Монголын Сагсанбөмбөгийн Холбооны Үндэсний дээд лигийн "Бүх Одод-2023" тоглолт амжилттай явагдлаа. Тус арга хэмжээ өчигдөр буюу /2023 оны хоёрдугаар сарын 13-ны/ өдөр "UG Arena"-д явагдсан бөгөөд эхний арга хэмжээ "NBA 2K23 Show Match" арга хэмжээгээр эхэлсэн юм.
Эмэгтэй бүх оддын тоглолт энэ жил "Team Khulan", "Team Minjin" нарын багуудын дунд өрнөсөн бөгөөд нэмэлт цаг шийдэгдсэн уг тоглолтод "Team Khulan" баг 97-96 харьцаатай ялалт байгуулсан юм. Эмэгтэй бүх оддын тоглолтын шилдэг тоглогчоор /MVP/ 19 оноо, 13 самбар, 2 оновчтой дамжуулалт гүйцэтгэсэн "Отгонтэнгэрийн Шилүүснүүд" багийн тоглогч Б.Болор-Эрдэнэ тодорлоо.
Мөн энэ тоглолтын үеэр "Sengur Brand"-ийн нэрэмжит эмэгтэйчүүдийн алсын зайн шидэлтийн аварга шалгаруулах тэмцээн болсон бөгөөд "Эрдэнэт Майнерс" багийн тоглогч Э.Чимэддолгор тус тэмцээний аварга болов.
Энэ удаагийн бүх оддын ур чадварын тэмцээн "Coca-Cola Mongolia"-ийн нэрэмжит явагдсан ба тус тэмцээнд Үндэсний дээд лигт тоглож буй ах дүүс оролцсон нь гол онцлог байв. Тус тэмцээний аваргаар Онолбаатарын Энхбаатар, Онолбаатарын Хулан болон "Налайз Бизон" багийн тоглогч Жорж Уиллиамс нарыг баг тэргүүлэв.
"BlueMon Sports" нэрэмжит "Сelebrity game-Холимог Одод"-ын тоглолт Улаан болон Цэнхэр багуудын дунд болж өндөрлөлөө. Уг багуудад олны танил эрхмүүд болох МҮОХ-ны ерөнхийлөгч Б.Баттүшиг, МСБХ-ны ерөнхийлөгч Г.Батцэнгэл, МОСБХ-ын тэргүүн О.Тэнүүн, Улсын арслан Б.Орхонбаяр, жүжигчин Г.Лхагвацэрэн буюу Жижгээ нарын одод тоглолоо. Уг тоглолтод Улаан баг хожил байгуулжшилдэг тоглогчоор /MVP/ МҮОХ-ны ерөнхийлөгч Б.Баттүшиг тодорлоо. Тэрбээр 17 оноо, 8 самбар, 1 оновчтой дамжуулалт өгсөн байна.
"Sengur Brand"-ын нэрэмжит эрэгтэйчүүдийн алсын зайн шидэлтийн аваргаар Хасын Хүлэгүүд багийн тоглогч Ц.Азбаяр тодорлоо. Ингэснээр Монголын сагсанбөмбөгийн дээд лигийн бүх цаг үеийн хамгийн шилдэг шидэгч боллоо. Ц.Азбаярын хувьд 2009, 2010, 2012, 2023 оны 4 удаагийн дээд лигийн бүх ододын тоглолтын 3 онооны шидэлтийн аварга болж буй нь энэ юм.
"Unitel" группын нэрэмжит цагариган дээрээс довтлох /Slam dunk/-ийн тэмцээний аваргаар "IHC Apes" багийн тоглогч Даррел Саммерс тодорлоо.
"Бүх Одод 2023"-ын оргил тоглолт болох эрэгтэй бүх оддын тоглолтод "Team International", "Team Mongolia" багуудын хооронд явагдлаа. Тус тоглолтод "Team International" баг 106-103 харьцаатай ялалт байгуулав. Энэ тоглолтын шилдэг тоглогчоор /MVP/ "Налайх Бизон" багийн Жорж Уиллиамс 24 оноо, 4 самбар, 2 оновчтой дамжуулалт гүйцэтгэж шилдэг боллоо.
Энэ сарын 24-26-ны хооронд "FIBA Asia Cup 2025-Pre Qualifier-Second Round" буюу 2-р шатны тэмцээн манай улсад зохион байгуулагдана. Тус тэмцээнд оролцох Монгол Улсын шигшээ багийн өргөтгөсн нэрс зарлагдсан бөгөөд өнөөдрөөс манай шигшээ багийн тамирчид бэлтгэлдээ гарч байгаа юм. Ирэх сарын 2-ноос Үндэсний дээд лигийн хасагдах шатны тоглолтууд үргэжлэн явагдах аж.
А.Сүх
