Спортын төв ордны А зааланд чөлөөт бөхийн мастеруудын улсын аварга шалгаруулах тэмцээн ирэх сарын 6-7-ны өдрүүдэд болно. Чөлөөт бөхийг шимтэн үзэх дуртай хүмүүсийн хүсэн хүлээсэн тэмцээн энэ. Мастеруудын улсын аварга тамирчныг эндээс тольдохын зэрэгцээ ахмад тамирчдынхаа идэвхи хэрхэн өрнөхийг харж болно.

Энэ тэмцээнийг гавьяат тамирчин Буяндэлгэрийн Болдын нэрэмжит болгон зохион байгуулах юм байна. Б.Болд нь чөлөөт бөхийн 1979 оны залуучуудын ДАШТ-ээс мөнгө, 1983, 1985 оны насанд хүрэгчдийн ДАШТ-ээс мөнгөн медаль хүртсэн манай улсын шилдэг тамирчин. 1985 оны дэлхийн шилдэг бөхийн шагналыг өрсөлдөгчөө хамгийн богино хугацаанд ялсан амжилтаар нь түүнд олгосон нь ийм.

Гарцаагүй тэр шилдэг нь. Үүнээс гадна 1982 оны Азийн тоглолтын алт, “Найрамдал-1984” тоглолтын хүрэл медаль хүртэж, “Москва-1980” зуны олимпын наадмын сонгомол барилдааны шагналт байрт орсон, шагшигдаж явсан бөх.