Эдийн засгийн хүндрэл эрх баригчдыг төдийгүй ард түмнийг бүсээ чангалахыг шаардаж байна. Тиймээс Шинэчлэлийн Засгийн газар энэ намартаа багтаад нэлээд том акци хийхээр бэлтгэж байгааг эх сурвалж мэдээллээ. Энэ бол төрийн данхар бүтцийг хумьж, олон хүнийг ажлаас нь чөлөөлж төсөв хэмнэх санаачлага юм.

Өмнөх Засгийн газрын үед 11 яам, 15 сайд, 12 дэд сайдтай байв. Харин Н.Алтанхуягийн Засгийн газар 16 яам, 19 сайд, 17 дэд сайдтай болж томорсон. С.Батболдын Засгийн газрын үед 121600 байсан төрийн албан хаагчдын тоог 167800 болгож нэмсэн. 26900 байсан төрийн өмчит аж ахуйн нэгжийн тоо 49600 болсон гэсэн тоо бий. 85 байсан газар хэлтсийн дарга нарын тоог 201 болгож нэмсэн. Мөн Улаанбаатар хот 3 орлогчтой байсан бол одоо 9 орлогчтой болсон. Дээр нь нэг орлогчтой байсан дүүрэг, аймгийн засаг даргын орлогч нарын тоог 2-4 болгож данхайлгасан юм.

Энэ байдалдаа Шинэчлэлийн Засгийн газар засвар хийхээр Ч.Сайханбилэгээр ахлуулсан ажлын хэсэг гарч судалгаа тооцоон дээр сууж байгаа гэнэ.

Эх сурвалжийн мэдээлж байгаагаар бол нийслэлийг хуучнаар нь гурван орлогчтой, бүх дүүрэг, аймгуудыг Засаг даргын нэг орлогчтой болгохоор төсөл боловсруулсан сураг гарлаа. Ингэж шийдвэл нэлээд төсөв хэмнэгдэх гэнэ. Аймгийн Засаг даргын орлогчийг чөлөөлөхөөр түүний туслах, жолооч гээд багагүй хүмүүс дагаж ажилгүй болох аж. Мөн аймгийн Засаг даргын орлогчийн жилийн төсөв 30 гаруй сая төгрөг байдаг гэнэ. Гурван орлогчтой аймаг хоёрыг нь чөлөөллөө гэхэд 60 гаруй сая төгрөг хэмнэгдэнэ. Харин нийслэлийн дүүргүүдийн Засаг даргын орлогчийн төсөв 50 орчим сая төгрөг байдаг бололтой. Нэг дүүрэг хоёр орлогчоо чөлөөлөхөд л 100 орчим сая төгрөгийг хэмнэнэ гэсэн судалгаанууд гарч эхэлжээ. Нийслэлд л гэхэд “Шударга ёс” эвсэлийг төлөөлдөг Засаг даргын орлогчийг чөлөөлөх мэдээлэл ирэв. 

Үүнээс гадна Засгийн газар давхардсан олон бүтцүүдийг арилгах үүрэг чиглэл өгчээ. Хэрэв энэ үүрэг биелвэл нилээд олон давхардсан бүтэц арилж олон хүн ажилгүй болох нөхцөл үүснэ. Энэ нь сайн муу хоёр талтай. Нэгд хүндэрч байгаа улсын төсөвт хэрэгтэй. Хоёрт эдийн засгийн хямралын үед олон хүнийг ажилгүй болгоно гэдэг маш хэцүү асуудал юм.

Шинэчлэлийн Засгийн газраас гаргахаар бэлтгэж байгаа энэхүү шийдвэр нь олон нийтэд таалагдах магадлал өндөр. Учир нь олон түмэн данхар бүтцийг хэзээнээс эсэргүүцэж, Монгол Улсын Ерөнхийлөгч хүртэл цомхон бүтэцтэй “ухаалаг” төрийг бүтээхийг уриалж байгаа билээ. Хэрэв энэ шийдвэрийг намрын чуулганаас өмнө гаргаж чадвал Шинэчлэлийн Засгийн газар унаж байгаа рейтингээ өсгөх нэг алхам байж болно гэж ажиглагчид үзэж байна.