Чуулганы үдээс өмнөх /2014.06.19/ хуралдаанаар Хяналтын тухай болон холбогдох бусад хуульд нэмэлт, өөрчлөлт оруулах тухай хуулийн төслүүд /Улсын Их Хурлын гишүүн А.Бакей нар 2014.06.10-ны өдөр өргөн мэдүүлсэн/ -ийг хэлэлцэх эсэх асуудлыг хэлэлцлээ.Хууль санаачлагчийн илтгэлийг Улсын Их Хурлын гишүүн А.Бакей, Төрийн байгуулалтын байнгын хорооны санал, дүгнэлтийг Улсын Их Хурлын гишүүн М.Батчимэг нар танилцуулав.
Хууль тогтоомжоор эрх олгосны дагуу төрийн байгууллага, албан тушаалтнаас иргэн, хуулийн этгээдийн үйл ажиллагаанд тавьж байгаа бүх төрлийн хяналтыг нэг стандартад оруулах, мэргэжлийн хяналтыг үр дүнтэй болгох, эрсдэлд суурилсан хяналтыг хэрэгжүүлэх зорилгоор хуулийн төслийг шинээр боловсруулсан байна. Уг хуулиар иргэн, хуулийн этгээдийн үйл ажиллагаанд хяналт тавих эрх зүйн үндсийг тодорхойлж, түүнийг хэрэгжүүлэх нийтлэх зарчим, үндэслэл, шалгалт хийх журам, шалгуулагч этгээдийн эрх ашгийг хамгаалахтай холбогдсон харилцааг зохицуулжээ.
Хуулийн төслийг боловсруулах хүрээнд Монгол Улсад хүчин төгөлдөр үйлчилж байгаа бүх хуулийг шинжлэн үзэж, эдгээрээс 83 хуульд нэмэлт, өөрчлөлт оруулах шаардлагатай гэж үзэн холбогдох хуулийн төслүүдийг боловсруулсан байна.
Танилцуулгатай холбогдуулан гишүүд асуулт асууж, үг хэлсэн. Концепцийн хувьд болон манай нөхцөл байдалд тохирохгүй засч залруулах олон зүйл байна гэсэн үндэслэлээр хоёр ч удаа буцаагдсан хуулийн төслийг чамбайруулж, сайжруулсан зүйлгүй хэдхэн хоногийн дараа дахин оруулж ирж байгаа нь буруу гэсэн шүүмжлэлийг цөөнхийн зүгээс хэлж байсан юм. Түүнчлэн бүтэц, хүний нөөцийн асуудалд тооцоо судалгаа байхгүй байгаагийн зэрэгцээ мэргэжлийн хяналтыг салбар салбарын яамдад тараан байршуулснаар төсвийн зардал улам нэмэгдэнэ. Бүтэц бий болох тусам цаана нь зардал бий болдог. Ингэснээр давхардсан хяналт шалгалт бий болж, бизнес эрхлэгчдэд илүү хүнд дарамт үүснэ. Өнөөдөр эдийн засгийн асуудал нэг номерын асуудал байх ёстой. Гэтэл эдийн засгийг идэвхжүүлэх хүрээнд хийгдэх ажлынхаа эсрэг асуудлыг оруулж ирж байна. Иймээс хуулийн төслийг ойр ойрхон зарчмын өөрчлөлтгүй оруулж ирж байснаас татаж аваад асуудлыг эргэж нухацтай харах хэрэгтэй гэдгийг хэлж байлаа.
Мөн Ц.Оюунгэрэл гишүүн, төрийн үүрэг бол нэг талаас бизнесийг дэмжих зорилготой, нөгөө талаас иргэдээ аюулгүй амьдруулах үүрэг хүлээдэг. Иймээс хүний амь насанд шууд хамаатай хяналтыг мэрэгжлийн улсын байцаагч нараар хийлгэе, эрсдэлд суурилсан хяналтыг бий болгох зорилтыг хуулийн төсөлд тусгасан гэсэн бол С.Одонтуяа гишүүн, сүүлийн үед цөөнхийн гишүүд бүх ажлын хэсэгт дуу хоолойгоо гаргаж заримыг нь ахлаад явж байгаа. Ингэж улс төр хийдгээ болих хэрэгтэй. Хяналтын гол зорилго бол нийтийн аюулгүй байдлыг хангахад чиглэх зорилготой. Ингэхийн тулд олон давхардсан хяналтыг цөөрүүлье, бизнест ээлтэй орчныг бүрдүүлж, хяналт шалгалтын дарамтыг цөөрүүлье гэж байгаа. Өнгөрсөн хугацаанд маш их хуурамч эм орж ирсэн нь Мэргэжлийн хяналтын газар, Эрүүл мэндийн яамны уялдаа холбоо муутай байсантай холбоотой гэв. Түүнчлэн Л.Эрдэнэчимэг гишүүн, МХЕГ байгуулагдсанаас хойш аж ахуйн нэгжүүдэд үзүүлэх дарамт ихэссэн. Харин салбар салбарын яамдад мэргэжлийн хяналт очиж байгаа нь зүйтэй. Хүнс, эмийн агентлаг байгуулахаар шинэчлэлийн Засгийн газар мөрийн хөтөлбөртөө тусгасан ч энэ асуудал орж ирэхгүй байна. Хүнсний аюулгүй байдлын тухай хуулийн хэрэгжилт хангалтгүй байгаа. Одоогийн байгаа системээр хяналтын үйл ажиллагааг шийдэж чадахгүй байгаа нь харагдаж байна. Хяналтын байгууллага, яам хоорондоо ойлголцохгүйгээс болоод эмийн хяналтын асуудал шийдэгдэхгүй байгаа гэлээ.
Ингээд Хяналтын тухай болон холбогдох бусад хуульд нэмэлт, өөрчлөлт оруулах тухай хуулийн төслүүдийг хэлэлцэх эсэх асуудлыг чуулганы үдээс хойшхи хуралдаанаар үргэлжлүүлэн хэлэлцэхээр болов хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
