Сүр дуулиантайгаар хувьчлагдаж, данснаас нь 14.4 тэрбум төгрөг дутсан нь илэрч, олон жилийн турш хуулийнхны анхаарлын төвд байсан "Хадгаламж"-ийн гэх тодотголтой хэрэг түүх болон үлдэж, асуудал шүүхээр шийдвэрлэгдсэн. Анх энэ хэрэгт нэр бүхий албан тушаалтан болох У.Хүрэлсүх тэргүүтэй 26 хүн холбогдон шалгуулж байсан ч эцэстээ Ц.Чимэдцэрэн ганцаараа ял эдэлж, хохирол барагдуулахаар болсон. Тодруулбал түүний 10 сая төгрөгийн эд зүйлийг хурааж, 10 жилийн хорих ялыг чанга дэглэмтэй хорих ангид эдлүүлэхээр шийдвэрлэсэн. Мөн түүний учруулсан 14.2 тэрбум төгрөгийг өөрөөс нь гаргуулахаар болсон юм.

Ц.Чимэдцэрэн хугацаанаасаа таван жилийн өмнө суллагдсан билээ. Түүнийг хөдөлмөр эрхэлж байсан хэмээн “ялтан хөдөлмөр эрхэлбэл эдлэх ялын хугацаанаас шагналын хоног хасах тухай” заалтын дагуу улиралд 30 хоног буюу жилд дөрвөн сарыг хасан тооцож байжээ.  Түүнчлэн Өршөөл үзүү­лэх тухай батлагдсан нь түүнийг ялаас хөнгөлөгдөхөд ихээхэн хэрэг болсон. 2009 оны долдугаар сарын 9-нд гарсан Өршөөл үзүүлэх тухай хуулийн 5.1.1-д "Анх удаа хүнд гэмт хэрэг үйлдэж хорих ял шийтгүүлсэн ялтны эдлээгvй үлдсэн ялаас гурван жилийг хасна" гэж заасны дагуу Ц.Чимэдцэрэнгийн ялаас гурван жил нь хасагдсан. Мөн түүнийг 2011 онд баяр наадмын үеэр дэглэм бууруулсан бөгөөд жирийн дэглэмтэй хорих анги руу шилжүүлсэн бөгөөд тэрбээр шоронгоос гарах хүртэлх хугацаанд тус хорих ангийн хамгийн боломжийн ажлын байр болох номын санчаар ажиллаж байсан юм.


Гэтэл өнөөдрийг хүртэл Ц.Чимэдцэрэн дээрх хохирлыг барагдуулаагүй байна. Түүнийг төлбөрөө барагдуулж дуусчээ гэх мэдээлэл өнгөрсөн жил гарч байсан нь худал гэдгийг албаныхан хэлж байна. Албаныхны  хэлж буйгаар тэрбээр хохиролоо барагдуулаагүй байгаа бөгөөд “Миний нэр дээр ямар ч хөрөнгө байхгүй. Эхнэр нь хөрөнгөө хуваагаад салчихсан” гэх тайлбарыг Шүүхийн шийдвэр гүйцэтгэх газрынханд өгдөг аж. Түүнчлэн гадаад руу гарах эрхээ сэргээлгэхээр хэд хэдэн удаа хуулийн байгууллагад хандсан байна. Учир нь тэрбээр гадаад руу гарчихвал мөнгөө олоод өрөө төлчихнө гэх тайлбарыг хийдэг байна. Гэвч түүний хүсэлтийг өдийг болтол хүлээж аваагүй байгаа юм. Ийнхүү тэрбээр Шүүхийн шийдвэр гүйцэтгэх албанд дуудсан цагт нь очиж дуулгавартай байгаа боловч хохиролоо барагдуулах тал дээр ямар ч ахиц гаргахгүй байсаар байгаа аж.