Нийслэлийн цагдаагийн газрын Хүнд, Онц хүнд гэмт хэрэг мөрдөн шалгах хэлтсийн эрүүгийн тасгийн алба хаагчид Нийслэлийн Баянгол, Баянзүрх, Сүхбаатар дүүргийн нутаг дэвсгэрт 2012 оноос хойш үйлдэгдээд, эзэн холбогдогч нь тогтоогдоогүй байсан дээрмийн хэрэг үйлдсэн бүлэг этгээдийг илрүүлсэн талаар өчигдөр бид мэдээлсэн. 1988-1995 онд төрсөн таван залуу 2012 оны дөрөвдүгээр сараас 2014 оны тавдугаар сарын хооронд дээрх дүүргийн нутаг дэвсгэрээр шөнийн цагаар биеэ хамгаалах чадваргүй, ганц нэгээрээ явж буй хүмүүсийг бүлэглэн зодож, амь биед нь аюултайгаар хүч хэрэглэн, нийт 25 удаагийн үйлдлээр бусдын эд зүйлийг дээрэмдэн авсныг тогтоон шалгаж эхэлсэн байна.


Тэдний үйлдсэн хэргүүдээс дурдвал: 2014 оны 04 дүгээр сарын 22-ны өдөр тэд Баянзүрх дүүргийн 14-р хороо Түмэннаст хотхонд иргэн О-гийн эд зүйлийг дээрэмджээ. Мөн 04 дүгээр сарын 08-ны өдрийн шөнийн 03 цагийн үед Баянзүрх дүүргийн 14 дүгээр хороо "Теди-2" худалдааны төв орчим иргэн Б нь үл таних хүмүүст зодуулан эд зүйлсээ дээрэмдүүлсэн, тавдугаар сарын 23-ны шөнийн 04 цагийн үед Баянзүрх дүүргийн 18-р хороо 10 дугаар байрны гадаа иргэн Г нь гэр лүүгээ явж байхдаа үл таних хүмүүст зодуулан гар утас, бэлэн мөнгөө дээрэмдүүлсэн, тавдугаар сарын  14-ний өдөр  Баянзүрх дүүргийн 15 дугаар хороо, 5 дугаар байрны хойд талд иргэн Ж нь үл таних таван хүнд зодуулан эд зүйлээ дээрэмдүүлсэн, тавдугаар сарын 11-ний өдөр шөнийн 03 цагийн үед Баянзүрх дүүргийн зургадугаар хороо, Оюутны хотхоны дунд иргэн Э үл таних 5-6 залууд эд зүйлээ дээрэмдүүлсэн, тавдугаар сарын 22-ны өдөр Баянзүрх дүүргийн гуравдугаар хорооны нутаг дэвсгэрт иргэн Д-г үл таних 4-5 залуу зодож мөнгөн гинж, гар утас, бугуйн цаг зэрэг эд зүйлсийг нь дээрэмдсэн, дөрөвдүгээр сарын 21-ний өдөр мөн дүүргийн гуравдугаар хороо, II дугаар эмнэлгийн урд иргэн М нь үл таних гурван залууд зодуулан эд зүйлээ дээрэмдүүлсэн эрүүгийн хэргүүдийг бүлэглэн үйлдсэн болохыг тогтоожээ.


Сэжигтэн Д нь 1995 онд Улаанбаатар хотод төрсөн. 19 настай, эрэгтэй, яс үндэс халх. Бүрэн бус дунд боловсролтой, мэргэжилгүй. Ээжтэйгээ Баянзүрх дүүрэгт оршин суудаг аж. Тэрээр 2003-2011 онуудад 305 хүүхдийн хотхонд хүмүүжиж, амьдарч байсан юм байна.

Сэжигтэн Т нь 1995 онд Улаанбаатар хотод  төрсөн. Эрэгтэй, яс үндэс халх, бүрэн бус дунд боловсролтой, барилгын засал чимэглэлчин мэргэжилтэй. Ээж, дүүгийн хамт мөн л Баянзүрх дүүрэгт оршин суудаг. 2011 онд Баянгол дүүргийн шүүхээс Монгол Улсын Эрүүгийн хуулийн 147.2-оор нэг жилийн тэнсэн харгалзах ялаар шийтгүүлж байжээ.

Сэжигтэн Д нь 1994 онд Завхан аймагт төржээ. Эрэгтэй, яс үндэс халх, бүрэн дунд боловсролтой, мэргэжилгүй. Аав, ээж, ахтайгаа Баянгол дүүрэгт оршин суудаг байна. Улсаас авсан гавьяа шагнал, ял шийтгэл байхгүй аж.

Сэжигтэн Ц нь 1996 онд төрсөн. 18 настай, эрэгтэй, яс үндэс халх. Бүрэн бус дунд боловсролтой, мэргэжилгүй. Аав, ээж, хоёр ЧД-т оршин суудаг. Өмнө нь ял шийтгүүлж байгаагүй.

Сэжигтэн З нь 1988 онд Улаанбаатар хотод төрсөн. 26 настай, эрэгтэй, яс үндэс халх. Бүрэн дунд боловсролтой, мэргэжилгүй. Эхнэр, охины хамт Баянзүрх дүүрэгт оршин суудаг.