**************************************************************************************************************************************************************

Жүдо бөхийн энэ оны ДАШТ Катарын нийслэл Доха хотноо гурав дахь өдрөө үргэлжилж байна. Тус тэмцээнд таван тивийн 99 орны 650 гаруй шилдэг жүдоч хүч үзэж байгаа. Манай улсаас 18 тамирчин оролцож байгаа билээ. Тэгвэл энэ удаагийн тэмцээнд хоёул аваргалж, тус бүр дөрвөн удаагийн Дэлхийн аваргууд болж, АГУА гэдгээ нотлоод буй Хифуми Абэ, Ута Абэ нарын тухай сонирхолтой баримтуудыг та бүхэн хүргэж байна. 

Ах Абэ гэж хэн бэ? 

Хифуми Абэ нь 1997 оны наймдугаар сарын 09-нд Японы Хёго мужийн Кобе хотод мэндэлжээ. Түүний биеийн өндөр 168 см. Абэ 2003 онд 6 настайдаа төрөлх Хёго мужийн Кобе хотод жүдо бөхөөр хичээллэж эхэлсэн . Тэрбээр бага сургуульд байхаасаа эхлэн тэмцээнд оролцож эхэлсэн. Түүний аав Кожи Кобе хотын Гал түймэртэй тэмцэх газрын гал сөнөөгч юм. Бага сургуульд байхдаа Нами Набекура хэмээх жүдоч түүнийг ихэвчлэн ялдаг байв. Тэрбээр "тэр байгаагүй бол би өдий зэрэгтэй явахгүй байсан" гэж хэлж байсан. Түүний нэрийг ханз үсгээр "нэг, хоёр, гурав" гэж уншдаг.

Абэ Кобе Икутагийн дунд сургуульд сурч байхдаа 55 кг-аас доош жинд анхны үндэсний хэмжээний тэмцээндээ түрүүлжээ. Дараа нь "Shinko Gakuen Shinko" ахлах сургуульд сурч байхдаа бага насныхаа карьерыг эхлүүлсэн байдаг.  Ахлах сургуулийн сурагч байхдаа ахлах сургуулийн дунд улсын аварга шалгаруулах тэмцээнд олон удаа түрүүлж байжээ.

Түүний олон улсад өөрийгөө харуулж эхэлсэн замнал ерөнхийдөө 2014 оноос эхэлсэн байдаг. Тухайн цаг үеэс эхлэн тэрбээр 2020 оны Токиогийн Олимпын наадмаас алт, багийн төрөлд мөнгө ДАШТ-ээс 2017, 2018, 2022, 2023 онуудад алт, 2019 онд хүрэл медаль хүртсэн БОСОО аварга билээ. Мөн Их дуулгаас 10 алт, нэг мөнгө, Гранпри тэмцээнээс алт, мөнгө, хүрэл медаль гэх мэтчилэн тоймгүй их амжилт үзүүлж яваа идэр залуухан аварга билээ. 

Дүү Абэ гэж хэн бэ? 

Ута Абэ нь 2000 оны долдугаар сарын 04-нд Японы Хёго мужийн Хобе хотод мэндэлсэн. Түүний биеийн өндөр 158 см. Абэ 2017 оны хоёрдугаар сард Дюссельдорфын Гранприд тэргүүн байр эзэлснээр Олон улсын жүдо бөхийн холбооны Гран Прид түрүүлсэн хамгийн залуу жүдоч болсон байдаг. 

Тэрбээр 2018 онд Азербайжаны Баку хотноо болсон жүдо бөхийн дэлхийн аварга шалгаруулах тэмцээнд оролцож , 18 настайдаа анхны дэлхийн аварга цолыг хүртэж, насанд хүрэгчдийн дэлхийн аварга болсон гурав дахь залуу жүдоч болжээ. 2021 онд өөрийн төрсөн ах Хифуми жүдо бөхийн төрөлдөө алтан медаль хүртсэн тэр өдөр мөн Абэ "Токио-2020" олимпийн наадмаас алтан медаль хүртсэн нь нэг гэр бүлийн гишүүд олимпын наадмаас алтан медаль хүртсэн цор ганц тохиолдол болж байв. Олимпын гурван удаагийн аварга Тадахиро Номура бол ах дүү Абэ нарын авга ах юм. 

Түүний замнал 2017 оноос эхлэлтэй. Энэ цаг үеэс хойш тэрбээр 2020 оны Токиогийн Олимпын наадмаас хувийн төрлөөр алт, багийн төрлөөр мөнгө, ДАШТ-ээс 2018, 2019, 2022, 2023 онуудад алтан медаль хүртээд байна. Их дуулгаас нийт долоон алт, хоёр мөнгө, Гранпри тэмцээнээс дөрвөн алт, Залуучуудын ДАШТ-ээс нэг алтан медаль хүртээд байна. 

Л.Сайнаа