Монгол улсын Шадар сайд У.Хүрэлсүхийн урилгаар БНЭУ-ын дотоод хэргийн сайд манай улсад айлчилна
Товчхон

Монгол Улсын Шадар сайд У.Хүрэлсүх БНЭУ-ын Дотоод хэргийн сайд Ражнат Сингхтэй уулзсан байна. Уулзалтаар харилцаа, олон талт хамтын ажиллагааг өргөжүүлэн хөгжүүлэх талаар санал солилцсон бөгөөд Ражнат Сингхийг 2017 онд Монгол Улсад айлчлахыг Шадар сайд урилаа.

Гамшгийн эрсдлийг бууруулах асуудлаарх Азийн улсуудын сайд нарын Бага хурал энэ сарын эхээр БНЭУ-ын Шинэ Дели хотноо болсон билээ. Хурлын үеэр Монгол Улсын Шадар сайд У.Хүрэлсүх БНЭУ-ын Дотоод хэргийн сайд Ражнат Сингхтэй уулзсан байна.

Уулзалтаар харилцаа, олон талт хамтын ажиллагааг өргөжүүлэн хөгжүүлэх талаар санал солилцсон бөгөөд Ражнат Сингхийг 2017 онд Монгол Улсад айлчлахыг Шадар сайд урилаа.

Сайд Ражнат Сингх Гамшгийн эрсдэлийг бууруулах асуудлаарх Азийн улсуудын сайд нарын хоёрдугаар Бага хурлыг 2018 онд Монгол Улсад зохион байгуулахад бүх талаар дэмжиж, туслана гэдгээ илэрхийлсэн байна.

МАН-ын Бага хурал энэ сарын 20-нд болох тов гарчээ. Тус хурлаар орон нутгийн сонгуулийн үр дүн болон Ерөнхий нарийн бичгийг даргыг томилох асуудлыг хэлэлцэхээр төлөвлөөд байгаа бөгөөд одоогийн үүрэг гүйцэтгэгч Д.Амарбаясгаланг жинхлэж магадгүй гэсэн мэдээлэл байгаа юм.

УИХ-ын сонгуулийн дараа намын Бага хурлыг товлоод байсан ч орон нутгийн сонгуулийн дараа хуралдуулах саналыг гишүүдээс гаргасан тул ийнхүү хойшлуулаад байсан юм.

УИХ-ын Нийгмийн бодлого, боловсрол, соёл, шинжлэх ухааны байнгын хорооны өчигдөрийн хуралдаан Монгол Улсын эдийн засаг, нийгмийг 2017 онд хөгжүүлэх үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийлээ.

Салбарын сайд нарын танилцуулгатай холбогдуулж УИХ-ын гишүүн Б.Баттөмөр, Ц.Цогзолмаа, М.Оюунчимэг, Н.Учрал нар асуулт асууж, байр сууриа илэрхийлсэн юм. Гишүүдийн хувьд боловсролын чанар, хүртээмжийн ирэх жилийн нөхцөл байдал, боловролын зээлийн санд хамрагдах оюутны тоо, цар хүрээ, шинжлэх ухааны салбарт үзүүлэх бодитой дэмжлэг, Монгол Улс дэлхийн жишигт хүрсэн эмчилгээ үйлчилгээний түвшинд хэдийд хүрэх талаар болон амьжиргааны түвшин тогтоох судлагааг хэр бодитой явуулах гэж байгаа талаар илүүтэй тодруулж байв.

Боловсрол, соёл, шинжлэх ухаан спортын сайд Ж.Батсуурь боловсролын зээлийн санд 2017 оны төсвийн төсөлд 100 тэрбум төгрөг туссан байгаа. Энэ нь нийт оюутны 50 хувьд хүрэлцээтэй. Үлдсэн 50 хувь нь сургалтын төлбөрөө төлөх боломжтой гэсэн судлагаа байгаа. Оюутны сургалтын зээл хүссэн суралцагчдад Боловсролын зээлийн сангаас төлбөрийг нь тухайн их дээд сургуулийн дансанд шууд шилжүүлнэ. Харин шинжлэх ухаан технологийн санд 10.5 тэрбум төгрөг төсөвлөгдсөн. Үүнийг эрдэм шинжилгээний томоохон бүтээл туурвигчдад зохих дэмжлэг үзүүлэхэд зарцуулна. Мөн 45 нас хүртлэх эрдэм шинжилгээний ажилтан БНХАУ-ын зардлаар тухайн салбарын эрдэм шинжилгээний төвд ажиллуулах зэргээр энэ салбарт бид тодорхой зорилт тавин ажиллаж байгаа гэж хариулаа. Харин Эрүүл мэндийн сайд А.Цогцэцэг 2020 он гэхэд бид дэлхийн түвшинд хүрсэн эмчилгээ үйлчилгээг ард иргэддээ үзүүлэх зорилтыг тавьж ажиллаж байгаа. БСШУСЯ-тай хамтран гадаадын их дээд сургуульд эмч мэргэжилтэн, боловсон хүчнээ түлхүү бэлтгэх талаар ажиллаж байна гэж байсан бол Хөдөлмөр, нийгмийн хамгааллын сайд Н.Номтойбаяр ирэх жил Монгол Улсын хэмжээнд амьжиргааны түвшин тогтоох судлагааг хийнэ. Эхний ээлжинд Үндэсний статистикийн газартай хамтран амьжиргааны түвшин тогтоох аргачлалыг гаргахаар ажиллаж байна хэмээн хариулж байлаа.

Монгол Улсын эдийн засаг, нийгмийг 2017 онд хөгжүүлэх үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийсэн талаархи байнгын хорооны санал, дүгнэлтийг УИХ-ын гишүүн С.Чинзориг Эдийн засгийн байнгын хороонд танилцуулахаар болов.

Хугацаа нь дууссан “Биг ланч” бэлэн гоймон дээр хуурамч хугацаа бичиж худалдаалжээ.


Тодруулбал, ОХУ-д үйлдвэрлэгдсэн “Биг ланч” нэртэй, аягатай бэлэн гоймонгийн хадгалах хугацааг будаг шингэлэгч бодисоор хусаж арилгаад, дээр нь өөр стикер нааж, савны ёроол хэсэгт хуурамч он сар тавьж худалдан борлуулж байсан зөрчлийг Мэргэжлийн хяналтын байгууллагаас илрүүлсэн байна.



Тухайн зөрчилтэй холбогдуулан зөрчил гаргасан ААН-д 5 сая 760 мянган төгрөгийн торгуулийн арга хэмжээ тооцсон аж. Мөн Аж Үйлдвэрийн сайдын тушаалаар батлагдсан татан авалтын журмын дагуу 584 ширхэг гоймонг зах зээлээс татаж, нийт агуулахад байсан 2,292 ширхэг гоймонг хурааж, улсын байцаагчийн актаар устгах комисст шилжүүлэн өгчээ.

Л.Наранбаатар

УИХ-ын үдээс өмнөх чуулган эхлэх үеэр УИХ-ын гишүүн Л.Болд Сонгуулийн дүнг УИХ-аар хэлэлцэх саналыг хэлэв. Тэрбээр хуралдааны хэлэлцүүлэг эхлэхээс өмнө сонгуулийн дүнтэй холбоотой дахин нэг баримт дэлгэв. Тодруулбал, Орон нутгийн сонгуулийн дараа СХД-ийн IX хорооноос Сүхбаатар аймгийн түвшин ширээ сумын 30 саналын хуудалс илэрчээ.

Нийслэлийн татварын газраас авто тээврийн хэрэгслийн татвар хураалтын хяналтын үзлэг, шалгалтыг Замын цагдаагийн албатай хамтран 2016 оны 11 дүгээр сарын 07-20-ны өдрүүдэд нийслэлийн хэмжээнд зохион байгуулж байна. Албан татвар, төлбөрөө тогтоосон хугацаанд хууль, журмын дагуу төлөөгүй, замын хөдөлгөөнд оролцож байгаа тээврийн хэрэгслийг албан татварт хамруулах зорилготой юм.

Тиймээс албан татвар, төлбөрөө төлөөгүй тээврийн хэрэгсэл эзэмшигч иргэн, хуулийн этгээдүүд 2016 оны 11 дүгээр сарын 20-ны өдөрт багтаан татвар, төлбөрөө бүрэн төлөхийг сануулж байна гэж Нийслэлийн татварын газраас мэдээллээ.

Д/д Байршил Цагийн хуваарь
1 БГД, БЗД, СХД, СБД, ЧД, ХУД, НД, БХД, БНД-ийн татварын хэлтэс Даваа-Баасан : 08.30-17.30
Бямба, ням : Амарна
2 БГД оношилгооны төв Хөсөг трейд ХХК-ийн байранд Өдөр бүр : 08.30 – 20.30
3 СХД-ийн оношилгооны төв Өдөр бүр : 08.30 – 20.30
4 БЗД-ийн оношилгооны төв Өдөр бүр : 08.30 – 20.30
5 АХЦТөв Даваа-Баасан : 08.30-17.30
Бямба, ням : Амарна
6 АТҮТ Даваа-Баасан : 08.30-17.30
Бямба, ням : Амарна
7 АТҮТ /таван ган/ Даваа-Баасан : 08.30-17.30
Бямба, ням : Амарна
8 ТҮНТ Дүнжингарав Даваа-Баасан : 08.30-17.30
Бямба, ням : Амарна
9 ТҮНТ Мишээл төв Даваа-Баасан : 08.30-17.30
Бямба, ням : Амарна
10 ТҮНТ Драгон төв Даваа-Баасан : 08.30-17.30
Бямба, ням : Амарна

Монголбанкнаас инфляцийн төлөв байдлын тайланг олон нийтэд мэдээлээд буй. Уг тайлангаар Монголбанк ирэх онд эдийн засгийн өсөлтийг 2-4 хувьтай байна хэмээн төсөөлжээ. Харин инфляцийг 2017 онд 3-5 хувь байхаар төсөөлсөн байна. Тухайлбал, эдийн засгийн өсөлтийн төсөөллийг өмнөх төсөөллөөс бууруулахад уул уурхайн салбарын сэргэлт удаан, сул, Оюутолгойн далд уурхайн хөрөнгө оруулалтын хэмжээ хүлээгдэж байснаас буурч болзошгүй байгаа нь нөлөөлжээ. Мөн хувийн хэрэглээ эрчтэй агшсан болон бодлогын хүү өссөн нь эдийн засгийн өсөлтийн төсөөлөл буурахад нөлөөлсөн байна. Суурь төсөөллөөр эдийн засгийн өсөлт 2016 онд үргэлжлэн саарч, 2017 онд бага зэрэг нэмэгдэх төлөвтэй байгааг тайланд дурьджээ.

Харин инфляцийн хувьд ирэх онд хүнсний болон хүнсний бус инфляци 2017 оны сүүлийн хагас хүртэл үргэлжлэн буурах хандлагатай байна. Тухайлбал, хүнсний инфляци буурахад мах, хүнсний ногооны үнийн бууралт голлон нөлөөллөө. Харин хүнсний бус инфляцийн тухайд 2017 онд нийт эрэлт буурах төлөвтэй холбоотойгоор нам түвшинд хадгалагдана гэж Монголбанк үзэж байна. Ингэснээр инфляци 2017 онд Төрөөс мөнгөний бодлогын талаар баримтлах Үндсэн чиглэлд тусгагдсанаас бага түвшинд байх хүлээлттэй байна гэж Монголбанкнаас мэдээлэв.

Өнөөдөр өглөөний 11:00 цагийн орчимд нийслэлийн Баянзүрх дүүргийн дөрөвдүгээр хороо Хилийн цэргээс баруун тийш 50 метрийн зайд замын хөдөлгөөнд оролцож байсан Toyota “Mark II” маркийн автомашин шатжээ.

Галын тухай дуудлага Нийслэлийн онцгой байдлын албаны шуурхайн удирдлагын төвд 11:08 цагийн үед ирсэн бөгөөд гал унтраах анги очиход замын хөдөлгөөнд оролцож байсан жолооч нар хор цацан галыг унтраасан байжээ. Галын улмаас бэртэж гэмтсэн хүн байхгүй бөгөөд галын шалтгааныг тогтоохоор холбогдох албаныхан ажиллаж байна.

Дэлхийн эрүүл мэндийн байгууллага болон НҮБ-аас “Зам тээврийн ослын улмаас хохирогсдын дурсгалыг хүндэтгэх өдөр”-ийг жил бүрийн 11 дүгээр сарын 3 дахь 7 хоногийн “Ням” гарагт дэлхий нийтээр зохион явуулдаг билээ. Манай улсын хувьд “Зам тээврийн осолд өртөж, хохирсон иргэдийн дуу хоолойг сонсох өдөр”-ийг зам тээврийн ослын хор уршгийг олон нийтэд таниулах, хохирсон иргэдийн ар гэр, тэдний дуу хоолойг олог нийтэд хүргэх зорилгоор 3 дахь жилдээ 2016 оны 11 дүгээр сарын 13-ны өдрөөс 2016 оны 11 дүгээр 17-ны өдрийн хооронд зохион явуулах гэж байна.

Монгол улс дах Зам тээврийн ослын статистик үзүүлэлтээс харахад нийслэл Улаанбаатар хотын хэмжээнд 2016 оны эхний 10 сарын байдлаар 71003 зам тээврийн осол бүртгэгдсэн нь өмнөх оны мөн үеэс 550 нэгж буюу 7,2%-иар буурчээ.

Үүнээс хүн амын нягтаршил, замын хөдөлгөөний төвлөрөлтэй холбоотойгоор нийслэлд тээврийн хэрэгслийн хөдөлгөөний аюулгүй байдлын журмын эсрэг гэмт хэрэг 799 бүртгэгдсэн байна. Тээврийн хэрэгслийн хөдөлгөөний аюулгүй байдлын журмын эсрэг гэмт хэрэг улсын хэмжээнд 13%-иар, нийслэлд 14,5%-иар, орон нутагт 11,3%-иар буурсан үзүүлэлт гарсан байна.

2016 оны эхний 10 сарын байдлаар улсын хэмжээнд зам тээврийн ослын улмаас 418 хүний амь нас хохирч, 1082 хүн хүнд, хөнгөн гэмтсэн. Үүнээс нас барсан хүүхэд 48 буюу нийт нас барсан хүний 2%-ийг, гэмтсэн хүүхэд 199 буюу нийт гэмтсэн хүний 18,4%-ийг тус тус эзлэж байна. Үүнээс нийслэлийн хэмжээнд 109 хүний амь нас хохирч, 610 хүн гэмтсэн бол, орон нутагт 309 хүний амь нас хохирч, 471 хүн гэмтсэн байна гэж Замын цагдаагийн албанаас мэдээллээ.

Малайзад халдлагад өртсөн Монгол эмэгтэй эх орондоо ирсэн талаар ГХЯ-наас мэдээллээ.

Хэрэг өнгөрсөн зургаадугаар сарын 15-ны өдөр гарсан байдаг. Тодруулбал, Малайзын Холбооны Улсад Монгол улсын иргэн Н.Номин-Эрдэнийг машинд сууж байхад нь буудсан. Гэмт этгээдүүд Малайзын иргэн, бизнесменийг онилон буудсан боловч хажууд нь сууж байсан Монгол эмэгтэй суманд нь өртсөн тухай тус улсын цагдаагийн байгууллагаас мэдээлж байсан юм.

Улмаар, түүний биед байгаа хоёр ширхэг сумыг хагалгаа хийж авсан хэдий ч Н.Номин-Эрдэнийн биеийн байдал тааруу Малайзын эмнэлэгт эмчилгээ хийлгэж байжээ. Түүнтэй хамт машинд байсан гэх тус улсын бизнесмен “Монгол эмэгтэйтэй танилцаад удаагүй байгаа, Түүний талаар мэдэхгүй” хэмээн мэдүүлсэн аж.

Нийслэлийн Налайх дүүргийн 3 дугаар хорооны 57 дугаар уклонд үйл ажиллагаа явуулдаг иргэн Б-гийн бичил уурхайн /налуу ам/ 20 метрийн гүнд агааргүйдэж нэг иргэн ухаан алдаж унасан тухай дуудлага өчигдөр орой 19:55 цагт /20:01 цагт/ ОБЕГ-ын харъяа Уул уурхайн аврах ангид ирсэн байна.

Дуудлагын дагуу Уул уурхайн аврах ангийн албан хаагчид ажиллаж иргэн Г.Тогмид /40 настай, эрэгтэй/-г уурхайн гүнээс эсэн мэнд гаргаж эмнэлгийн байгууллагад шилжүүлэн өгчээ.

2017 оны төсвийн тухай хуульд ирэх онд орлого нэмэгдүүлэх чиглэлд хийгдэх хэд хэдэн ажлууд тусгагдсан байсан. Үүн дотор “Монгол шуудан” ТӨХК-ийг 20, “Эрдэнэт-Булганы цахилгаан түгээх сүлжээ” ТӨХК-ийг 30 тэрбум төгрөгөөр хувьчлахаар тооцон, өмч хувьчлалын орлогыг 50 тэрбум төгрөгөөр нэмэгдүүлэх асуудал тусгагдсан.

Өнөөдөр болсон УИХ-ын чуулганы үдээс өмнөх нэгдсэн хуралдаанаар ТӨХК-ийг 2016-2017 онд хувьчлах Их хурлын тогтоолын төслийг үргэлжлүүлэхтэй холбогдуулан гишүүд байр сууриа илэрхийллээ. Дээрх асуудлыг Т.Аюурсайхан гишүүн эсэргүүцэж буй юм. Гишүүдийн байр суурийг хүргэж байна.

УИХ-ын Т.Аюурсайхан: ТӨХК-ийг хувьчлахдаа ШӨХТГ-аас санал авсан байх ёстой

“Өнгөрсөн 4 жилд их хурлын даргыг сонгохоос эхлээд хууль тогтоомж маш шүүмжлэлтэй хандаж ирсэн. Энэ алдааг засах гэж байдгаараа ажиллаж байна. Үүнээс болж ард иргэдийн итгэлийг алдуулсан. УИХ-аас гарч байгаа тогтоолын төслийг хуульд нийцүүлэх шаардлагатай гэж үзэж байгаа юм. Төрийн өмчийн эд хөрөнгө хуульчлагдах төсөл авахдаа ШӨХТГ-аас санал авсан байх ёстой. Төр хэдэн хувийг нь өмчлөх үү гэх мэт энэ тогтоолын төслийг батлавал үндсэн хуульд заасан 2 заалтыг зөрчиж байна. Эргэж Үндсэн хуульд нийцүүлэх санал гаргаж байна”

УИХ-ын гишүүн Төсвийн байнгын хорооны дарга Ч.Хүрэлбаатар: Шуудангийн салбарт анхаарал хандуулж ажиллахгүй бол болохгүй

“ Төсвийн байнгын хорооноос ажлын хэсэг гаргаад ТӨХКд шалгалт хийсэн. Шалгалтаар 187 ТӨХК 11 тэрбум төгрөгийн алдагдалтай ажиллаж 5000 орон тоо нэмэгдсэн. Аж ахуй нэгжийн захирлууд нэмэгдсэн. Хувьчлахгүй энэ байдлаар явбал 94 сая төгрөгийн ашигтай байж болно. Харилцаа холбоо өнөөдөр хэчнээн ирээдүйтэй чухал болохыг тооцож ирээдүйгээ харах хэрэгтэй. Өнөөдөр дэлхий дээр 205 тэрбум имэйл бие рүүгээ явж байна. Тиймээс Шуудангийн салбарт анхаарал хандуулж ажиллахгүй бол болохгүй. Зөвхөн өнөөдөр ч анх удаагаа ТӨХК-ийг хувьчилах гээд байгаа юм биш. 34 хувь нь саяхан хэлэлцсэн асуудал. Бид энэ тал дээр бодлогод тууштай байх ёстой гэж үзэж байна. Ирэх 4 жилд ТӨХК-д анхаарал хандуулах хэрэгтэй Хувийн хэвшил рүү Төр хамраа цухуйлгаад хэрэггүй. Энд бид зарчимтай байх ёстой. Ирээдүйд орж ирж байгаа хөрөнгийг сайн харах хэрэгтэй Засгийн газар ажлаа сайн зохион байгуулах хэрэгтэй багаа юм”

УИХ-ын гишүүн Занданшатар: Эрдэнэт Булганы сүлжээг хувьчлах асуудал нь Засгийн газраар оруулж ирсэн юм уу

“Монгол шуудан бол ОУ-ын жишиг хувьчлагдах нь зүйтэй. Харин Эрдэнэт булганы сүлжээ, Эрдэнэтийн үйлдвэрийн асуудал. Эрдэнэт булганы сүлжээ 120 тэрбум төгрөгийн үндсэн хөрөнгөтэй стратегийн бодлоготой асуудал. Эрдэнэт булганы сүлжээ хамгийн ашигтай салбар юм. Хувьчлах асуудал нь Засгийн газраас оруулж ирсэн юм уу”

УИХ-ын гишүүн Төсвийн байнгын хорооны дарга Ч.Хүрэлбаатар: ТӨХК-ийг хувьчлан үндсэн гурван жил байна

“ Энэ асуудлыг хэлэлцэхдээ төрийн өмөчийн Ням-Осортой хэлэлцээд 3 асудлыг авч үзсэн. 2016-2020 онд төрийн өмчийг хувьчлах үндсэн 3 жил байна. Үргэсэн хөрөнгө оруулагч нарыг эргээд татах , Монголыг сонирхох нэг хэсэг болгох шаардлагатай байна гэж үзэж байгаа. Өмч хувьчлалаар төрийн банкаар 75 тэрбум төгрөгөөр хувьчилна гээд байдаг үнэндээ 300 тэрбум төгрөгөөр хувьчилна. Энэ дүнгээр хувьчилна гэсэн үг биш”

УИХ-ын гишүүн Оюунчимэг: ТӨХК 10.8 их наяд төгрөгийн алдагдалтай ажиллаж байна

Оюунчимэг “ Төрийн өмчит үйлдвэрийн газрын алдагдлын асуудлууд олны анхаарлыг татаж байгаа. ТӨХК 10.8 их наядын алдагдалтай ажиллаж байна. Хэмнэлт гэж ярьж байгаа тохиолдолд үр ашиг авчрах уу. Хувьчлах орон тоог эрхзүйгээр цуг зохицуулах асуудал орж ирэх үү”

УИХ-ын гишүүн Төсвийн байнгын хорооны дарга Ч.Хүрэлбаатар: Өнгөрсөн 4 жилд ТӨХК-ийн захирлууд төрд ашигтай орлого өгөөгүй

“Нямдоржийн саналаар ажлын хэсэг гаргасан. Төсвийн байнгын хорооноос хэд хэдэн дүгнэлт гаргасан. Ням-Осортой уулзсан. Даргаар очиж байгаа хүмүүс ТӨХК-иас чиглэл өгч байгаа. Шинээр очсон Төрийн өмчит компаний захирал ажлаа сайжруулж чадахгүй бол дараагийн алхам руу орох хэрэгтэй гэдгийг сайтар ярилцсан. Өнгөрсөн 4 жилд ТӨХК-ийн захирлууд төрд ашигтай орлого өгөөгүй, банкуудаас их хэмжээний зээл авсан байсан. ТУЗ-д мэргэжлийн асуудал эрхэлсэн яам, байгууллага орж ирэх нь зүйтэй гэж үзсэн. ТӨХК-ийн үр ашгийг нэмэгдүүлэх чиглэсэн үйл ажиллагааг чиглүүлэх арга хэмжээг авсан. гэсэн байр суурийг илэрхийлсэн юм.

Нийслэлийн Засаг дарга бөгөөд Улаанбаатар хотын захирагч С.Батболд “Улаанбаатар дулааны сүлжээ” ТӨХК, “Улаанбаатар цахилгаан түгээх сүлжээ” ТӨХК дээр ажиллаж, нийслэлийн өвлийн цахилгаан болон дулаан хангамжийн нөхцөл байдалтай танилцаж, зарим асуудлыг шийдвэрлэлээ.

“Улаанбаатар дулааны сүлжээ” ТӨХК-ийн Гүйцэтгэх захирал Д.Бямба-Очирын танилцуулснаар 2016 оны зуны засварын батлагдсан графикаар 15 магистраль шугамыг 5 дугаар сарын 10-наас 8 дугаар сарын 25-ны хооронд 12 хэсэгт хуваан, хуваарийн дагуу 12 зогсолт хийгдэж дууссан. Их засвар, шинэчлэлт, урсгал засварын ажлыг 100 хувь хийж гүйцэтгэсэн байна. Төвлөрсөн дулаан хангамжийн системд холбогдсон 2663 хэрэглэгчтэй ДЭХ худалдах, худалдан авах гэрээ байгуулж, тэдгээрийн 9200 гаруй барилга, обьектын халаалтыг залгаж, жигдрүүлжээ. Энэ оны 10 дугаар сарын 30-ны байдлаар 93.63 Гкал/ц-ийн ачаалалтай 147 хэрэглэгчийн барилга обьектыг шинээр холбож, ДЭХ-ээр хангасан байна. Мөн компанийн санхүүгийн үйл ажиллагаа хэвийн явагдаж байгааг дуулгалаа.

Нийслэлийн Засаг дарга бөгөөд Улаанбаатар хотын захирагч С.Батболд “Улаанбаатар хотын өвөлжилтийн бэлтгэл хангагдсан, дулаан хангамжийн ажил хэвийн явагдаж байгааг сонслоо. Нэг үеэ бодвол нийслэлийн дулаан хангамжид ахиц гарсан. Энэ нь Амгалан дулааны станц ашиглалтад орсон, дулааны станцуудын өргөтгөл шинэчлэлтийн ажил хийгдсэн, улс, нийслэлийн төсөв хөрөнгөөр дулааны шугамын шинэчлэлтийн ажлыг эрчимтэй хийсэн, барилгын компаниуд дулааны норм стандартыг хангаж ажиллаж байгаа зэрэг асуудлуудтай холбоотой гэж харж байна. Гэхдээ өнөөдөр дулаан хангамж хэвийн байгаа ч нийслэл хот өдрөөс өдөрт өргөжин, тэлж байгаа учраас миний хувьд дулааны 5-р цахилгаан станцыг барих хэрэгтэй гэсэн байр суурьтай байгаа” гэлээ. Мөн тулгамдсан асуудал юу байгааг асуусан юм.

“Улаанбаатар дулааны сүлжээ” ТӨХК-ийн Гүйцэтгэх захирал Д.Бямба-Очир “Зайсан орчмын хэрэглэгчдийн асуудлыг шийдэхээр ажиллаж байгааг хотын даргад хэллээ. Бурхан багшийн хөшөөний орчимд 1990-ээд онд ашиглалтад орсон ганц ЦТП-тэй. Тэндээс бүгд дулаанаа авдаг. Хүрэлцдэггүй хүндрэл байгаа. Үүнийг заавал шийдэх шаардлага байна” гэлээ. Үүнээс гадна Баянхошуу дэд төвийг төвлөрсөн хангамжид холбох уу, тусгай төв байгуулах уу гэсэн асуудлыг ярилцаад төвлөрсөн хангамжид холбох нь зүйтэй хэмээн шийдвэрлэлээ.

Нийслэлийн Засаг дарга үүний дараа “Улаанбаатар цахилгаан түгээх сүлжээ” ТӨХК дээр ажиллаж, үйл ажиллагаатай нь танилцлаа. Тус комданийн хувьд нийслэлийн 8 дүүрэг, Төв аймгийн 16 сумыг цахилгаан эрчим хүчээр хангадаг. 2016 оны 10 дугаар сарын байдлаар 345 мянга гаруй хэрэглэгчийг цахилгаан эрчим хүчээр ханган ажиллаж байна. Цаашид нийслэлийн усан хангамжийг сайжруулах төслөөр гүйцэтгэсэн Булаг дэд станцруу нэвтрэхэд Туул голын дээгүүр гүүр барих, Улаанбаатар хотын гэр хорооллын өсөн нэмэгдэж байгаа хэрэгцээг хангах цахилгаан хангамжийн асуудлыг нийслэлийн төсөвт сууглгах шаардлагатай байгааг хотын даргад дуулгалаа.

Хотын дарга “Улаанбаатар хотын цахилгаан дамжуулж байгаа шугамуудын насжилт их. Гэр хороололд хүчдэлийн уналт их байгаа асуудлыг хэрхэн шийдвэрлэх талаар “Улаанбаатар цахилгаан түгээх сүлжээ” ТӨХК-ийнхантай ярилцлаа” гэлээ. Мөн Улаанбаатар хотод жилд 30 мянга орчим хүн шилжиж ирдэг. Нэг өрх дунджаар 3-5 хүнтэй гэж үзвэл төдий тооны өрх шинээр нэмэгдэж байна. Ингээд хотын цахилгаан хангамжийг хэвийн байлгах, айл өрхүүдийг цахилгаанаар хэвийн хангахад хүндрэл учирдаг. Тиймээс Улаанбаатар хотын суурьшлын бүсийг шинээр тогтоох шаардлагатай гэж үзэж байгаагаа хотын дарга хэллээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

АНУ-ын Лас Вегас хотноо болж буй ”Memoriad-2016” оюуны олимпт манай улсаас 14 тамирчин өрсөлдөж буй. Тэмцээний хоёр дахь өдөр /11.09/ ”Binary digits” буюу ”Хоёртын тоолол” төрөл явагдаж, дүнгээ гаргалаа.

Энэхүү төрөлд Их Мастер Б.Шижир-Эрдэнэ 4770 цифр алдаагүй санаснаар олимпийн дээд амжилтыг шинэчилж, алтан медаль хүртлээ. Өмнө нь энэ төрөлд буюу 2012 онд Германы тамирчин, ОУ-ын Их Мастер Ёханнес Маллов 4065 цифр алдаагүй санаснаар олимпийн дээд амжилтыг тогтоож байжээ.


Мөн энэ төрөлд Азийн Мастер З.Цэцэгзул (16 нас) 4545 цифр алдаагүй санаж мөнгөн медалийн эзэн боллоо.

Ийнхүү Монголын баг тамирчид хоёр дахь өдрийн байдлаар 4 алт, 6 мөнгө, 5 хүрэл медаль буюу нийт 15 медалийн болзол хангаад байна.

Байгалийн нөөцийн засаглал ба хараал
Эрдэс баялгийн эдийн засагч Л.Наранбаатар
Дэлхийн байгалийн нөөцийн засаглалын институтын судалгаа сонирхол татав. Доорх хоёр графикт Англи, Норвег хоёр улсын 1971-2014 оны хооронд олборлосон газрын тос, байгалийн хийн хэмжээг үзүүлжээ. Олборлолт нь биет хэмжээгээр тэнцүү шахуу болов ч улсдаа авсан татвар, ноогдол ашгийн хэмжээгээрээ Норвег нь Англиас бараг 3 дахин их байна. Хараар бодоход Англи нь илүү баймаар юм шиг. Гэтэл Норвег илүү алсын хараатай, байгалийн нөөцийн засаглал хэрэгжүүлжээ. Норвегийн баялгийн сан нь дэлхийн томоохон сангуудад ордог. Байгалийн баялгаасаа олсон орлогын зохих хувийг хэрэглээндээ тааруулан зарж, бусдыг нь хуримтлуулж гадаадын улс орнуудын ашигтай төслүүдэд хөрөнгө оруулалт хийх замаар сангаа арвижуулсан дэлхийн шилдэг туршлага. Сая нүүрсний салбар хямрахад энэ сан дэлхийн улс орнуудад оруулсан хөрөнгө оруулалтуудаа бүгдийг нь татсан. Эрсдэлтэй гэж үзсэн учраас тэр. Харин алтанд бол хөрөнгөө оруулсаар байна. Гэтэл бид яав? Хүний хөгжил сан гэж байгуулаад стратегийн ордуудаасаа хишиг, хувь хүртээнэ гэж ирээдүйн татварын орлогуудаа зээлж аваад жамирчихсан. Тансаглах шиг л болсон. Одоо өртэй. Ирээдүйн өв сангийн тухай хууль гэж гаргаад хүний хөгжил санд төвлөрсөн өрийг тийш нь шилжүүлчихсэн гэж дуулсан. Өрөө төлж дуусгаад хичнээн ч жилийн дараа юм бүү мэд хуримтлал үүсэх юм байх. Баялгаасаа хувь хүртэх өч төчнөөн том ордууд, төрийн өмчит компаниуд. Бүгд алдагдалтай. Бөөн өр шир. Эрдэнэс Тавантолгойн Чалкогийн өр, Эрдэнэтийн Жастын Батхүүгийн өр, Оюутолгойн өр, Чингис, Самурай бондын өр гэх мэтээр явж өгнө. Улсаараа өрөнд орсоор 21.5 тэрбум ам долларын өртэй болжээ. Он гараад Чингис бондын эхний төлөлт болох 500 сая ам доллар төлнө. Юугаараа төлнөө!? Төгрөг нь хогийн цаас болтлоо үнэгүйдсэн. Ингээд харахаар бидэнд баялгийн хараал гэдэг нь бодитоороо нүүрлэчихэж. Асар их баялагтай ч авилгал хээл хахуульд идэгдэж баялгийн хараал хүртсэн Зимбабвед иргэд нь үндэснийхээ тэрбум доллароор талх ч авч чадахгүй болтлоо дампуурч, өлсгөлөн гуйланчлалд нэрвэгдэж буй муу жишээг бид харж байна. Дараагийн Зимбабве болохгүйн тулд байгалийн баялгийн засаглалаа сайжруулах алсын хараатай бодлого хэрэгжүүлэх шаардлага ус агаар мэт хэрэгтэй болжээ. Биднийг бие биенээ хардаж, хулгайч, луйварчин, хужаа жунгаагаараа дуудалцан цаг алдаж суух зуур бусад улс орнууд хөгжлөөрөө тасраад явчихлаа. Японд сансрын аялал жуулчлал хөгжиж дэлхийн агаар мандалаас гарч зугаалах, хүн шиг роботуудаар гэрийн зарц хийх, Америкт нар салхины эрчим хүчээр ажилладаг машин, байшинг массаар нь үйлдвэрлэх, хүний эд эрхтэнг нано технологиор ургуулах төсөл биелэлээ олж тун удахгүй энгийн хэрэглээ болох нь. Атаархах юм. Бид одоо яах вэ? Яавал дээр вэ? . Эрдэнэтийн 49%-ийг ямар ч шийдэл гаргалгаагүй ярьсаар буцаагаад Оросуудад өгөх үү? Тавантолгойн хэрүүлээ үргэлжлүүлж, 200 ам доллар хол давсан үнэтэй нүүрсээ 30 гаруйхан ам доллароор хил давуулж урсгасаар суух уу? Аль эсвэл өргөн, нарийн цариг, танк дайн ярьж төмөр замаа гацаах уу? Улс орноо алах, аврах эсэх нь эрх баригчид та нараас л хамаарна. Алдах эрхгүй. Төрийн өмчит компаниуддаа алсын хараатай зоримог шийдвэрүүд гаргаж, заримыг нь хувьчлах, заримынх нь засаглалыг сайжруулах замаар байгалийн нөөцийн баялгаа хөгжил, дэвшилд хөрвүүлэх боломжийг ашиглаасай!
Америк, Япон шиг болж чадахгүй ч байгаа баялгаа зүй зохистой ашиглаад өр ширнээсээ гарчих юмсан.

УИХ-ын чуулганы үдээс өмнөх хуралдаанаар Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, анхны хэлэлцүүлэг/-ийг хийв. Энэ үеэр 2017 оны төсвийн төслийг батлах тухай Байнгын хорооноос гаргасан санал асуулгатай холбогдуулан УИХ-ын гишүүн Эрдэнэбат

“ Долларын ханш болохоо байлаа. Валютын ханш хоногоор биш цагаа өсдөг болчихлоо. Үүнийг хариуцаж байгаа хүн байна уу. Ам.доллар 3000 төгрөгт хүрэх нь. Үүнд арга хэмжээ авч байгаа Монголбанк Засгийн газар байна уу. Энэ чинь импортын хэрэглээ огцом өсөж гадагшаа юм гарахаа байсан гэсэн үг. Долларын ханшийг хэдээр төсөвлөсөн юм бэ Хариулт өгөх хүн байна уу” гэв. Түүний асуулгад УИХ-ын гишүүн Төсвийн байнгын хорооны дарга Ч.Хүрэлбаатар хариулав. Тэрбээр

“ Вальютын ханш хөдлөлтийн үндсэн үзүүлэлт байна. Хамгийн гол нь эрэлт нийлүүлэлт. Нөөц гэж бий. Эрдэнэбатад хэлмээр байна 2.2 тэрбум ам.долларын нөөц байсан. Өнгөрсөн 4 жилийн хугацаанд үүнийг үрэн таран хийсэн. Одоо валютын нөөц гэж байхгүй. Хятадаас авсан 1.3 тэрбум ам.долларын зээлээр нөөцөө бүрдүүлж байна. Валютын сангийн нөөцийг өнгөрсөн дөрвөн жилд нийтдээ дөрвөн тэрбум ам.доллараар үрсэн. Одооо нууж байсан идээ бээр нь хагарч байна. Монголбанк валютын урсгалыг тэнцвэржүүлэхэд чадах чадхаараа арга хэмжээ авч ажиллаж байна. Энэ долларын алдааг хязгаарлаж байна. Гэхдээ бидэнд боломж бий. Үүний тулд том төслүүдээ явуулах хэрэгтэй. Нэг хүн гарч ирээд хэлээд нэмэргүй. 2017 оны төсөв чухал үүрэгтэй. 514 тэрбум төгрөгийн үнэт цаасыг зогсоож чадсан. Мөн хэмнэлтийн бодлогыг оруулж ирсэн” хэмээв.

Нийслэлд концессын гэрээгээр хэрэгжиж буй Баянгол дүүргийн 1 дүгээр хороо Алтай хотхоны хорооллын доторх авто замыг дунд голын авто замтай холбох гүүр барих ажлын гүйцэтгэгчээр ”Ди Вай Кэй Би” ХХК шалгарч, 2016 оны 4-р сард гэрээ байгуулжээ.

Барилга, байгууламжийн ажил хугацаандаа дуусч, ашиглалтад оруулах комисс 2016 оны 10 дугаар сарын 20-нд ажилласан байна. Комиссын гишүүдийн үүрэг даалгаврын биелэлтээр гүүрийг ашиглалтад оруулахаар шийдвэрлэсэн бөгөөд үүрэг даалгаврын биелэлтийг ханган ажиллаж байна гэж Нийслэлийн Автозамын хөгжлийн газраас мэдээллээ.

Монгол Улсын нэгдсэн төсвийн 2017 оны төсвийн хүрээний мэдэгдэл 2018-2019 оны төсвийн төсөөллийн тухай хуулийн төсөлийг хэлэлцэж баталлаа.



Хэлэлцэж буй асуудалтай холбогдуулж УИХ-ын гишүүн Т.Аюурсайхан ДНБ-ний тооцооллоор хийсэн аргыг олж харахгүй байна, шинжилгээний үр дүнг асуув. Түүний асуулгад УИХ-ын гишүүн, Төсвийн байнгын хорооны дарга Ч.Хүрэлбаатар хариулт өгсөн юм. Тэрбээр


”Засгийн газар энэ чиглэлийн судалгаанд анхаарч байх нь зүйтэй. Энэ удаагийн төсвийн хүрээний мэдэгдэл дээр эконометрийн судалгааны талаарх материал УИХ-ын гишүүний гар дээр ирээгүй. Тийм учраас энэ төрлийн судалгаа хийгдээгүй” гэлээ.


Үүний дараа Засгийн газраас өргөн мэдүүлсэн Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн төслүүдийн гурав дахь хэлэлцүүлгийг хийлээ. Уг асуудалтай холбогдуулан асуулт асууж үг хэлэх гишүүд байгаагүй тул дөрөв дэхь хэлэлцүүлэгт бэлтгүүлэхээр холбогдох байнгын хороонд шилжүүллээ.

Хамгийн сайхан эмэгтэй алдартай жүжигчин Одри Хепберн