Энэ сарын 29-нд АТГ-аас цагдан хорьсон Ерөнхий сайдын зөвлөх Л.Гансүхийн өмгөөлөгч уржигдар Төв аймгийн урьдчилан хорих төв очжээ. Улмаар үйлчлүүлэгчтэйгээ уулзах гэсэн боловч АТГ-аас зөвшөөрөл авч байж уулз гэх эсэргүүцэлтэй тулгарсан аж. Тиймээс тус хорих ангийн даргад хандсанаар уулзах зөвшөөрөл авсан байна. Гэтэл уулзалтын өрөөнд байхад дахин дуудаж, уулзахыг нь хориглосон юм байна. Түүний хэлж буйгаар “Хуулийг ноцтой зөрчиж байна. Эрүүгийн байцаан шийтгэх хуулийн 36-д яллагдагч өөрийн өмгөөлөгчтэй ганцаарчилж уулзах, мөн 41-р зүйлд зааснаар хэрэгт оролцох үеэс эхлэн өмгөөлөгч сэжигтэн, яллагдагч, шүүгдэгчтэй ганцаарчилж уулзах эрхтэй гэж заасан. Мөн сэжигтэн, яллагдагчийг баривчлах, цагдан хорих шийдвэрийг биелүүлэх тухай хууль гэж байдаг. Үүнд цагдан хоригдсон этгээдийн өмгөөлөгч нь хорих байранд нэвтрэхдээ өмгөөлөгчийнхөө үнэмлэхийг үзүүлээд нэвтрэх ёстой гэж заасан байдаг. Гэтэл энэ бүхнийг огт харгалзаж үзэхгүйгээр надтай уулзуулахаас татгалзаж байна. АТГ зөвшөөрөл өгдөг байгууллага биш. Шүүхийн үийдвэр гүйцэтгэх газар хуулиа биелүүлэхгүй, зөвхөн АТГ-ын нэг байцаагчийн  заавар зөвлөгөөг дагаж байна. Яллагдагч, өмгөөлөгчийн эрхийг ноцтой зөрчиж байна. Зохих байгууллагуудад нь хандаж мэдээлэх болно” гэсэн юм. Тэгвэл Л.Гансүхэд таван өмгөөлөгч өмгөөлөл үзүүлж байгаа бөгөөд тэдгээр өмгөөлөгчид өнөөдөр мэдээлэл хийхээр болжээ.