Иргэдэд газар олгохоор энэ сарын 1-нээс цахим бүртгэл явуулсан. Эхний ээлжинд Баянзүрх дүүргийн XX хороо Хожуулын ам, Сонгинохайрхан дүүргийн 21 дүгээр хороо Соёондын ам, Хан-Уул дүүргийн 12, 13 дугаар хороо Эрдэнэтолгой, Багануур дүүргийн IV хороо Тариан булгийн I хэсэг, Багахангай дүүргийн II хороо Бор-Үзүүр гэсэн таван байршлын 1524 га газрыг нийслэлийн 14954 иргэнд өмчлүүлнэ.

Газар өмчлөлийн цахим системээр бүртгүүлэхийн тулд нийслэлийн Өмчийн харилцааны газрын цахим хуудас болох www.umch.ub.gov.mn сайтаар орж, хүсэлтээ явуулна. Бүртгэл эхэлснээс хойш уг системд таван сая орчим хандалт ирснээс 18 орчим мянган хүн бүртгүүлжээ. Үүнээс үүдэн хэт ачаалал үүсэж, иргэдийг нэлээд бухимдуулж, зарим хүн бүртгүүлж чадахгүй байгаа аж.

Энэ сарын 15-ны 12.00 цаг хүртэл бүртгэл үргэлжлэх бөгөөд түрүүлж бүртгүүлсэн, эсэхийг үл харгалзан сонгон шалгаруулах тул хүлээцтэй байхыг тус газраас анхааруулжээ.