Үндэсний Соёл Амралтын хүрээлэнгийн галзуу хулгана 16 хүний аминд хүрэх шахсан талаарх мэдээлэл сүүлийн үед багагүй шуугиан дэгдээлээ. Энэ мэдээллээс болж иргэд үр хүүхдээ парк руу явахыг хориглож, өөрсдөө ч очихоос цааргалах болоод байгаа юм. Тэр бүү хэл энэ сарын 8-нд Нийслэлийн мэргэжлийн хяналтын газраас ҮСАХ-нд томоохон шалгалт оруултал Паркийг хааж, тоглоомуудыг нь лацдахыг шаардах иргэд ч цөөнгүй байгааг хэлэх нь зүйтэй биз ээ. Үнэхээр иргэдийн ингэж айж, болгоомжилж байгаа нь зүйн хэрэг юм. Учир нь хүний амь нас гэдэг юунаас ч үнэтэй билээ.

"Галзуу хулгана"-ы оператор хийдэг залуу энэ бүхнийг цахим ертөнцөд дэлгэснээр паркын үнэн төрх ийн илчлэгдэх боллоо. Ер нь тухайн ажилчин ингэж олон нийтэд бодит үнэнийг зарласан нь магадгүй сүүлд гарах "гашуун" мэдээний сэрэмжлүүлэг ч байсан байж мэдэх юм.

Гэвч ҮСАХ-ийнхэн энэ дутагдлаа аль болох хаацайлах гэж, өөрсдийгөө ямарч зөрчил гаргаагүй мэт ойлгуулахаар зүтгэж, үнэнийг илчилсэн ажилчиндаа ч хариуцлага тооцож байгаа сурагтай.

Юутай ч өчигдөрхөн МХЕГ-аас ҮСАХ-гийн "Галзуу хулгана" тоглоомонд хийсэн шалгалтын хариугаа сэтгүүлчдэд танилцуулахад багагүй зөрчилтэй тоглоом болох батлагдсан юм.

"Галзуу хулгана" тоглоомыг өнгөрсөн 4 дүгээр сард улсын комисс хүлээн авч, ашиглалтад оруулсан байна.

Тус тоглоомыг 2013 онд угсарч суурилуулсан бөгөөд  НЕТГ-ын 2014 оны 4 дүгээр сарын 16-ны өдрийн 2014/225 дугаар бүхий улсын комиссын актаар ашиглалтанд хүлээн авсан байна. Галзуу хулгана нь 680 метр урт бөгөөд хамгийн өндөр хэсэг нь 40 метр. 24 хүний багтаамжтай энэхүү тоглоом 80 км цагийн хурдтай давхидаг аж.

2009 оноос хойш тоглоомууд нь шинэчлэгдэж, хөдөлгөөнт 15 тоглоомоос гадна 50 гаруй хүүхдэд зориулсан тоглоомтой.

Тоглоомын тормоз, аюулгүй ажиллагааны хэрэгслүүдийн ажиллагааг газар дээр нь шалгахад өгсөх замын тормозны урд талынх нь пүрш байхгүй, хойд талын пүрш тасарсан нь тоног төхөөрөмжийн өдөр тутмын ашиглалтын зааврын дагуу үзлэг шалгалтыг хийж гүйцэтгээгүй, цуваа машины суудлыг бэхлэх буюу сөхөх хаах зориулалт бүхий хамгаалалтын тусгаарлагчийн бэхэлгээний боолтны хэсэг сэтэрсэн байжээ.

Тухайн үед яг юу болсон бэ?
Тухайн үед уг тоглоом зогсох ёстой зогсоол дээрээ зогсохгүй хэтэрч зогссон байдалтай байсан аж. Үүнээс болж тоглож байсан хүмүүст доргилт, чичиргээ мэдрэгджээ.

Энэ нь операторын болгоомжгүй байдлаас үүдэлтэй гэв.

Оператор болон үйлчилгээний ажилтан нь ажлын байрны үнэмлэхтэй боловч мэргэшүүлсэн үнэмлэхгүй, гэрээт ажилчдыг ажиллуулж байсан. Мөн оператор болон үйлчилгээний ажилтанг аюулгүй ажиллагааны заавар авсан, ажлын байранд хуваарийн дагуу ажиллуулаагүйн улмаас  анхаарал болгоомж дотоодын сахилга бат алдагдсан. Ажилчдын хувьд багагүй зөрчилтэй байжээ.

Энэ бүхний дараа НМХГ-ынхан  оператор Г.Тэмүүлэнгийн хэлсэн хэмжээний буюу хүний аминд хүрэхээр томоохон зөрчил илрээгүй бөгөөд тус ажилтан нь иргэдэд хэт ташаа мэдээлэл цацсан гэсэн юм. Гэвч үүнийг сонссон ард иргэд бухимдаж байна. Учир нь тэдний дээрх дурдсан зөрчлүүд бол жижиг хэмжээний зөрчил биш. Ийм зөрчил илэрчихээд байхад ажилтанг буруутгаж, иргэдэд ташаа мэдээлэл мэт ойлгуулж байна хэмээн ундуйцаж байгаагаа хэлж байлаа. Түүнчлэн, паркийн ганцхан тоглоомыг шалгахад ийм хэмжээний зөрчил илэрчихээд байхад уг газрыг ажлуулахгүй байх, "Галзуу хулгана"-ыг лацдах арга хэмжээ авахгүй байгаад иргэд гайхаж байна.

Ажилтнаасаа болж асуудалд орсон паркийн удирдлагууд хамгийн түрүүнд НМХГ-т  уучлалт хүссэн албан тоот явуулсан байгаа юм. Харин үүнд нь манай төрийн албан тушаалтнууд уяраад томоохон шалгалтаа үгнээс цаашгүй болгочихов дээ дээ гэсэн иргэдийн хардлага ч байгаа юм.