“Дижитал” хамтлагийн ахлагч Ш.Батбаяр буюу Баавар, түүний хамсаатан Т.Алтай, Г.Адъяасүрэн нарыг хар тамхи хадгалсан, худалдаасан гэж шүүхээс үзэж  тэдгээрийг гурван сараар хорих шийдвэр гаргаж байсныг та бүхэн санаж байгаа биз ээ.
Ингэхдээ тэдний урьдчилан хорих төвд хоригдсон, Бааварын эмнэлэгт хэвтэн эмчлүүлсэн хугацааг ял эдэлсэнд тооцох шийдвэрийг шүүхээс гаргаж, Баавар сар хүрэхгүй хугацаанд хоригдоод гарч ирж байсан удаатай.

Энэ мэт урлагийнхан хар тамхины хэрэгт мэр сэр орооцолдсоор байдаг. DJ Өөжий буюу О.Ганболд өнгөрсөн оны наймдугаар сард мөн энэ төрлийн хэргээр 12 жилийн хорих ялаар шийтгүүлсэн юм. Баавар ч мөн ялгаагүй 2007 онд хар тамхины хэргээр буруутгагдаж, Өршөөлийн хуульд хамрагдан хэргийг нь хэрэгсэхгүй болгож байсан билээ.

Ш.Батбаяр буюу Бааварын хувьд тэрээр Эрүүгийн хуулийн 192.3.4, 192.3.5-д зааснаар мансууруулах буюу сэтгэцэд нөлөөлөх эм, бэлдмэл, бодис борлуулах зорилгоор хууль бусаар бэлтгэсэн, олж авсан, хадгалсан, тээвэрлэсэн, илгээсэн, борлуулсан, мөн уг хэргийг урьдчилан үгсэж тохиролцсон буюу зохион байгуулалттай бүлэг, гэмт бүлэглэл үйлдсэн гэх зүйл ангиар буруутгагдсан. Энэ нь нэлээн хүндэвтэр гэмт хэрэг мэт байсан боловч өөрийгөө шатаасан гэх Баавар 3 сарын хорих ялаар л шийтгүүлсэн.
Тэгвэл Х.Тэмүүжинтэй нэр холбогдож, олны анхаарлын төвд ороод байсан Г.Сарангэрэл хэмээх бүсгүй хэдхэн хоногийн өмнө шүүхээс 1.6 жилийн ял сонссон юм.

Г.Сарангэрэлийн хувьд Ш.Баавартай ялгаагүй хар тамхи тээвэрлэсэн, хэрэглэхийг завдсан, насанд хшрээгүй хүүхэд уруу татсан гэх зүйл ангиар буюу  эрүүгийн хуулийн 192.1, 192.2, 115.1 гэсэн зүйл ангиар буруутгасан билээ. Гэвч тэрбээр шүүхийнхэнд итгэхгүй байгаагаа хэлж, өөрийгөө өмгөөлөх гэж баахан тэмцсэний эцэст хуулийнхны дургүйг хүргэж Баавараас илүү ял авч орхилоо.
Энэ нь хуулийнхан хүмүүст хэр ялгавартай харуулж байгааг илтгэж байгаа том жишээ боллоо. Өөрөөр хэлбэл, хэн хуулийнхан тэр дундаа шүүхийн албан тушаалтнууд руу орилж хашгичсан тэр хүн илүү олон жилээр яллагдах шийтгэл авдагийг харуулж байгаа юм.

Г.Сарангэрэлийн хувьд намайг гүтгэж байна. Би шүүхийнхэнд итгэхгүй байна. Шүүхийн шийдвэр гүйцэтгэх газрынхан хийгээд хорих ангийнхан хүмүүжүүлэгчид намайг байнга дарамталж байсан гэх мэтээр олон түмэнд зарлаж гүйсэн нь өөрийгөө 1.6 жилээр ялалуулахад хүргэлээ гэх хүмүүс ч байна.
Харин 70 сая төгрөгний хар тамхи нуун дарагдуулсан гэх хэрэгт унаад байсан Бааварын хувьд хууль хүчин болоод шүүхийнхэн рүү дайрч давшилгүй, өөрийгөө шатааснаас цаашгүй учир бага ял авсан бололтой.

Тэгэхээр энэ бүхнээс харахад хуулийн байгууллагынхан өөрсдийн үзэмжээрээ шүүгдэгч этгээдүүдэд ял тулгаад байна гэх хардлага нийгэмд бий болоод байгаа юм.
Мөн манай Эрүүгийн хууль хэтэрхий өрөөсгөл, дутуу дулимаг байдал нь шүүгчдийг ийн өөрсдийн үзэмжээрээ ямарваа зүйлд хандахад хүргээд байгаа юм.

Эрүүгийн хуулийн зүйл ангидаа л Хятад улс шиг хар тамхийг граммаар нь, бүх төрөлд ангилсан маягаар авч үздэг бол шүүгчид ч ингэж дураарай авирлахгүй нь лавтай.
Олон юм шалчигнаагүй Баавар, юу хэлж ярьж байгаагаагүй мэдэхгүй явсан Г.Сарангэрэл хоёрын тэнгэр, газар шиг ялгаатай хар тамхины хэрэгт шүүх арай л үзэмжээрээ хандчихав уу даа.