БНХАУ-ын 100 орчим иргэн энэ сарын 2-ны 08.00 цагийн үед цуглаан хийхээр төв талбайг зорин явж байхад нь цагдаагийн байгууллага болон “Хас Монгол”, “Ногоон хас”, “Хас нэгдэл тайван”, “Босоо хөх Монгол” хөдөлгөөнийхөн нэгдэн саатуулж, БНХАУ-ын Элчин сайдын яаманд хүргэсэн. Тухайн үед “Хас Монгол” хөдөлгөөний удирдах зөвлөлийн гишүүн Д.Дарханбаатар “Бэрэн” ХХК-ийнхан цалингаа өгөхгүйн улмаас цуглаан хийсэн гэх тайлбарыг хэвлэлийнхэнд өгч байсан юм.
“Бэрэн” групп 30-аад туслан гүйцэтгэгч компанитай хамтран ажилладаг бөгөөд тэдний нэг болох “Өлзийт Буян Өргөө” гэх компанийн туслах ажилчид байсан гэдгийг “Бэрэн” группийн удирдах албаны хүн хэлсэн. “Өлзийт Буян Өргөө” ХХК нь “Бэрэн” группийн Сүхбаатар дүүргийн VII хороонд баригдаж буй барилгын угсралтын ажлыг хийхээр гэрээ хийсэн юм билээ.

Албаны эх сурвалжийн мэдээлснээр, Чингисийн талбай дээр жагсаал хийхийг завдсантай нийлээд 130 хятад иргэнийг Иргэний харъяалал, шилжилт хөдөлгөөний газраас энэ сарын 6-нд албадан гаргасан. Харин тэдгээр ажилчдын цалинг өгсөн эсэх нь тодорхойгүй байсан юм. Энэ талаар тодруулахаар “Өлзийт Буян Өргөө” компанийн албаны хүнтэй холбогдож тодруулахад “Манай компанид ажиллаж байсан 30-аад хятад ажилчны цалинг бүрэн өгсөн. Ямар ч гомдол саналгүй гэсний үндсэн дээр тэднийг нутаг руу нь албадан гаргасан” гэх хариулт өгсөн.  Тодруулбал дээрх иргэдийг оруулж ирсэн гэх" Ван Тай" ХХК-ийг зохих хуулийн дагуу 15.774.000 төгрөгөөр торгож, 56 иргэнийг гурван жилийн хугацаагаар Монгол улсад зорчих эрхгүйгээр албадан гаргах шийдвэр гаргасныг хариуцсан хүмүүс нь гүйцэтгэж, Улаанбаатар-Замын-Үүд чиглэлийн галт тэргэнд суулган Монгол улсаас албадан гаргах арга хэмжээг авсан байна.