“Талын зам” болон “Бүс ба Зам” санаачилгыг уялдуулах тухай Монгол Улсын Засгийн газар, БНХАУ-ын Засгийн газар хоорондын Харилцан ойлголцлын Санамж бичгийн төслийг хэлэлцэн дэмжив.

2013 онд БНХАУ-ын дарга Си Зиньпин “Бүс ба Зам” санаачилгыг дэвшүүлснээс хойш дотоод, гадаад бодлогын стратегийн чиглэлээ болгож, дэлхийн улс орнуудыг энэ санаачилгад нэгдэхийг уриалж хамтран ажиллаж байна.

Энэ нь Зүүн Азийн 11 улс, Баруун Азийн 18, Өмнөд Азийн найм, Төв Азийн тав, Тусгаар улсуудын хамтын нөхөрлөлийн долоо, Төв болон Зүүн Европын 16 нийт 65 улс болон бүс нутгийг хамарсан стратегийн томоохон санаачилга юм.

Энэ санаачилга нь бодлогын зохицуулалт, дэд бүтцийн бүтээн байгуулалтаар холбогдох, худалдаа, санхүү, иргэдийн харилцаа холбоо зэрэг тэргүүлэх чиглэлээр хамтран ажиллах зорилготой.

Харилцан ойлголцлын Санамж бичигт гарын үсэг зурах эрхийг Гадаад харилцааны сайд Ц.Мөнх-Оргилд Засгийн газрын хуралдаанаас зөвшөөрлөө.

Өнгөрсөн сарын 1-нээс эхлэн иргэд нийтийн тээврээр зорчихдоо зөвхөн картаар үйлчлүүлдэг болсон. Энэ нь жолооч нар болоод зорчигчдод илүү амар болсон байна. Бэлэн мөнгөөр үйлчлүүлдэг байхад иргэд уранхай мөнгө хийдэг, жолооч нар мөнгөний савнаас хулгай хийдэг, нийтийн тээвэр ашиггүй ажилладаг гэх мэт хүндрэлүүд үүсдэг байв. Харин картын системд шилжсэнээр энэ бүгд арилсан аж.

Нийслэлийн Тээврийн газраас өдөр бүр 27 байцаагч автобусаар зорчиж буй иргэдэд хяналт шалгалтыг хийн ажиллаж байгаа аж. Хэрэв картаа уншуулаагүй зорчсон тохиолдолд холбогдох хуульд заасны дагуу 1000-5000 төгрөгөөр торгож байгаа юм байна.

Шалгалтын явцад оюутнууд ихэвчлэн ЕБС-ийн сурагчдын картаар зорчих, ахимаг насныхан ахмадуудын картаар зорчих зөрчлүүд гарч байгаа. Иймээс нийтийн тээврийн хяналтыг сайжруулан ажиллаж байна хэмээн нийслэлийн Тээврийн газрын Улсын ахлах байцаагч Б.Ахалбек хэлсэн юм.

Нийслэлийн хэмжээнд 86 чиглэлд өдөртөө 929 том оврын автобус үйлчилгээнд гардаг. Автобус хоорондын зай бага болж хүлээлт буураад байгаа юм. Мөн нийтийн тээврийн компаниуд ажилчдынхаа цалинг цагт нь тавьдаггүй байдал байсан. Картаар зүйлчилдэг болсноор энэ байдал багасч байгаа гэдгийг жолооч нар хэлж байлаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

БНХАУ-ын Засгийн газраас Монгол Улсын Засгийн газарт олгож байгаа 500 сая ам.долларын хөнгөлөлттэй зээлийн хөрөнгөөр хэрэгжүүлэх төслүүдийн тухай Засгийн газрын тогтоолын төслийг шинэчлэн баталлаа.

Засгийн газрын ээлжит хуралдаан 2017.05.02-нд болж дараах асуудлуудыг хэлэлцэн шийдвэр гаргалаа.

Улсын Их Хурлын Өргөдлийн байнгын хорооны хуралдаан өнөөдөр /2017.05.02/ 10 цаг 23 минутад 52.6 хувийн ирцтэй эхэллээ. Хуралдааны эхэнд тус байнгын хорооны 2016 оны 03 дугаар тогтоолын 11-т заасан /Улсын Их Хурлын 2012 оны “Малчид, үндэсний үйлдвэрлэгчдийг дэмжих зарим арга хэмжээний тухай” 74 дүгээр тогтоолын 2.5 дахь заалтад заасны дагуу, арьс ширний үйлдвэрүүдийг үйлдвэрийн шинэ бүс рүү шилжүүлэх арга, хэмжээг 2017 оны 12 дугаар сарын 31-ний дотор үе шаттайгаар зохион байгуулах ажлыг эрчимжүүлэх/ тухай Хүнс, хөдөө аж ахуй, хөнгөн үйлдвэрийн сайдын мэдээлэл сонслоо.

Хүнс, хөдөө аж ахуй, хөнгөн үйлдвэрийн сайд П.Сэргэлэн хийсэн мэдээлэлдээ, өнөөгийн байдлаар арьс шир боловсруулах 34 үйлдвэр Улаанбаатар хотын ХУД-ийн 2-р хороо, БГД-ийн дүүрэг, Дархан хот гэсэн 3 газар байршилд байрлаж үйл ажиллагаа явуулж байна. Үүнээс гүн боловсруулалт хийдэг 24 үйлдвэр, хагас боловсруулдаг 10 үйлдвэр тус тус үйл ажиллагаа явуулдаг. Эдгээр үйлдвэрүүдийн суурилагдсан хүчин чадлын хэмжээ богийн арьсанд шилжүүлсэнээр 20,0 сая ширхэг хагас боловсруулах, 6,0 сая ширхэг арьс ширийг гүн боловсруулах хүчин чадал тус тус суурилагдсан байна.



Улаанбаатар хотын Хан-Уул дүүргийн 14 дүгээр хороо, Сонгинохайрхан дүүргийн 20 дугаар хорооны нутгийн заагт Эмээлт орчимд 50 га газарт Арьс ширний үйлдвэрийн цогцолбор байгуулах дэд бүтцийг барих Техник эдийн засгийн үндэслэл судалгаа, зураг төсөл, төсвийг 2012 онд Нийслэлийн Засаг даргын тамгын газрын захиалгаар гүйцэтгүүлсэн. Цогцолборын Техник эдийн засгийн үндэслэл, зураг төсөл, төсвийн талаарх танилцуулгыг 2012 оны 10 сард Ерөнхий сайдад танилцуулахад арьс ширний үйлдвэрийн цогцолбор байгуулах байршлыг дахин судалж тогтоох үүрэг өгсөн. Үүний дагуу дэд бүтэц харьцангуй сайн хөгжсөн Налайх, Багануур, Багахангай, Эрдэнэт, Дархан хотуудын ойролцоо газарт Арьс ширний үйлдвэрийн цогцолбор байгуулах дэд бүтцийг барих асуудлыг судалж, мөн түүнчилэн арьс, ширний үйлдвэрүүдийг үйлдвэрийн шинэ бүс рүү шилжүүлэх, арьс ширний үйлдвэрийн цогцолбор байгуулах дэд бүтцийг барих асуудлаар өндөр хөгжилтэй орнуудын мэргэжилтнүүдтэй хамтран ажиллаж, харьцуулсан судалгаа хийсэн. Дээрхи асуудлыг Засгийн газрын 2013 оны 7 дугаар сарын 6-ны өдрийн хуралдаанаар хэлэлцүүлэн арьс, ширний үйлдвэрүүдийн цогцолборыг Дархан-Уул аймагт төвлөрүүлэн байршуулахаар 249 дүгээр тоот тогтоол баталсан.

Засгийн газрын 2013 оны 8 дугаар сарын 23-ны өдрийн хуралдаанд холбогдох санхүүжилтийн асуудлыг хэлэлцүүлж, 305 дугаар тогтоолоор батлуулан, “Дархан-Уул аймагт байгуулах Арьс ширний үйлдвэрлэлийн цогцолборын мастер төлөвлөгөө, ТЭЗҮ, ерөнхий төлөвлөгөө боловсруулах” ажлыг сонгон шалгаруулалтаар гүйцэтгүүлсэн.

Засгийн газрын 2013 оны 249 дүгээр тогтоолыг хэрэгжүүлэх явцад Улаанбаатар хотод үйл ажиллагаа явуулж байгаа арьс шир боловсруулах үйлдвэрүүд болон Дархан-Уул аймгийн иргэд Арьс ширний үйлдвэрлэлийн цогцолборыг Дархан-Уул аймагт байгуулах асуудлыг дэмжихгүй байсан тул уг асуудлыг Засгийн газрын 2014 оны 3 дугаар сарын 14-ний өдрийн хуралдаанаар хэлэлцүүлэн, 10 дугаар тэмдэглэл гарсан. Энэхүү тэмдэглэлийн дагуу Орхон аймаг, Улаанбаатар хотын Багануур, Налайх дүүрэг, Чойр, Сайншанд зэрэг дэд бүтэц харьцангуй хөгжсөн аймгуудын саналыг судалж, сонгон шалгаруулалт явуулсан. Үүний дүнд арьс ширний үйлдвэрийн цогцолборыг байгуулахад Улаанбаатар хотын Багануур дүүрэг нь газрын байршил, төлөв байдал, дэд бүтцийн хувьд тохиромжтой гэж сонгогдсон тул Засгийн газарт хэлэлцүүлэхээр бэлтгэсэн.

Засгийн газрын 2014 оны 11 дүгээр сарын 1-ний өдрийн хуралдаанаар 2013 оны 249 дүгээр тогтоолын 1-р зүйлд “Арьс ширний үйлдвэрүүдийн цогцолборыг Дархан-Уул аймагт төвлөрүүлэн байршуулсугай” гэж заасныг хүчингүй болгосон ба Засгийн газрын 2014 оны 356 дугаар тогтоолоор Хан-Уул дүүргийн 13 дугаар хорооны нутаг “Шар хөцийн хоолой” гэдэг газарт “Арьс ширний үйлдвэрийн парк”-ийг байгуулах Нийслэлийн саналыг дэмжсэнгүй гэж тогтоосон байна.

Түүнчлэн, анх төлөвлөж байсан газрын хэмжээг Нийслэлийн Засаг даргын 2015 оны А/139 тоот шийдвэрээр 160 га болгож нэмэгдүүлэн, “Эмээлтийн Хөнгөн үйлдвэрлэлийн технологийн паркийн төслийн нэгж” орон нутгийн өмчит үйлдвэрийн газарт 15 жилийн хугацаагаар эзэмшүүлэхээр болсон.

Өнөөдөр Хүнс, хөдөө аж ахуй, хөнгөн үйлдвэрийн яам нь Эмээлтийн Хөнгөн үйлдвэрлэлийн технологийн паркийн тусгай зөвшөөрлийг олгох асуудлыг судлан Засгийн газарт танилцуулах үүрэг бүхий Ажлын хэсэг байгуулсан ба шаардлагатай бичиг баримтыг бүрдүүлэн ажиллаж байна. Нийслэл чиг үүргийнхээ хүрээнд Эмээлтийн Хөнгөн үйлдвэрлэлийн технологийн паркийн дэд бүтцийг бүтээн байгуулсан нөхцөлд арьс, шир боловсруулах үйлдвэрүүдийг шинэ бүс рүү нүүлгэн шилжүүлж, улс орны нийгэм эдийн засагт өндөр ач холбогдолтой арьс, шир, ноос, ноолуурын үйлдвэрлэлийг хөгжлийн шинэ шатанд гаргахыг Хүнс, хөдөө аж ахуй, хөнгөн үйлдвэрийн яам бодлогоор дэмжин ажиллах болно гэлээ.



Дараа нь Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан мэдээлэл хийв. Тэрээр, УИХ-ын 2012 оны “Малчид, үндэсний үйлдвэрлэгчдийг дэмжих зарим арга хэмжээний тухай” 74 дүгээр тогтоолын 2.5 дахь заалтад заасны дагуу, арьс ширний үйлдвэрүүдийг үйлдвэрийн шинэ бүс рүү шилжүүлэх арга, хэмжээг 2017 оны 12 дугаар сарын 31-ний дотор үе шаттайгаар зохион байгуулах гэсэн үүрэг өгөгдсөн байгаа. Харамсалтай нь өнөөдрийг хүртэл хөрөнгө оруулалт болоод бусад үйл ажиллагаа хийгдээгүй улмаас арьс, ширний үйлдвэрүүд хэвээр үйл ажиллагаагаа явуулж байна. Энэхүү тогтоолын хэрэгжилтийн хүрээнд УИХ-ын 2013 оны 23-р тогтоолоор Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын баримт бичиг, УИХ-ын 2015 онд батлагдсан Үйлдвэрлэлийг дэмжих тухай хууль, мөн оны УИХ-ын 62 дугаар тогтоолоор Төрөөс аж үйлдвэрийн талаар баримтлах бодлого тус тус батлагдсан байгаа. Хууль эрх зүйн орчны хүрээнд тодорхой хэмжээнд бэлтгэл ажил хийгдэж, эрх зүй орчин бүрдсэн гэж салбарын хүрээнд үзэж байгаа. Монгол Улсын Засгийн газрын 2014 оны 356 дугаар тогтоолоор Хан-Уул дүүргийн 13 дугаар хорооны нутаг “Шар хөцийн хоолой” гэдэг газарт “Эмээлтийн Хөнгөн үйлдвэрийн үйлдвэрлэл, технологийн парк” байгуулахаар шийдвэрлэсэн. Үүнтэй холбогдуулан газрын асуудал шийдвэрлэгдэж, мөн бусад ажлууд хийгдсэн байгаа. Энэхүү төслийн хүрээнд гадна, дотны хөрөнгө оруулагчдыг татах олон уулзалт зохион байгуулагдаж байна. Тухайлбал, IFC буюу Олон улсын санхүүгийн корпорацитай хийсэн уулзалтаар бүтээн байгуулалтын бэлтгэл ажлын хүрээнд ТЭЗҮ-г олон улсын түвшинд боловсруулах, мөн бэлтгэл ажлыг хангах талаар Нийслэлийн ЗДТГ, Олон улсын санхүүгийн корпорацитай хамтран ажиллаж байгаа. УИХ-ын 2012 оны 74 дүгээр тогтоолын хэрэгжилтийг хангахад хэд хэдэн асуудлыг шийдвэрлэж өгөхийг хүсье. Үүнд, үйлдвэрлэл, технологийн паркийн тусгай зөвшөөрлийг Засгийн газрын хуралдаанаар шийдвэрлүүлэх, дэд бүтцийн бүтээл байгуулалт болон зураг төслийн санхүүжилт тулгамдсан асуудал болоод байна гэлээ.



Хэлэлцэж буй асуудалтай холбогдуулан өргөдөл гаргасан иргэдийг төлөөлж иргэн Д.Хишигээ үг хэлэв. Тэрээр, 2007 оноос энэ асуудал яригдаж эхэлсэн бөгөөд өнөөдөр тодорхой үр дүнд хүрч байгаад иргэд талархалтай байгааг дуулгав. Түүнчлэн иргэд Үндсэн хуулиар олгогдсон эрхийнхээ хүрээнд Өргөдлийн байнгын хороонд хандаж өргөдөл ирүүлсэн, энд ямар нэгэн улс төржилт явагдаагүй болохыг тодотгов.

Хуралдааны дэгийн дагуу УИХ-ын гишүүд асуулт асууж, тайлбар авлаа. УИХ-ын гишүүн М.Билэгт, Улсын Их Хурлаас 2012 онд 74 дүгээр тогтоол гаргасан, дөрвөн жил өнгөрөхөд өнөөдөр ямар ажил хийгдсэн ба хэрэгжилт нь ямар шатанд явагдаж байгааг тодруулав, учир нь тэнд амьдардаг иргэдийн амьдрах нөхцөл өнөөдөр маш хүнд байгаа гэлээ. Түүнчлэн өнөөдрийг хүртэлх хугацаанд зарцуулсан хоёр орчим тэрбум төгрөгийн зарцуулалт, мөн цахимаар хэдэн иргэнд газар олгосон талаар тодруулав.




Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан хариулахдаа, 2.6 тэрбум төгрөгийг аж үйлдвэрийн паркийн ТЭЗҮ, цахилгаан, техник технологийн зураг төслийн ажил зэрэг 12 ажилд хөрөнгө оруулалт хийж зарцуулсан. Хөрөнгө оруулалтын ажилд хоёр төрлийн санхүүжилт шаардлагатай байдаг гэлээ. Газар олголтын хувьд Аргалант, Эмээлтийн суурьшлийн бүс бүхэлдээ батлагдсан. Үүнд, паркт 50 га, иргэдэд 100 орчим га олгогдсон гэв. Цахим бүртгэлтэй холбоотой асуудлаар маш их шүүмжлэл дагуулж байгаа, Нийслэлээс өнөөдөр ажлын хэсэг ажиллаж байгаа. Энэ хүрээнд Эмээлтэд олгогдсон газрыг дахин харна. Багануур дүүрэгт үйлдвэр технологийн парк баригдахаар төлөвлөгдсөний дагуу бэлтгэл ажил хийгдэж байгаа. Логижистик төвийг Налайх дүүрэгт байршуулахаар ажиллаж байна гэв.

Хүнс, хөдөө аж ахуй, хөнгөн үйлдвэрийн сайд П.Сэргэлэн нэмэлт тайлбар хийхдээ, яамны зүгээс хийж буй ажилд олон хүндрэл, бэрхшээл учирч байна. Тухайлбал, Эмээлт рүү нүүлгэхэд цаг хугацаа, хөрөнгө оруулалт их шаардагдана. Газрын асуудлыг шийдвэрлээгүйгээс 4 жил өнгөрсөн, иймд бид өнөөдөр дорвитой шийдэлд хүрэх нэн шаардлагатай байна гэлээ.

Арьс ширний үйлдвэрүүдийн холбооны гүйцэтгэх захирал Т.Баярсайхан хэлэхдээ, Эмээлтийг сонгосон нь судалгааны олон шийдлээс улбаатай учир өөр газар шилжүүлэхгүй байхад анхаарна уу. Бид өөрсдөө зардлаа гаргаад нүүхэд бэлэн, харин дэд бүтцийн асуудлыг шийдвэрлэж өгөхийг хүсэв.




Ийнхүү УИХ-ын гишүүд тодруулга авч, санал хэлсний дараа УИХ-ын Өргөдлийн байнгын хорооноос Засгийн газарт чиглэл өгөх тухай Байнгын хорооны тогтоолын төсөл 80.0 хувийн саналаар батлагдлаа.

Дараа нь УИХ-ын 2012 оны “Малчид үндэсний үйлдвэрлэгчдийг дэмжих зарим арга хэмжээний тухай” 74 дүгээр тогтоолын 2.5 дугаар заалтын биелэлтийг хангуулах, тогтоолын хэрэгжилтэд хяналт тавьж ажиллах, санал дүгнэлт боловсруулж Байнгын хорооны хуралдаанд танилцуулах үүрэг бүхий ажлын хэсгийг байгуулах асуудлыг хэлэлцэж, ажлын хэсгийн ахлагчаар УИХ-ын гишүүн М.Билэгтийг сонгов.

Ажлын хэсгийн гишүүдээр УИХ-ын гишүүн Д.Сарангэрэл, А.Сүхбат, Н.Цэрэнбат, Б.Энх-Амгалан нар ажиллахаар тогтлоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Нийслэлийн Засаг дарга бөгөөд Улаанбаатар хотын Захирагч С.Батболд “Адра Монгол” олон улсын байгууллагын БНСУ-ын Сам-Юг их сургуулийн эрүүл мэндийн шинжлэх ухааны болон Нийгмийн хамгааллын коллежийн декан, Нийгмийн үйлчилгээний хэлтсийн дарга Ко Мён Сүкийг өнөөдөр хүлээн авч уулзлаа.

Нийслэлийн цагдаагийн газраас иргэдийн амар тайван байдлыг хангах, гудамж талбайд үйлдэгдэж буй гэмт хэрэг, зөрчлийг илрүүлэх, таслан зогсоох, урьдчилан сэргийлэх зорилгоор 2017 оны 04 дүгээр сарын 18-ны өдрөөс “Эргүүл” нэгдсэн арга хэмжээг Цагдаагийн ерөнхий газрын Нийтийн хэв журам хамгаалах газартай хамтран зохион байгуулж байна.


Арга хэмжээний хүрээнд эхний 14 хоногийн байдлаар захиргааны зөрчил үйлдсэн 9741 иргэнийг 48.705.000 төгрөгөөр торгох, шүүхийн шийдвэрээр 389 иргэнийг баривчлуулах захиргааны шийтгэл ногдуулж, согтууруулах ундаа хэтрүүлэн хэрэглэж бусдын амгалан тайван байдлыг алдагдуулсан 1849 иргэнийг эрүүлжүүлэх байранд хүргэж, биеэ авч явах чадваргүй 513 иргэнийг ар гэр асран хамгаалагчид хүлээлгэн өгч, гудамж талбайд үйлдэгдсэн 60 гэмт хэргийг шуурхай илрүүлжээ.

Мөн тус цагдаагийн газраас эргүүлийн үйл ажиллагаанд орчин үеийн техник, технологийг нэвтрүүлэх, алба хаагчдын ажлын ачааллыг багасгах, зохион байгуулалтыг сайжруулах зорилгоор нийслэлийн хэмжээнд хэрэгжүүлэх “Эргүүл” дэд хөтөлбөрийг боловсруулан Нийслэлийн Иргэдийн төлөөлөгчдийн Тэргүүлэгчдийн 2017 оны 04 дүгээр сарын 18-ны өдрийн хурлаар хэлэлцүүлж, 62 дугаар тогтоолоор батлуулан ажиллаж байна.

2017 оныг “Иргэдийн оролцоотой эрх зүйн шинэтгэлийн жил” болгон зарласантай холбогдуулан нийслэлийн Засаг даргын нийт агентлаг, харьяа газрууд Сүхбаатарын талбайд нээлттэй хаалганы өдөрлөг зохион байгуулж байгаа билээ.

П.Н Шастины нэрэмжит улсын III төв эмнэлгийн үүдний хэсгийн 818 м.кв талбайн тохижилтын ажил дуусч, холбогдох албаныхан өнөөдөр албан ёсоор хүлээн авлаа. Тус арга хэмжээнд нийслэлийн Засаг дарга бөгөөд Улаанбаатар хотын Захирагч С.Батболд, Улаанбаатар хотын Ерөнхий менежер болон бусад албаныхан оролцов. Энэ үеэр хотын дарга С.Батболд “Би 14 хоногийн өмнө энэ хэсгийн тохижилтын ажилтай танилцаад явсан. Өнөөдөр бэлэн болоод нээлтийг хийж байгаадаа баяртай байна. Шастины нэрэмжит улсын III төв эмнэлэг бол нийслэлчүүд төдийгүй Монгол Улсын өнцөг булан бүрээс иргэд ирж үйлчлүүлдэг газар. Өнгөрсөн аравдцугаар сард авто машины зогсоолын асуудлыг шийдсэн. Өнөөдрийн энэ тохижилтын ажил 2017 оны хаврын хот тохижилтын хамгийн эхнийх нь учраас бид ийнхүү ач холбогдол өгч албан ёсоор нээж байгаа юм. 2017 онд эмнэлэг болон сургууль, цэцэрлэгийн гаднах тохижилтод анхаарч ажиллана. Бидний дараагийн тохижуулах газар бол Гэмтэл согог судлалын үндэсний төв, Сонгинохайрхан дүүргийн нэгдсэн эмнэлэг байх болно. Түүнчлэн X хороолол орчмын авто замын хойд талын талбайг авто машины зогсоол, явган хүний зам, ногоон байгууламж бүхий иж бүрнээр тохижуулах ажлыг эхлүүлсэн. Мөн энэ гудамж дагуу байрлах албан байгууллага, аж ахуйн нэгжүүдэд гаднах тохижилт, хаягжилтын нэгдсэн стандарт мөрдүүлнэ. Уг ажлыг ирэх зургаадугаар сарын 10-нд дуусгахаар төлөвлөн ажиллаж байгаа” гэв.

Улаанбаатар хотын Ерөнхий менежер Т.Гантөмөр “Явган хүний зам, ус зайлуулах шугам, гэрэлтүүлэг, авто машины зорчих хэсгүүдийг цогцоор нь шийдэж, тохижуулж байна. Энэ жил Улаанбаатар хотын ногоон байгууламжид цогц бодлого гарган ажиллаж байгаа. Ногоон байгууламжийг аль болох байгалийн шилмүүст, өндөр модоор сэлгүүлэн тарьж байгаа юм. Энхтайваны өргөн чөлөөнөөс Таван шар, Бага тойруу, Сансарын тойрог, Соёлын төв өргөө орчмын гудамж талбайг ийнхүү цогцоор нь тохижуулахын зэрэгцээ төвийн 6 дүүргийн нэг орон сууцыг сонгоод бичил тохижилтыг хийнэ” гэлээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

МАН-ын бага хурал маргааш болно. Хуралдаанаар 2017 оны Ерөнхийлөгчийн сонгуульд нэр дэвшигчээ тодруулан батламжлах юм.

Үндсэн хуулийн цэцийн хуралдаан маргааш болно. Хуралдаанаар Шүүгчийн эрх зүйн байдлын тухай хуулийн зарим заалт Үндсэн хууль зөрчсөн эсэхийг хэлэлцэнэ.

Монгол Улсын Ерөнхийлөгч Ц.Элбэгдорж Орхон аймгийн Эрдэнэт хотод ажиллаж байна.

Сурагчдын шатрын дэлхийн аварга шалгаруулах тэмцээн Румын улсын Яси хотноо дөрөвдүгээр сарын 21-30-ны өдрүүдэд боллоо. Тэмцээнд 42 орны 500 гаруй өсвөрийн шатарчид, 12 насны ангилалд 36 медалийн төлөө өрсөлдөхөд Монголын баг тамирчид гурван алт, гурван мөнгө, нэг хүрэл медаль хүртэж багаараа түрүүлсэн бол Узбекстан, Турк, Румын, Молдавын багууд удаах байрт оржээ. Дэлхийн аваргад эх орноо төлөөлөн оролцсон манай шатарчдаас 11 нас хүртэлх ангилалд Төрийн банкны элч тамирчин Д.Мөнхзул амжилтаа бататгаж, дэлхийн хос алтан медальтан болсон байна.
Оюуны спортыг дэмжигч Төрийн банк 2015 оноос эхлэн Д.Мөнхзулыг дэмжин ажиллаж байгаа юм. Энэ хугацаанд тэрбээр АНЭУ-д болсон Олон улсын тэмцээнээс алтан медаль, Тайландын Паттаяа аралд болсон Сурагчдын Дэлхийн аварга шалгаруулах тэмцээнээс мөнгөн медаль хүртэж байсан бол өнгөрсөн жил Монгол Улсын Өсвөрийн аварга, 2016 онд Ази тивийн хошой аварга болж байжээ.

Цэрэг-спортын “Дөл” цогцолбор тэмцээнийг Нийслэлийн Ерөнхий боловсролын сургуулийн ахлах ангийн сурагчдад цэрэг эх оронч үзэл, хүмүүжил олгох, эх орноороо бахархах үзлийг төлөвшүүлэх, тэдэнд бие бялдар, сэтгэл зүйн бэлтгэл, тэвчээр хатуужил олгох зорилгоор 2 үе шаттайгаар зохион байгууллаа.

Тэмцээний хоёрдугаар шатны шалгаруулалт 2017 оны 4 дүгээр сарын 29-ны өдөр Үндэсний батлан хамгаалахын их сургууль дээр зохион байгуулагдсан бөгөөд нэгдүгээр шатны шалгаруулалтад оролцсон нийслэлийн ерөнхий боловсролын 103 сургуулийн 2000 гаруй сурагчдаас дүүргээсээ шалгарсан дараахь 9-н багийн тамирчид оролцлоо. Үүнд:



- Баянгол дүүргийн 38 дугаар сургуулийн “Сүлд” баг

- Баянзүрх дүүргийн 68 дугаар сургуулийн “Дуулга” баг

- Сонгинохайрхан дүүргийн 124 дугаар сургуулийн “Цасны барс” баг

- Сүхбаатар дүүргийн 11 дүгээр сургуулийн “Цэгц-11” баг

- Хан-Уул дүүргийн 60 дугаар сургуулийн “Цэгц” баг

- Чингэлтэй дүүргийн 24 дүгээр сургуулийн “Хар сүлд” баг

- Багануур дүүргийн 66 дугаар сургуулийн “Соёмбо” баг

- Налайх дүүргийн Чандмань сургуулийн “Чандмань” баг

- Багахангай дүүргийн Багахангай цогцолбор сургуулийн “Ялалт” багууд дүүргээсээ шалгарч, нийслэлийн Засаг даргын баталсан удирдамжийн дагуу хурд хүч, тэсвэр хатуужил, авхаалж самбаагаа сорьсноос дараах багууд эхний байруудад шалгарлаа.



Тэргүүн байранд Сонгинохайрхан дүүргийн 124 дугаар сургуулийн “Цасны барс” баг

Дэд байранд Баянгол дүүргийн 38 дугаар сургуулийн “Сүлд” баг

Гутгаар байранд Чингэлтэй дүүргийн 24 дүгээр сургуулийн “Хар сүлд” баг

Тусгай байранд Сүхбаатар дүүргээс 11 дүгээр сургуулийн “Цэгц-11” багууд шалгарч, цом, өргөмжлөл, алт, мөнгө, хүрэл медалиар энгэрээ мялааж, мөнгөн шагналаар шагнууллаа гэж нийслэлийн ЗДТГ-ын Цэргийн штабаас мэдээлэв.

Нийслэлийн 9 дүүргийн хорооны Засаг дарга, хэсгийн ахлагч нарын “Хотын хөгжил-Хамтын хүч” зөвлөгөөн өнөөдөр боллоо. Зөвлөгөөнд. Монгол Улсын Засгийн газрын Хэрэг эрхлэх газрын дарга Ж.Мөнхбат, НИТХ-ын дарга Ц.Сандуй, Нийслэлийн Засаг дарга бөгөөд Улаанбаатар хотын Захирагч С.Батболд болон бусад албаныхан оролцсон юм.



“Хотын хөгжил-Хамтын хүч” зөвлөгөөнийг нээж НИТХ-ын дарга Ц.Сандуй “Нийслэлийн нутгийн захиргааны байгууллагын анхан шатны нэгжид ажиллан, нийслэл хотын хөгжлийн төлөө чин сэтгэлээр зүтгэж байгаа хорооны Засаг дарга, хэсгийн ахлагч та бүхэнд гүн талархал илэрхийлье. Улаанбаатар хот маань улсын нийслэлийн үүргээ чанд биелүүлж, иргэнээ дээдэлсэн хот төлөвлөлт, байгуулалт өрнүүлж, ДНБ-ий дийлэнх хувийг үйлдвэрлэж, хот бүрдүүлэгч салбаруудаа хөгжүүлсэн нь төрийн бодлогын үр дүн, иргэд, төрийн ажилтан бид бүхний хамтын бүтээл, зүй ёсны бахархал билээ. Нийслэлийн иргэдийн Төлөөлөгчдийн Хурал баталж, нийслэлийн Засаг дарга бөгөөд Улаанбаатар хотын захирагчийн хэрэгжүүлж буй “Аз жаргалтай хот” хөтөлбөрийн амин сүнс нь иргэн юм. Нийслэл, дүүрэг, хороо, хэсгийн ажилтнууд иргэддээ амалсанаа биелүүлж, хариуцлага сахилга батыг өндөржүүлж, төрийн үйлчилгээг чирэгдэлгүй хүргэхийн төлөө онцгой анхааран ажиллаж байна. Нийслэлийн МАН-ын сонгуулийн мөрийн хөтөлбөрт туссан “Хороо бүрт цэцэрлэг”, “Хороо бүрт төрийн үйлчилгээг хүргэх” ажлуудыг шат дараалан хэрэгжүүлэхэд хэсгийн ахлагч та бүхний хүчин чармайлт их юм.

Өнгөрсөн хугацаанд нийслэлийн хороодыг бэхжүүлэх, нэгдсэн цогцолбор байртай болгох, техник хэрэгслээр хангах, хороонд ажиллаж буй ажилтнуудыг чадавхжуулах зэрэг арга хэмжээ авч “Хороо” хөтөлбөрийг хэрэгжүүлж, иргэдэд үйлчлэх төрийн үйлчилгээний хүртээмжийг сайжруулж ажиллалаа. Өнөөдөр нийслэлийн 152 хороонд 1400 гаруй хэсгийн ахлагч ажиллаж байна.

Нийслэл хотын тохижилт, ногоон байгууламжийг нэмэгдүүлэх, төрийн үйлчилгээг иргэдэд хүргэх, иргэдийн оролцоо, эрэлт, саналыг нийслэл, дүүргийн бодлого, шийдвэрт тусгуулахад анхан шатны нэгжид ажиллаж буй та бүхний санаачлага, үүрэг, оролцоо ихээхэн чухал байна.

Улаанбаатар хотын иргэдийг хоггүй цэвэр орчинд амьдруулах, замын халтиргаа гулгаанаас сэргийлэх, зам талбай, гудамжийг гэрэлтүүлэх зэрэг уламжлалт ажил төдийгүй, хотоо хөгжүүлэх ажилд та бидний хамтын хүч, чармайлт хамгийн чухал.

Хотын хөгжлийг хамтын хүчээр бүтээцгээе. Сайн үйлсийн төлөө бүгдээрээ хамтдаа зүтгэцгээе” хэмээв.



Үүний дараагаар нийслэлийн Засаг дарга бөгөөд Улаанбаатар хотын Захирагч С.Батболд “Улаанбаатар хотын хөгжлийн чиг хандлага” сэдвээр илтгэл тавилаа. Тэрбээр “Нийслэл Улаанбаатар хотын нэг сая 360 мянган иргэнтэй хамгийн ойр ажилладаг хүмүүс бол хороодын Засаг дарга, хэсгийн ахлагч нар юм. Та бүхэнтэйгээ өнөөдөр Засгийн газрын гишүүн болон холбогдох албан тушаалтнуудын хамт уулзаж байгаадаа баяртай байна. Би та бүхэнд нийслэлийн хөгжлийн чиг хандлагын талаар товчхон мэдээлэл өгөх болно. Учир нь, НИТХ-аас баталсан нийслэлийн Засаг даргын мөрийн хөтөлбөрийг хэрэгжүүлэх хамгийн анхан шатны хүмүүс бол та бүхэн юм. Бид “Аз жаргалтай хот” үйл ажиллагааны хөтөлбөрийн хүрээнд нийслэл хотоо иргэнээ дээдэлсэн, өндөр технологид суурилсан үйлдвэрлэл, бие даасан эдийн засагтай, бизнест ээлтэй, ногоон хөгжлийн үзэл баримтлал бүхий олон улсад өрсөлдөх чадвартай, Монгол үндэсний хэв маяг, өвөрмөц дүр төрхтэй, Зүүн хойд Азийн санхүү, бизнес, аялал жуулчлалын төв хот болгон хөгжүүлэхээр зорин ажиллаж байна. Засаг дарга миний бие алслагдсан 3 дүүргийн нөхцөл байдалтай газар дээр нь очиж танилцсан. Ойрын хугацаанд төвийн 6 дүүрэгт ажиллахаар төлөвлөсөн байгаа. Бид бүхэн энэ онд нийслэлийн эрх зүйн байдлыг тодорхой болгох, үр нөлөө, хүртээмжтэй хотын засаглалыг бэхжүүлэх нийслэлээс үзүүлж байгаа төрийн үйлчилгээний чанар хүртээмжийг дээшлүүлэх, шийдвэр гаргах ажиллагаанд олон нийтийн ажиллагааг нэмэгдүүлэх зорилгоор 2017 оныг “Иргэдийн оролцоотой эрх зүйн шинэтгэлийн жил” болгон зарласан. Энэ жил бид нийт 35 багц ажил хэрэгжүүлэхээр төлөвлөсөн.

Тухайлбал, эдийн засгийн өсөлтийг хангахын тулд хотын засаглалын хүрээнд бизнес эрхлэхэд таатай эрх зүйн орчныг бүрдүүлж, хөрөнгө оруулалтын бодлогыг хэрэгжүүлэхэд төр, хувийн хэвшлийн түншлэлийн зарчимд тулгуурлан, санхүүжилтийн шинэлэг тогтолцоог нэвтрүүлнэ.

Улаанбаатар хотыг 2020 он хүртэл хөгжүүлэх ерөнхий төлөвлөгөө, 2030 он хүртэлх хөгжлийн чиг хандлагын дагуу нийслэлийн ирээдүйн хөгжлийг хангасан дэд бүтцийг сайжруулж, иргэдийн ажиллаж амьдрах таатай орчныг бүрдүүлэхэд хот байгуулалтын үйл ажиллагааг чиглүүлж ажиллана.

Улаанбаатарын бүсийн түвшинд хэт төвлөрлийг сааруулахаар үйлдвэр, худалдаа үйлчилгээ дагнан тэнцвэртэй хөгжсөн, оршин суугчдын амьдралын аятай орчин бүрдүүлсэн дагуул хаяа хот, тосгод, шинэ суурьшлын бүсүүдийг эрчимтэй хөгжүүлнэ.

Тээврийн салбарын олон улсын хамтын ажиллагааг хөгжүүлж, бүс нутгийн дэд бүтэц, тээврийн интеграцид нэгдэх замаар Улаанбаатар хотын ачаа тээврийн нэгдсэн ложистик төвүүдийг хотын баруун, зүүн хэсэгт байгуулна.

Авто замын хөдөлгөөний түгжрэлийг багасгах, нийтийн тээврийн үйлчилгээний чанар хүртээмжийг сайжруулах, иргэдийн аюулгүй, тав тухтай зорчих нөхцөлийг бүрдүүлэхийн тулд Азийн хөгжлийн банкны 274,4 сая ам долларын хөнгөлөлттэй зээлээр Нийтийн тээврийн үйлчилгээнд тусгай замын автобусыг Энхтайваны өргөн чөлөө, III, IV хороолол – Их тойруу, 7 буудал – Нисэх чиглэлд нэвтрүүлэх BRT төслийг эхлүүлнэ.

Төв цэвэрлэх байгууламжид технологийн шинэчлэлийг хийж, 250 мянган м3 хүчин чадалтай цэвэрлэх байгууламжийг барьж саарал усыг цахилгаан станцад хэрэглэнэ. Азийн хөгжлийн банкны 13.7 тэрбум төгрөгийн санхүүжилтээр Зүүн хойд бүсийн усан сангаас Баруун бүсийн насос станц хүртэлх 600-900мм 7,2 км цэвэр, 8.6 км бохир усны шугамыг барьж ашиглалтад оруулна.

Хотын ус хангамжийн нөөцийг нэмэгдүүлэх “Туул усан цогцолбор” төсөл хэрэгжүүлж, цэвэр усны доод эх үүсвэрийн нөөцийг шинэчлэн тогтоож хотын усан хангамжийн эх үүсвэрүүдийг нэмэгдүүлнэ” хэмээн онцоллоо.



Түүнчлэн нийслэлийн “ Шилдэг хороо” шалгаруулах уралдааныг нийт 152 хороонд эхлүүлж буй талаар НЗДТГ-ын дарга М.Отгонбаяр танилцуулсан юм. Тэрбээр “Засаг захиргааны үндсэн нэгжид ажиллаж, төр иргэдийг холбогч гүүр нь болж, нийслэлийн нутгийн захиргааны байгууллагаас хэрэгжүүлж байгаа бодлого, шийдвэрийг айл өрх бүрт хүргэж, түүнийг сурталчлан таниулахын зэрэгцээ, төрийн үйлчилгээний чанар хүртээмжийг нэмэгдүүлэхэд өөрийн оюун ухаан, мэдлэг чадвараа дайчлан, ажиллаж байгаа та бүхэнтэй хамтран ажиллаж байгаадаа таатай байна. Сайн засаглалыг бэхжүүлэгч анхдагч үндэс суурь бол хүнлэг, чадварлаг, ажил хэрэгч хэсгийн ахлагч, мөн хариуцлагатай төрийн үйлчилгээний эх үндэс нь чадварлаг, мэргэшсэн албан хаагч бүхий хороо байдаг билээ. Цаашид хороодын хөгжлийг бодит хөрөнгө оруулалтаас гадна, төрийн албаны өндөр ёс зүйтэй, мэдлэг боловсрол, ур чадвартай хорооны ажилтан, хэсгийн ахлагч нараар тодорхойлох он жилүүдэд бид ажиллаж, амьдарч байна. Өнөөдөр нийслэлийн 152 хороодын Засаг дарга нарын 50 хувь нь багш, инженер, эрх зүйч, эдийн засаг мэргэжилтэй, 13 хувь нь 6-аас дээш жил хорооны Засаг даргаар ажилласан, дунджаар 43 настай байгаа бол хороодын 1479 хэсгийн ахлагч нарын 65 хувь нь дээд, бүрэн дунд боловсролтой, 19 хувь нь 6-аас дээш жил ажилласан, дундаж нас 45 байгаа нь 2012 онтой харьцуулахад 6 насаар залуужсан байна.

Иргэдийн тасралтгүй өсөн нэмэгдэж байгаа хэрэгцээ, оролцоог хангахуйц төрийн үйлчилгээг хүргэхэд чадварлаг, мэргэшсэн, өндөр чадавхтай төрийн албан хаагчдыг бэлтгэх шаардлагатай болжээ. Тиймээс энэхүү ажлын эхлэл болгон хороодын ажилтан, хэсгийн ахлагч нарын ур чадварыг дээшлүүлэх, сургалтад хамруулах хөтөлбөрийг боловсруулан Швейцарын хөгжлийн агентлагийн санхүүжилтээр Азийн сангийн “Хотын засаглал” төслийн хүрээнд хэрэгжүүлж байна. Энэхүү хөтөлбөрийн дагуу 2017 оны 04 сарын 26 өдрөөс нийслэлийн 152 хорооны 1479 хэсгийн ахлагч нарт зориулсан сургалт эхлүүлээд байна” гэлээ.

Түүнчлэн уг арга хэмжээий үеэр хичээл зүтгэл, ажил хөдөлмөрөөрөө бусдыгаа манлайлан ажилласан хэсгийн ахлагч, хорооны дарга нарт Улаанбаатар хотын хүндэт иргэн, нийслэлийн Тэргүүний ажилтан, Нийслэлийн Засаг даргын Жуух бичиг зэргээр шагнаж урамшууллаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Ерөнхийлөгчийн Тамгын газрын дарга асан П.Цагаан өнөөдөр Шастины нэрэмжит III төв эмнэлэгт түргэн тусламжийн машин хүлээлгэн өглөө. Автомашиныг Япон улсад үйлдвэрлэж,

Нийл Сакер: Ирэх 2-3 долоо хоногт багтаагаад ОУВС-ийн хөтөлбөрийг батална

Г.Уянга: Тэмцэл их өргөжиж байна

Б.Жаргалсайхан Ерөнхийлөгчид нэр дэвшихээр бүртгүүллээ

Өчигдөр буюу 5-р сарын 1-ний өдрөөс 5-р сарын 2-ны өдрийн 05:00 цагийн хооронд нийслэлийн хэмжээнд нийт 78 гэмт хэрэг зам тээврийн ослын 350 хэрэг бүртгэгджээ. Эдгээрээс айлын гэр сууц шатсан гэх дуудлага мэдээлэл дөрөв иржээ.