АТГ-аас энэ сарын 29-ний шөнө Ерөнхий сайдын зөвлөх Л.Гансүхийг гурван хүний хамт баривчлан саатуулсан билээ. Түүнийг Шинэчлэлийн Засгийн газраас хэрэгжүүлсэн “Нүүрс” хөтөлбөрийг хариуцан ажиллахдаа их хэмжээний мөнгө идсэн хэрэгт буруутган шалгаж байгаа юм.

Тэгвэл энэ хэрэгтэй холбоотойгоор Л.Гансүхийн өмгөөлөгч Л.Цэндсүрэн, Ц.Баасандорж, Төмөрбаатарын өмгөөлөгч А.Зүмбэрэл, Мөнгөнтуяа, Даваахүү нарын өмгөөлөгч Ц.Шаравнямбуу нар өнөөдөр хэвлэлийн бага хурал хийлээ.

Өмгөөлөгчид энэ үеэр Л.Гансүхийг цагдан хорих ажиллагаа нь ямарч үндэслэлгүйн дээр түүний өмгөөлөгчийн үйлчлүүлэгчтэйгээ ганцаарчлан уулзах эрхийг нь ноцтойгоор зөрчсөн тухай мэдээллээ.

Л.Гансүхийн өмгөөлөгч Л.Цэндсүрэн энэ талаар “Нэгдүгээрт таслан сэргийлэх арга хэмжээ бол буруу байна гэж үзэж байгаа. Л.Гансүхэд таслан сэргийлэх арга хэмжээг дөрвөн сарын өмнө авсан. Энэ таслан сэргийлэх арга хэмжээг Л.Гансүх ямар нэгэн байдлаар зөрчсөн, оргон зайлсан эсвэл мөрдөн байцаалтад саад учруулсан зүйл байхгүй. Гэтэл таслан сэргийлэх арга хэмжээг дөрвөн сарын хугацаанд зөрчөөгүй байхад энэ таслан сэргийлэх ажлыг хүндрүүлж цагдан хорих ямар шаардлага байсан юм бэ? Энэ нь өөрөө хууль зөрчсөн үйлдэл юм. Үүнд прокурор шүүх нь оролцоод явж байгаа. Үүнийг бид зохих байгууллагад нь тавина. Хоёрдугаарт гэвэл 07 сарын 30-ны өдөр буюу өчигдөр би Төв аймгийн цагдан хорих байранд очсон. Гэтэл тоо бүртгэгч нь надад уулзуулах боломжгүй АТГ-аас зөвшөөрөл авах ёстой гэсэн шаардлага тавьсан. Хариуд нь би “ийм хуулийн зүйл заалт байхгүй даргатай чинь уулзая” гээд дэд даргатай нь орж уулзсан. Уулзахдаа хууль зүйн туслалцаа үзүүлэх гэрээ болон өмгөөлөгчийн үнэмлэхээ үзүүлсэн. Дэд дарга нь эхлээд уулзуулъя гэж байгаад хэсэг хугацааны дараа дахин АТГ-аас зөвшөөрөл авах ёстой хэмээн уулзуулаагүй. Цаанаа бол ерөөсөө надаас үнэмлэх авч үлдээд утсаараа АТГ-аас заавар зөвлөгөө авсан байгаа юм. Энэ бол эрүүгийн байцаан шийтгэх хуульд заасан яллагдагчийн болон өмгөөлөгчийн эрхийг ноцтой зөрчсөн асуудал. Өнөөдөр бид энэ асуудлаар ШШГЕГ-т гомдол гаргаж байгаа” гэв.

Мөн Мөнгөнтуяа, Даваа нарын өмгөөлөгч Ч.Шаравнямбуу “Л.Гансүх гэдэг хүнийг цагдан хорин үндэслэлийг юу гэж тайлбарлаж байгаа вэ гэхээр оргон зайлах болон мөрдөн байцаалтад саад учруулахаас урьдчилан сэргийлэх гэсэн шүүхийн захирамж гарсан байгаа. Л.Цэндсүрэн өмгөөлөгч түрүүн дөрвөн сарын өмнө таслан сэргийлэх арга хэмжээ авсан тухай ярьсан.  Тэр дөрвөн сарын хугацаанд таслан сэргийлэх арга хэмжээгээ зөрчөөгүй байхад оргон зайлах, саад учруулж болзошгүй гэсэн таамаг маягийн үндэслэлээр хорьсон байгаа юм. Ийм үндэслэлгүй шийдвэрийг Алдар шүүгч гаргасан. Шүүгчийн энэ шийдвэрийг Шүүгчийн Ерөнхий зөвлөл эргэн хараач гэж хүсмээр байна. Энэ чинь хүний эрхийг ноцтой зөрчиж байна шүү дээ. Хамгийн гол нь шүүх аль нэгэн байгууллагад үйлчлээд байгаа юм шиг хардлагыг бидэнд төрүүлж байна” хэмээсэн юм.

Түүнчлэн Л.Гансүхийн өмгөөлөгч Ц.Баасандорж “Би өчигдөр Л.Гансүх гуайтай уулзаад ирсэн. Түүний үзэж байгаагаар энэ хэрэгт олон нийтийн мэдээллийн хэрэгслүүдээр буруу ташаа мэдээллүүд их цацагдсан. Энэ болгон дээр хуулийн байгууллага үнэн зөвөөр нь шалгах байх гэсээр өнөөдрийг хүрлээ. Энэ бол Засгийн газрыг унагаах гэсэн хэсэг бүлэг нөхдүүдийн захиалгаар хийгдэж байгаа ажиллагаа гэж миний үйлчлүүлэгч Л.Гансүх үзэж байгаа. Өөрөөр хэлбэл АТГ гэдэг газар улс төрийн зорилгоор, захиалгаар Засгийн газрыг унагаахын төлөө ажиллаж байна. Би энэ асуудлыг өнөөдрийг хүртэл тэсч ирлээ. Цаашдаа бол хатуу тэмцэх болно гэж миний үйлчлүүлэгч ярьж байгаа” гэжээ.