Тодруулбал, өнгөрсөн сарын 19-нд Сүхбаатар дүүрэгт Хүн амын хөгжил, нийгмийн хамгааллын яамны захиалгаар "Нийслэл өргөө" компанийн барьж байсан  барилгаас 27-28 насны гурван хүн унаж амиа алдсан. Тэгвэл гурван хүний амийг авч явсан "Нийслэл өргөө" компанийн шалгалтын явц аль түвшин яваа талаар НМХГ-ын дэд дарга М.Баасандоржоос тодрууллаа.

-"Нийслэл Өргөө" компани дээрх шалгалтын явц юу болж байна?

- "Нийслэл өргөө" компани дээр гарсан осол Эрүүгийн журмаар цагдаагийн байгууллагад шалгагдаж байгаа гэж ойлгож болно. Мэргэжлийн хяналтын байгууллага дүгнэлтээ гаргаад холбогдох газар хүргүүлсэн. Тухайн ослын хувьд  хөдөлмөр аюулгүй ажиллагааны дүрэм зөрчсөнөөс үүдэлтэй. Юутай ч гурван хүн амиа алдсан хэрэг тусгаарлагдаж Чингэлтэй дүүргийн цагдаагийн хэлтэст шалгагдаж байна.

-Барилгын нөхцөл байдал дээр асуудлууд гарсан байгаа шүү дээ?

-Барилгын зураг төслийг дур мэдэн өөрчилсөн асуудал байгаа. Тухайлбал, Нийгмийн хамгааллын яамны захиалгаар 10 давхар цахим архивын барилга барих ёстой байсан. Гэтэл нэг блокийг нь 10 давхар цахим барилга болгоод, нөгөө блок дээр нь 14 давхар орон сууцны барилга барьсан байсан. Энэ зураг төслийг тодорхой албан тушаалтай нөхдүүд дур мэдэн өөрчилсөн байгаа. Нэг ёсны тухайн барилга дээр хоёр зөвшөөрөл явагдаж байна гэж ойлгож болно. Магадгүй гурван ч зөвшөөрөл болоод байгаа. Нэг зөвшөөрөл нь албан ёсоор албажаагүй. Нөгөө хоёр  нь албажсан нэг обьектийн хоёр зөвшөөрөл яваад байна. Энэ дээр ажил хариуцаж байгаа төрийн албан хаагчдын буруутай үйл ажиллагаа байгаа. Нэртэй, устайгаа яригдаж байгаа. Энэ асуудлыг өнөө, маргаашдаа багтаагаад харьяалалын дагуу АТГ-т шилжүүлнэ.