Малайзын иргэний агаарын тээврийн МН17 онгоц Украины газар нутагт пуужинд оногдож, сүйрсэний дараагаар Алжир, Тайваньд дараалан осол гарлаа. 116 хүний амийг авч одсон Алжирын онгоцонд юу тохиолдсон нь тодорхойгүй байна. Харин Тайванийн эрх баригчид онгоцны осолд хар салхи огт хамааралгүй гэж үзэж байгаа ажээ.
Эдгээр ослууд санамсаргүй давхцал гэдгийг салбарын мэргэжилтнүүд тайлбарлаж байна. “Агаарын тээвэр найдвартай хэвээр байгаа. Ослууд хоорондоо огт холбоогүй” гэж Сан Францискод төвтэй “Atmosphere Research” группын нисэх хүчний салбарын шинжээч Хенри Хартивелдт ярьжээ. Өмнө нь 2012 онд Бирм, Оросод дөрвөн өдрийн зайтай хоёр онгоц осолдож байсан юм.
    Онгоцны ослуудын дийлэнх нь хүний алдаа болон техникийн саатлаас үүдсэн байдаг. 1985 онд Токиогоос 60 бээрийн цаана 520 хүнтэй онгоц сүйрсэн нь техникийн сааталтай холбоотой байжээ. 1950-2010 оны хооронд дэлхий даяар 1,100 гаруй осол болсоны дийлэнх нь механик гэмтлээс шалтгаасан гэсэн статистик мэдээлэл бий. Тиймээс онгоцны ослуудад ямар нэг холбоо хамаарал байхгүй гэж судлаачид тайвшруулж байна.
Өнгөрсөн онд дэлхий даяар нийт 36,4 сая нислэгээр 3 тэрбум хүн аюулгүй зорчсон бөгөөд 81 осол Олон улсын агаарын тээврийн ассоциацад бүртгэгджээ. Жилд 81 осол гэдэг нь сүүлийн таван жилийн дунджаас доогуур үзүүлэлт гэнэ. Өөрөөр хэлбэл 2,4 сая нислэг тутамд нэг осол тохиолддог гэсэн үг юм.
Гэхдээ энэ онд дараалан болсон ноцтой ослуудын улмаас 700 гаруй хүн амиа алдаж, агаарын тээврийн салбарын хар өдрүүд тохиож байна. Өдөр бүр 30 мянган нислэг үйлдэгдэж буй энэ үед агаарын тээврийн салбарын аюулгүй байдалд анхаарах цаг хэдийнэ болжээ. 1958 онд АНУ-ын иргэний агаарын тээврийн онгоц сүйрсний дараагаар хяналтын системийг сайжруулахаар 250 сая долларын хөрөнгө оруулалт хийж байв. Мөн 1983 онд Канадад гарсан ослын дараагаар аюулгүй газардахад зориулсан системийг боловсруулжээ. Тиймээс энэ мэтчлэн алдаануудыг сайтар нягталж, аюулгүй тээвэрт анхаарах цаг болжээ.