Ерөнхий сайдын ахлах зөвлөх Л.Гансүх нарын дөрвөн хүнийг АТГ-аас энэ сарын 29-ний шөнө баривчлан, Төв аймгийн Цагдан хорих төвд саатуулсан байгаа. УИХ-ын экс гишүүн, БОАЖ-ын сайд асан Л.Гансүх нь  Шинэчлэлийн Засгийн газраас сүүлийн хоёр жил хэрэгжүүлсэн “Нүүрс” хөтөлбөрийг өнгөрсөн жил хариуцаж ажилласан.

Тэгвэл Л.Гансүх уг төслөөс өөрийн багийнханы хамтаар 3.6 тэрбум төгрөгийг хувьдаа  завшчихсан  байж магадгүй хэмээн АТГ-аас сэжигтлэн саатуулаад байгаа юм.  Түүнтэй хамт хоёр хүн хоригдсон ба тэдгээр нь Л.Гансүхийн эхнэрийн төрсөн дүүгийнх нь болон өөрийнх нь төрсөн эгчийн хүүхдүүд гэж эх сурвалжууд мэдээлж байгаа ч түүний өмгөөлөгчтэй холбогдож тодруулахад "Л.Гансүх туслах зэрэг өөр хүмүүс хамт хоригдож байгаа. Харин ар гэр, хамаатан саднаас нь хамт хоригдсон зүйл байхгүй" гэв.