Казах түмний уламжлалт “Наурызын баяр”-т зориулсан улс аймгийн цолтой 128 бөхийн барилдаан өчигдөр Монгол бөхийн өргөөнд болоход улсын аварга Пүрэвийн Бүрэнтөгс түрүүлэв. Түүний 2023 оны анхны түрүү бөгөөд гуравдугаар сарын сүүлийн барилдаан энэ байлаа. Барилдаанд улсын арслангаас бусад цолтон зодоглоход түрүү бөх П.Бүрэнтөгс нэгийн даваанд сумын заан С.Хажимхан, хоёрт сумын заан Б.Золбоо, гуравт аймгийн начин Б.Доржжүгдэр, дөрөвт аймгийн заан Э.Түмэндэмбэрэл, тавд улсын начин Б.Сангисүрэн, зургаад өсөх идэр начин Ч.Батчулуун, долоод улсын харцага Ц.Бямба-Отгоныг давсан байна.
24 дэх аварга П.Бүрэнтөгс хамгийн сүүлд 2022 оны арваннэгдүгээр сарын 26-ны өдөр Их эзэн Чингис хааны мэндэлсний 860 жилийн түүхт ой, Монгол бахархлын өдөр болон Бүгд Найрамдах Улсаа тунхагласны 98 жилийн ойд зориулсан барилдаанд түрүүлсэн.
Угтаа бол зургаан барилдаан, 113 хоногийн дараа дахин түрүүлжээ. Үүнээс өмнөх барилдаануудад голлон оролцсон ч шөвөгт шалгараагүй байв.
“Алтан цом”-ын барилдааны гуравдугаар шатанд бол бүр ч тааруу барилдсан билээ. Гэхдээ аварга П.Бүрэнтөгс доогуур даваанд олонтаа унасан ч голлох барилдаануудад ихэвчлэн оролцож, үзэгч түмнээ хүндэтгэн цэнгүүлсээр ирсэн нь сайшаалтай. Аваргын бэлтгэл сургуулилт өвөл унадаг ч зунаас сэргэдэг онцлогтой. Түүний бэлтгэл сургуулилт сая нэг жигдэрч яваа бололтой, ир бяр тэгширч яваа аймгийн заан Э.Түмэндэмбэрэл, улсын начин Ч.Батчулуун, улсын харцага Ц.Бямба-Отгон нартай барилдахдаа илүүрхэж харагдлаа. Дээрх гурван бөх онцгой сайжирч байгаа юм. “Ёстой л аварга хүн шиг барилдлаа” гэх хүн олон байна. Удахгүй эхлэх “Алтан цом”-ын дөрөвдүгээр шатанд Архангай аймгийн хүчтэнгүүдтэй хэрхэн барилдах бол гэж хол ойргүй харж, бас хүлээж сууна даа.
П.Бүрэнтөгс аваргын 2022 оны арваннэгдүгээр сарын 26-ны өдөр түрүүлснээс хойш зодоглосон бүх барилдаанууд:
- Ардчиллын төлөөх намуудын баярт зориулсан барилдаан ДӨРВИЙН ДАВААНД -Тусгаар тогтнолоо сэргээн мандуулсны 111 жилийн ойд зориулсан барилдаан ТАВЫН ДАВААНД
- "Хайрхан" нийслэлийн нэгдсэн захын нэрэмжит, Монгол улсын начин цолны хүндэтгэлийн барилдаан ХОЁРЫН ДАВААНД
- Үзэсгэлэн болгогч хэмээх усан туулай жилийн сар шинийн баярт зориулсан улс, аймгийн цолтой бөхчүүдийн барилдаан ТАВЫН ДАВААНД
- Завхан аймгийн Тосонцэнгэл сумын 100 жилийн ойд зориулсан, Санжмятавын Шагж аваргын нэрэмжит барилдаан ДӨРВИЙН ДАВААНД
- Монгол цэргийн өдөр, Орчин цагийн зэвсэгт хүчин үүсэн байгуулагдсаны 102 жилийн ойд зориулсан барилдаан ДӨРВИЙН ДАВААНД унав.
А.Сүх
