“Пепси алтан цом” үндэсний бөхийн багийн барилдааны III шатны дөрөвдүгээр тойргийн барилдаан өчигдөр болж, Увс аймгийн бөхчүүд Баян-Өлгийн багийг илт давуу яллаа. Барилдаан ч хурдан дууслаа. Увсаас даян аварга Н.Батсуурь таван даваатай тэргүүлсэн бөгөөд өмнөх тойрогтоо мөн унаагүй юм.

Аварга П.Бүрэнтөгс ч муугүй барилдлаа, улсын начин Б.Баатарцолоос бусдыг нь аргалсан. Ер нь хоёр залуу аваргын бэлтгэл жигдэрсэн байна. Н.Батсуурь аварга Монгол түмний уламжлалт баяр сар шинийн барилдаанд онцгой байсан бол П.Бүрэнтөгс аварга Казах түмний Наурызын баярт зориулсан барилдаанд торохгүй түрүүлсэн.

Давсан ч унасан ч шуурхай барилдаад байгаа юм. Нэмж магтахад тэд наадмаас хойш барилдахдаа сая нэг аварга цолондоо хүрч барилдаж байна. “Увс нуур” дэвжээ бол “Алтан цом”-д оролцож буй багуудаас хоёр аваргатай цор ганц баг нь юм. Тэд нийлбэр оноогоороо хүснэгтийн дөрөвт бичигдэж, медалийн төлөө Өвөрхангайн багийг нэхэж байна.

Харин Баян-Өлгий аймгийн багт улсын цолтой хоёр бөх бий. Н.Мустафа, Б.Баатарцол нар өчигдөр хоёр даваа авсан бол аймгийн заан Е.Көптилек хоёр унаж, оронд нь аймгийн арслан Э.Тамираа сэлгэсэн боловч Увсынхныг дийлээгүй юм. Хоёр арслан нь харин сайн үзэж хоёул хоёр давсан.

Бөх цөөтэйн дээр энэ багийн “лидер” улсын заан Б.Серик барилдаагүй нь хол тасархай ялагдахад хүргэсэн. Үлдсэн тойргийн оноолтоос харахад Увсын бөхчүүд медальд ойртож, Өлгийн хүчтэнүүд хүнд байдалд орлоо. "Увс нуур" дэвжээнийхэн энэ шатанд хоёр ялсан бол Өлгийн хүчтэнүүд ялалт аваагүй байна.

УВС - БАЯН-ӨЛГИЙ 17:8

Нэгдүгээр тойрог

1. дая.ав Н.Батсуурь - Е.Көптилек а.з

2. у.ав П.Бүрэнтөгс - М.Еркебулан а.х.а

3. у.х Т.Баасанхүү - У.Береке а.х.а

4. у.х Ц.Мөнхбаяр - Б.Баатарцол у.н

5. у.н О.Түмэн - Н.Мустафа у.н

Хоёрдугаар тойрог

1.дая.ав Н.Батсуурь - М.Еркебулан а.х.а

2. у.ав П.Бүрэнтөгс - У.Береке а.х.а

3. у.х Т.Баасанхүү - Б.Баатарцол у.н

4. у.х Ц.Мөнхбаяр - Н.Мустафа у.н

5. у.н О.Түмэн - Е.Көптилек а.з

Гуравдугаар тойрог

1. дая.ав Н.Батсуурь - У.Береке а.х.а

2. у.ав П.Бүрэнтөгс - Б.Баатарцол у.н

3. у.х Т.Баасанхүү - Н.Мустафа у.н

4. у.х Ц.Мөнхбаяр - Э.Тамираа а.а

5. у.н О.Түмэн - М.Еркебулан а.х.а

Дөрөвдүгээр тойрог

1. дая.ав Н.Батсуурь - Б.Баатарцол у.н

2. у.ав П.Бүрэнтөгс - Н.Мустафа у.н

3. у.х Т.Баасанхүү - Э.Тамираа а.а

4. у.х Ц.Мөнхбаяр - М.Еркебулан а.х.а

5. у.н О.Түмэн - У.Береке а.х.а

Тавдугаар тойрог

 1.дая.ав Н.Батсуурь - Н.Мустафа у.н

2. у.ав П.Бүрэнтөгс - Э.Тамираа а.а

3. у.х Т.Баасанхүү - М.Еркебулан а.х.а

4. у.х Ц.Мөнхбаяр - У.Береке а.х.а

5. у.н О.Түмэн - Б.Баатарцол у.н

Б.Батжаргал