдэлтэй гэж бичиж байсан.  Харин А.Мэндбаяр гэгч мэдүүлэг өгөхдөө найз охиныг минь хүчиндсэн, намайг байнга зодож дарамталдаг байсан мэтээр мэдүүлэг өгч байгаа аж.