-
2016 оны 7 сарын 05
Монгол Улсын Ерөнхийлөгч Ц.Элбэгдорж УИХ-ын даргаар сонгогдсон М.Энхболдыг өнөөдөр хүлээн авч уулзан ажлын амжилт хүсэн ерөөлөө.
-
2016 оны 7 сарын 05
УИХ дахь МАН-ын бүлгийн анхдугаар хуралдаанаар бүлгийн даргаар Д.Хаянхярвааг 100 хувийн саналаар дэмжлээ. Мөн УИХ-ын дэд даргад Ц.Нямдоржийг нэр дэвшүүллээ.
Khajidsuren Nyamsuren’s photo.
Khajidsuren Nyamsuren’s photo.
-
2016 оны 7 сарын 05
Хуралдаанаар С.Эрдэнэ гишүүнийг УИХ дахь АН-ын бүлгийн даргаар сонгосон байна. УИХ дахь АН-ын бүлэг нь есөн гишүүний бүрэлдэхүүнтэйгээр парламентад ажиллах юм.
-
2016 оны 7 сарын 05
Хуралдаанаар С.Эрдэнэ гишүүнийг УИХ дахь АН-ын бүлгийн даргаар сонгосон байна. УИХ дахь АН-ын бүлэг нь есөн гишүүний бүрэлдэхүүнтэйгээр парламентад ажиллах юм.
-
2016 оны 7 сарын 05
Монгол Улсын Ерөнхийлөгч Цахиагийн Элбэгдорж бүрэн эрхийнхээ хүрээнд Монгол Улсын Үндсэн хуулийн Хорин долдугаар зүйлийн 4, Монгол Улсын Ерөнхийлөгчийн тухай хуулийн 9 дүгээр зүйлийн 1, 12 дугаар зүйлийн 1, Монгол Улсын Их Хурлын тухай хуулийн 14 дүгээр зүйлийн 1, 2 дахь хэсгийг тус тус үндэслэн зарлиг гаргаж, товлон зарласны дагуу Монгол Улсын Их Хурлын долоо дахь удаагийн сонгуулийн Анхдугаар чуулган өнөөдөр /2016.07.05.Мягмар гараг/ 11.00 цагт эхэллээ.
Анхдугаар чуулганд Улсын Их Хурлын долоо дахь удаагийн сонгуулиар сонгогчдын итгэл хүлээн Улсын Их Хурлын гишүүнээр шинээр сонгогдсон 76 гишүүн хүрэлцэн ирж чуулганы нэгдсэн хуралдааны танхимд суудлаа эзэлсэн байв. Энэ удаагийн сонгуулиар МАН-аас 65, АН-аас 9, МАХН-аас 1, бие даан нэр дэвшигч 1 гишүүн сонгогчдын олонхын санал авч ялалт байгуулсан тул тэдэнд Сонгуулийн ерөнхий хороо гишүүний түр үнэмлэх олгосон юм.
Улсын Их Хурлын долоо дахь удаагийн сонгуулийн Анхдугаар чуулганыг Монгол Улсын Ерөнхийлөгч Цахиагийн Элбэгдорж нээв. Тэрбээр хэлсэн үгэндээ, Монголын ард түмэн сонголтоо хийлээ. Энэ бол дээд шийдвэр. Одоо түүнийг хэрэгжүүлэх мөч эхэлж байна. Сонгуулийн шат шатны байгууллага сонгуулийн санал хураалтын дүнгээ нэгтгэн Сонгуулийн ерөнхий хороо Улсын Их Хуралд сонгогдсон гишүүдийн нэрсийг надад өргөн барьсан. Сонгуулийн ерөнхий хорооноос өөрөөр сонгогдсон гишүүний асуудлаар ямар нэг мэдээлэл ирээгүй байна.
Энэ удаагийн сонгуулийг Сонгуулийн ерөнхий хороо хуулийн хүрээнд эмх цэгцтэй сайн зохион байгууллаа. Иргэд сонгогчид маань сонгуульдаа идэвхтэй оролцлоо. Сонгуулийн ирц анх удаа өмнөхөөсөө давсан дүнтэй гарсан байна. Мэдээлэл технологийн автомат машин үр дүнгээ өглөө. Сонгуулийн дүнг иргэд олон нийтэд ил тод зарлан мэдээллээ гээд сонгуульд олонх болсон улс төрийн нам иргэдэд сонгогчдодоо өгсөн амлалтаа шударгаар биелүүлж ажиллах, Улсын Их Хурал хариуцлагын хуулийг хэлэлцэн батлахаас ажлаа эхлээсэй гэдгийг онцлов. Мөн Засгийн газрыг ард түмэндээ өгсөн амлалтын дагуу хариуцлагатай, мэргэжлийн баг бүрдүүлэн ажиллах, төрийн албыг хариуцлагатай, тогтвортой ажиллуулах, өмнөх Засгийн газрын хийж хэрэгжүүлсэн үр дүнтэй сайн ажлыг үргэлжлүүлж, төрийн бодлогын залгамж чанарыг хадгалж ажиллахыг хүслээ.
Ерөнхийлөгч эцэст нь түүхт төрийн дээд эрх мэдлийг хэрэгжүүлж ажиллах түшээ болно гэдэг эрхэм нэр төр. Үүнийг мөрдөж ажиллаарай. Улсын Их Хурлын гишүүнээр сонгогдсон Та бүхний бүрэн эрхийг хэрэгжүүлж ажиллах нь Монголын ард түмний эрх ашигт нийцнэ гэж үзэж байна гээд Улсын Их Хурлын долоо дахь удаагийн сонгуулийн Анхдугаар чуулганыг нээснийг мэдэгдэв. Ерөнхийлөгч Улсын Их Хурлын долоо дахь удаагийн сонгуулийн Анхдугаар чуулганыг нээснийг мэдэгдэхэд хөгжимд Төрийн дуулал эгшиглэж, шинээр сонгогдсон гишүүд болон Анхдугаар чуулганы нээлтийн ажиллагаанд оролцсон зочид төлөөлөгчид, албаны хүмүүс босч хүндэтгэлээ.
Дараа нь Сонгуулийн ерөнхий хорооны дарга Ч.Содномцэрэн Улсын Их Хурлын долоо дахь удаагийн сонгуулийн дүн, сонгогдсон гишүүдийн бүрэн эрхийг зөвшөөрөх тухай илтгэл тавилаа. Тэрбээр илтгэлдээ, Сонгуулийн ерөнхий хороо хуульд заасан бүрэн эрхийнхээ хүрээнд Монгол Улсын Их Хурлын 2016 оны ээлжит сонгуулийг долоо дахь удаагаа зохион байгуулж, сонгуулийн дүнг 2016 оны 06 дугаар сарын 30-ны өдрийн хуралдаанаараа хэлэлцэж Монгол Улсын Ерөнхийлөгчид айлтган нийтэд мэдээлсэн. Улсын Их Хурлын 2016 оны ээлжит сонгуулийг хууль эрх зүйн шинэ орчинд сонгуулийн олонхын тогтолцоогоор явууллаа. Энэ удаагийн сонгуулийг нутаг дэвсгэрийн хэмжээнд аймаг, нийслэлийн 22 сонгуулийн хороо, сум, дүүргийн 339 сонгуулийн хороо, 1998 хэсгийн санал авах байр, мэдээллийн технологийн 31 баг зохион байгуулж, тэдгээрт 20 мянга гаруй төрийн жинхэнэ болон үйлчилгээний албан хаагч ажиллалаа. Сонгуулийн үйл явцыг дэлхийн 43 улс орон болон олон улсын байгууллагаас 436 ажиглагч, сонгуульд оролцож буй улс төрийн нам, эвсэл, бие даан нэр дэвшигчдээс томилогдсон 100 мянга гаруй ажиглагчид санал авах байруудад ажиллалаа.
Улсын Их Хурлын 2016 оны ээлжит сонгууль анх удаа Аймаг, нийслэлийн ИТХ-ын сонгуультай хамт явагдсан, сонгуулийн автоматжуулсан системийг бүрэн утгаар нь төгс хэрэгжүүлсэн, хөгжлийн бэрхшээлтэй иргэдийнхээ сонгор эрхийг хангахад илүү анхаарсан, саналын хуудас нь өндөр нууцлалтай, бар кодтой, брайль үсгийн хавтастай зэрэг олон шинэчлэлийг хэрэгжүүлсэн онцлог сонгууль болсныг онцлов.
Улсын Их Хурлын болон Аймаг, нийслэлийн ИТХ-ын энэ удаагийн сонгуульд Монгол Улсын сонгуулийн эрх бүхий 1 911 047 иргэн саналаа өгөхөөр нэрийн жагсаалтад бүртгэгдсэнээс 1 406 123 нь буюу 73.58 хувь нь сонгуульд оролцож саналаа өглөө. Улсын Их Хурлын энэ удаагийн сонгуульд улс төрийн 12 нам, 3 эвсэл оролцохоо илэрхийлж, Сонгуулийн ерөнхий хороонд бүртгүүлэн батламж авсан. Улсын Их Хурлын сонгуульд нэр дэвшигчээр 498 хүн бүртгүүлж үнэмлэх авсанаас 14 хувь нь буюу 69 нь бие даан нэр дэвшигч, нийт нэр дэвшигчидийн 26 хувь нь буюу 129 нь эмэгтэй нэр дэвшигч байлаа.
Сонгуулийн ерөнхий хороо Сонгуулийн тухай хуулийн 133 дугаар зүйлийн 133.2 дахь хэсэгт заасны дагуу Монгол Улсын Их Хурлын 2016 оны ээлжит сонгуулийн дүнг 2016 оны 06 дугаар сарын 30-ны өдрийн хуралдаанаараа хэлэлцэж тойрогт нэр дэвшигчдээс хамгийн олон санал авсан 76 нэр дэвшигчийг УИХ-ын гишүүнээр сонгогдсонд тооцон тогтоол гаргаж түр үнэмлэх олголоо.
Улсын Их Хурлын гишүүнээр Монгол Ардын Намаас 65, Ардчилсан Намаас 9, МАХН-аас нэг, бие даан нэр дэвшигч нэг хүн тус тус сонгогдлоо. Улсын Их Хуралд сонгогдсон гишүүдийн 13 нь буюу 17.1 хувь нь эмэгтэйчүүд байна. Шинээр сонгогдсон Улсын Их Хурлын гишүүдийн 21 нь эрх зүйч, 25 нь эдийн засагч, 11 нь инженер, нэг нь агрономич, 18 нь урлаг, спорт, улс төр, нийгмийн ухааны мэргэжлийн хүмүүс байна.
Монгол Улсын Их Хурлын 2016 оны ээлжит сонгууль нь Монгол Улсын Үндсэн хууль, Сонгуулийн тухай хууль болон бусад хууль тогтоомжид бүрэн нийцэж хуулийн дагуу хүчин төгөлдөр болсон тул Улсын Их Хурлын гишүүнээр сонгогдож түр үнэмлэх авсан 76 гишүүний тангарагийг нь өргүүлж бүрэн эрхийг хүлээн зөвшөөрөх нь зүйтэй гэж Монгол Улсын Сонгуулийн ерөнхий хороо үзэж байна гэлээ.
Сонгуулийн ерөнхий хорооны даргын илтгэлтэй холбогдуулан шинээр сонгогдсон гишүүн О.Баасанхүү, Л.Болд, Ц.Нямдорж, С.Эрдэнэ, Ж.Батзандан, Н.Номтойбаяр, Б.Бат-Эрдэнэ, С.Бямбацогт, Ж.Мөнхбат, Я.Содбаатар нар асуулт асууж хариулт авав.
Ингээд шинээр сонгогдсон гишүүдийн тангараг өргөх ёслолын ажиллагаа эхэлж, энэ удаагийн Улсын Их Хурлын хамгийн ахмад гишүүн Ч.Улаан индрээс гишүүний тангаргыг уншихад бусад гишүүд дагаж уншив. Дараа нь Монгол Улсын Ерөнхийлөгч Ц.Элбэгдорж шинээр сонгогдсон Улсын Их Хурлын гишүүдийн нэрсийг цагаан толгойн үсгийн дарааллаар хоёр хоёроор нь дуудахад гишүүд Төрийн далбаанд хүндэтгэл үзүүлэн адис авч, гишүүний тангаргын бичигт гарын үсэг зурж энгэрийн тэмдгээ гардаж авлаа гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
-
2016 оны 7 сарын 05
-Монгол Улсын Их Хурлын долоо дахь удаагийн сонгуулийн Анхдугаар чуулганы хуралдаанд УИХ-ын дарга Миеэгомбын Энхболдын хэлсэн үг-
Эрхэм хүндэт Монгол Улсын Ерөнхийлөгч өө,
УИХ-ын эрхэм гишүүд ээ,
Ерөнхий сайд, Засгийн газрын гишүүд ээ, Хүндэт зочид оо,
Та бүхнийхээ энэ өдрийн амар амгаланг айлтган мэндчилье.
Монгол Улсын Үндсэн хуульд заасан бүрэн эрхээ хэрэгжүүлж, УИХ-ын болон аймаг, нийслэлийн ИТХ-ын сонгуульд идэвхтэй оролцож зөв мэргэн сонголт хийсэн туурга тусгаар Монгол орныхоо бүрэн эрхэт ард түмэндээ гүн талархал илэрхийлье.
Улсын Их Хурлын сонгууль хуульд заасан журмын дагуу зохих ёсоор зохион байгуулагдсан гэж үзэж, Монгол Улсын Ерөнхийлөгч УИХ-ын Анхдугаар чуулганыг зарлан хуралдууллаа.
УИХ-ын ээлжит сонгуульд сонгогч түмнийхээ итгэлийг хүлээж, төрийн сүлдэндээ сүслэн гишүүний тангаргаа өргөсөн УИХ-ын эрхэм гишүүддээ баяр хүргэе.
Өнөөдөр УИХ-ын 76 гишүүний бүрэн эрхийг хүлээн зөвшөөрч, гишүүд тангаргаа өргөснөөр төрийн эрх барих дээд байгууллага УИХ бүрэн эрхээ хэрэгжүүлэх бүтэн бүрэлдэхүүнтэй боллоо.
УИХ-ын даргын өндөр хүндтэй албан тушаалд нэрийг минь дэвшүүлсэн МАН, сонгож батламжилсан УИХ-ын эрхэм гишүүддээ Талархал илэрхийлье.
Монгол Улсын Их Хурал үйл ажиллагаандаа ардчилсан ёс, шударга зарчим, эрх чөлөө, тэгш байдал, үндэсний эв нэгдлийг хангах, хууль дээдлэх зэрэг Үндсэн хуульд заасан төрийн үйл ажиллагааны үндсэн зарчмуудыг чанд баримтлан ажиллах болно.
УИХ-ын гишүүний тангаргаа өргөсөн энэ мөчид УИХ-аас нэн тэргүүнд хэлэлцэн шийдвэрлэх асуудлууд байгаад Та бүхний анхаарлыг хандуулах нь зүйтэй гэж үзлээ.
Бид мэргэжлийн Засгийн газрыг байгуулж нэн даруй үйл ажиллагааг нь эхлүүлэх шаардлагатай байна.
Салбарынхаа үйл ажиллагааг бүхий л талаас нь мэддэг, мэргэшсэн төрийн зүтгэлтнээр Засгийн газрыг бүрдүүлж, төр, засгийн тогтвортой ажиллах нөхцөлийг хангана.
Улс орноо өнөөгийн хямралт байдлаас гаргахын тулд шинээр бүрэлдэх Засгийн газар богино хугацаанд эдийн засгийг тогтворжуулах тусгай хөтөлбөр боловсруулан УИХ-аар батлуулах хэрэгтэй.
Хуулийн хугацаанд батлах ёстой зарим асуудал өмнөх УИХ-ын үед шийдвэрлэгдэж чадалгүй үлдсэн байна.
Тухайлбал, 2017 оны төсвийн хүрээний мэдэгдэл, 2018, 2019 оны төсвийн хүрээний төсөөлөл батлагдаагүй.
Энэ оны төсөвт яаралтай тодотгол хийх шаардлага ч тулгарч байна.
Наадмын дараа намар гэдэг. Шинээр байгуулагдах Засгийн газар, улс орны өвөлжилтийн бэлтгэлийг хангах Үндэсний их баяр наадам болон АСЕМ-ийн дээд хэмжээний чуулганыг өндөр хэмжээнд зохион байгуулах, даян дэлхийн энх тайван найрамдлын бэлэг тэмдэг болсон Олимпийн наадамд оролцох багийн бэлтгэлийг хангах зэрэгт онцгой анхаарч ажиллах хэрэгтэй байна.
Эрхэм хүндэт ард иргэд ээ!
Манай намаас нэр дэвшигчдийг багаар нь сонгож, УИХ-ын болон аймаг, нийслэлийн ИТХ-д олонхи болгож, өндөр итгэл, өргөн хариуцлага хүлээлгэсэнд сонгогч түмэндээ иалархал илэрхийлье.
Бид төрийн өндөр ёс зүйтэй, хариуцлагатай, цэгц шударга, эрч хүчтэй олонхи байх болно.
Бид намынхаа сонгуулийн мөрийн хөтөлбөрт үндэслэн ирэх 4 жилийн Засгийн газрын үйл ажиллагааны хөтөлбөрийг баталж, бүрэн дүүрэн хэрэгжүүлнэ.
Сөхөрсөн эдийн засгаа хөл дээр нь босгож, дундуур бүхнээ дүүргэн, дутуу бүхнийг бүтээж, айл өрх бүрийн амьжиргааг дээшлүүлэхийн төлөө бүхий л хүчээ дайчлан хичээнгүйлэн зүтгэх болно.
Монгол түмний минь сүлд нь гийсэн хийморь дээшээ, сүүн цагаан заяа нь өөдөө байх болтугай!
ТӨРИЙН НУРУУ ТӨВШИН
ТҮМЭН ОЛОН АМГАЛАН БАЙГ
2016.07.05
-
2016 оны 7 сарын 05
УИХ-ын шинэ гишүүд тангаргаа өргөж дууслаа дараа УИХ-ын 7 дахь удаагийн сонгуулийн Анхдугаар чуулганаар УИХ-ын даргад МАН-ын дарга М.Энхболдыг нэр дэвшүүлэх асуудлыг хэлэлцээд 86.8 хувь нь дэмжлээ. Ингэснээр ирэх 4 жилд шинэ парламентыг М.Энхболд ахалж ажиллахаар болов.
МАН энэ удаагийн сонгуулиар 65 суудал буюу олонх болсон тул УИХ-ын даргад нэр дэвшүүлэх эрхтэй болсон.
-
2016 оны 7 сарын 05
Шинэ гишүүд тангараг өргөж байна
-
2016 оны 7 сарын 05
Саналын хуудсны тоо зөрсөн, саналын хуудсанд илүү хуудас орсон зүйл байхгүй
-
2016 оны 7 сарын 05
Ерөнхийлөгчийн хамгаалагчид МАХН-ын дарга Н.Энхбаярыг Ерөнхийлөгчтэй уулзуулахгүй хэмээн дотогш нэвтрүүлэхээс татгалзлаа.
-
2016 оны 7 сарын 05
УИХ-ын долоо дахь удаагийн анхдугаар чуулган нээлтээ хийлээ. Анхдугаар чуулганыг Монгол Улсын Ерөнхий Ц.Элбэгдорж үг хэлж нээлээ. Монгол Улсын Ерөнхийлөгч Ц.Элбэгдорж анхдугаар чуулганыг нээсэн үгэндээ “Монголын ард түмэн сонголтоо хийлээ. Энэ бол дээд шийдвэр. СЕХ УИХ-д сонгогдсон гэсэн гишүүдийн нэрсийг надад өргөн барьсан. Иймээс УИХ-ын анхдугаар чуулган хуралдуулахад бэлэн боллоо. УИХ-ын шинэ гишүүдэд хандаж хэлэхэд Хариуцлагын тухай хуулийг хэлэлцэх, мэргэжлийн Засгийн газар байгуулах, иргэдийн талархал хүлээж байгаа ажлуудын тасалдалгүй хөгжүүлэх, Монгол Улсын нээлттэй, тууштай төрийн бодлогын залгамж чанарыг хадгалж ажиллах хэрэгтэй” гэлээ.
Анхдугаар чуулганы хуралдаанд СЕХ-ны дарга Ч.Содномцэрэн сонгуулийн үйл ажиллагааны үр дүнг танилцуулж, УИХ-ын шинэ гишүүдийн бүрэн эрхийг хүлээн хүлээн зөвшөөрөх ёстой гэж Сонгуулийн Ерөнхий хороо үзэж байгаагаа илэрхийллээ. Дараагаар нь СЕХ гишүүдийн сонирхсон асуултад хариулж байна.
-
2016 оны 7 сарын 05
ИХ-ын 2016 оны сонгуульд Ардын нам 65 суудал, Ардчилсан нам 9, МАХН нэг, бие даагч С.Жавхлан нар ялалт байгуулсан. Ерөнхийлөгчийн зарлигаар өнөөдөр анхдугаар чуулган нээлтээ хийж, шинэ парламент тангараг өргөж байна.
-
2016 оны 7 сарын 05
МАН-ын Бага хурал маргааш хуралдана. Хурлаар Ерөнхий сайдад нэр дэвшигчийг тодруулна. Намын дарга УИХ-ын дарга болох тул Ерөнхий сайдыг УИХ-ыгн гишүүд дотроосоо томилох нь зөв гэдэг дээр МАН-ынхан тохирчээ. Эх сурвалжийн мэдээлснээр Ерөнхий сайдад Сангийн сайд асан Ж.Эрдэнэбатыг нэр дэвшүүлэх бололтой. Харин У.Хүрэлсүхийг шадар сайдаар тоилох бололтой.
-
2016 оны 7 сарын 05
МАН-ын Удирдах зөвлөл дөнгөж сая хуралдаж дууслаа. Удирдах зөвлөлөөс УИХ-ын даргад М.Энхболдыг, УИХ-ын дэд даргаар Ц.Нямдоржийг, бүлгийн даргаар Д.Хаянхярваа нарын нэрийг дэвшүүлэхээр эцэслэн тохирсон байна.
-
2016 оны 7 сарын 05
МАН-ын Удирдах зөвлөл яг одоо хуралдаж байна. Уг хуралдаанаар УИХ-ын даргаар хэнийг нэр дэвшүүлж томилуулах тухай хэлэлцэж байгаа юм.
Монгол Улсын Ерөнхийлөгч зарлиг гаргаж, өнөөдөр 11.00 цагт УИХ-ын анхдугаар чуулганыг товлосон. Анхдугаар чуулганаар шинэ гишүүд тангараг өргөнө, мөн УИХ-ын даргыг томилох юм.
-
2016 оны 7 сарын 05
АН-ын дарга З.Энхболд, МАХН-ын дарга Н.Энхбаяр нар мэдээлэл хийлээ. АН-ын дарга З.Энхболд сонгуулийн хуулийг зөрчсөн дөрвөн асуудлыг хууль хүчний байгууллагаар шалгагдсаны дараа анхдугаар чуулганыг хуралдуулах ёстой гэдэг байр, суурийг илэрхийллээ. Өнөөдөр яарч, сандран хуралдах шаардлагагүй. Тэрбээр уг мэдэгдлийн дараа Ерөнхийлөгчтэй уулзаж анхдугаар чуулганыг хойшлуулах хүсэлтийг өргөн барина гэв. Түүний шалгуулах ёстой гэсэн дөрвөн асуудлыг энд дарж уншина уу.
Харин МАХН-ын дарга Н.Энхбаяр “Сонгуулийг ингэж луйвардаж болохгүй. Ард түмэн Ардчилсан намд шүүмжлэлтэй хандаж болох ч ийм үр дүн гарна гэж байхгүй шүү дээ. МАХН ялагдсан байж болно. Гэхдээ луйврын шинжтэй асуудлууд их байна. Чуулганыг зарлахаас өмнө луйврын асуудлыг шийдэж, шалгах ёстой. Ерөнхийлөгч ийм луйвруудыг дэмжээд анхдугаар чуулганыг хуралдуулах захирамж гаргаж байгаа бол өөрөө энэ асуудлыг зохион байгуулсан гэсэн үг. Хэн ялах нь хамаагүй шударгаар л ял” гэлээ.
Т.Энхэлээ
-
2016 оны 7 сарын 05
АСЕМ-ын уулзалт болоход хэдхэн хоногийн хугацаа үлдээд байна. Монгол Улсын Ерөнхийлөгч Ц.Элбэгдорж өнгөрсөн гуравдугаар сарын 1-нийг “АСЕМ”-ийн өдөр болгон зарлаж, улс даяар тэмдэглэн өнгөрүүлэхээр шийдвэрлэсэнтэй холбоотойгоор АСЕМ-ын дээд түвшний чуулга уулзалтын талаар олон нийтэд зориулж илтгэл тавьж байсан байна билээ. Тэгвэл Ерөнхийлөгч АСЕМ-ын талаар илтгэлдээ юуг онцлож байсныг эргэн 24 баримтаар хүргэж байна.
-
2016 оны 7 сарын 05
УИХ-ын анхдугаар чуулганыг маргааш буюу долдугаар сарын 5-ний 11.00 цагт хуралдуулах зарлигийг Монгол Улсын Ерөнхийлөгч Ц.Элбэгдорж өнгөрсөн долоо хоногт гаргасан.
Анхдугаар чуулганаар түр үнэмлэх авсан 76 гишүүн тангарагаа өргөх юм. Ингэснээр тэдний УИХ-д суух эрх нь баталгаажна. Мөн 2012-2016 онд ажилласан УИХ-ын бүрэн эрхийн хугацаа дуусах юм.
-
2016 оны 7 сарын 04
Засгийн газрын хүндэт өргөмжлөлөөр зарим хүнийг шагналаа
-
2016 оны 7 сарын 04
Хорват улстай харилцаа, хамтын ажиллагааг өргөжүүлнэ
