Оюутолгойн гэрээг байгуулагчдын нэг, Ерөнхий сайдын ахлах зөвлөх Л.Гансүхийг “аавынд” хориод гурав хонож байна. Түүнийг “Нүүрс” хөтөлбөрийг хэрэгжүүлэх нэрээр ах дүү нартайгаа нийлэн улсад 3.6 тэрбум төгрөгийн хохирол учруулсан байж магадгүй хэмээн хуулийн байгууллагынхан үзэх болсон.
Өнгөрсөн хавар Л.Гансүхийг Японд байхад АТГ-аас хамгийн анх шалгаж байгаа мэдээлэл гарсан. Тэгэхэд Л.Гансүх Японоос холбогдож “Тийм юм байхгүй. Худлаа мэдээлэл” гэх мэтээр хариулж байсан. Харин одоо түүнийг хорьсноор үнэн гэдэг нь батлагдлаа.

Харин өчигдөрөөс эхлээд Л.Гансүхийг хорьсон талаар хоёр сонирхолтой мэдээллийг түгээх болсон. Нэгд Л.Гансүхийг өмгөөлөгчтэй нь уулзуулахгүй байгаа. Хоёрт Шинэчлэлийн Засгийн газрыг огцруулахын тулд ийм арга хэмжээ авч байгаа зэрэг юм. Үүнийг эх сурвалжуудаас тодрууллаа.

Л.Гансүх нь таван өмгөөлөгчтэй болсон байна. Нэг хүн ийм олон өмгөөлөгчтэй байсан тохиолдол ховор. Монгол Улсын Ерөнхийлөгч асан Н.Энхбаяр л гэхэд гурван өмгөлөөгчтэй байсан. Эндээс дүгнэж үзвэл Л.Гансүхийн хэрэг нилээд дуулиантай гэдэг нь ойлгогдож болохоор байна. Мөн хэвлэлүүдээр бичээд байгаа шиг Л.Гансүхийг өмгөлөөгчтэй нь уулзуулахгүй байгаа гэдэг худлаа аж. Хамгийн сүүлд л гэхэд Ц.Баасандорж гэдэг өмгөөлөгчтэй нь уулзуулжээ. Л.Гансүх өмгөөлөгчөөрөө дамжуулан нэлээд ноцтой үгийг олон нийтэд хандан дайжээ. Энэ тухай Ц.Баасандорж өмгөөлөгч “Л.Гансүхийг хоёр сар хорих шийдвэр гаргасан. Би үйлчлүүлэгчтэйгээ өчигдөр уулзсан. Л.Гансүх Засгийн газрыг унагах зорилгоор АТГ тушаал аван ажиллаж байна. Намайг улс төрийн хилс хэрэгт хэлмэгдүүлж байна. “Нүүрс” хөтөлбөрөөс ямар ч мөнгө завшаагүй” гэж хэлүүлсэн аж. Эндээс дүгнэж үзвэл Л.Гансүх АТГ улс төржиж байна, тушаалаар ажиллаж байна гэсэн бодлогыг баримтлах бололтой. Ганц зөвлөхийг хорьсны төлөө огцордог Засгийн газар гэж юу байхав дээ?

Ер нь өчигдрөөс эхлээд Засгийн газрыг огцруулахын тулд АТГ ажиллаж байна гэсэн мэдээлэл их тархах болсон. Үүнийг тараагаад байгаа Засгийн газрынханд АТГ тун сонирхолтой хариу барихаар бэлдэж эхэлсэн хэмээн эх сурвалж мэдээллээ.

Мөн Л.Гансүхийн өмгөөлөгч Төв аймгийн ШШГА болон АТГ-ын албан тушаалтнуудыг шалгуулахаар хуулийн байгууллагад хандана гэдгээ мэдэгдлээ. Халуухан ч намар эхэлж байна даа.