Монгол бөхийн өргөөнд энэ бямба гарагт Түлш, эрчим хүчний салбарын 100 жилийн ойд зориулсан улс, аймгийн цолтой 256 бөхийн барилдаан болно. Энэ барилдаан 2023 он гарснаас хойшхи 19 дэх улс, аймгийн цолтой бөхчүүдийн барилдаан юм. 2023 оны анхны барилдаанд улсын арслан Э.Оюунболд түрүүлсэн бол улсын заан Б.Бат-Өлзий энэ жил гурван удаа түрүүлсэн амжилтаар тэргүүлж байна. Сүүлд Улсын арслан цолонд хүндэтгэл үзүүлэх барилдаан болоход Б.Бат-Өлзий заан их шөвөгт шалгарлаа. Харин отгон аварга Оргихын Хангай энэ барилдаанд албан ёсоор бүртгүүлсэн боловч барилдаагүй, улсын цолтой ердөө 24 бөх барилджээ. О.Хангай аваргыг барилдах сургаар тасалбар худалдан авсан иргэд лав хохирлоо. Түүнд хариуцлага тооцох үгүй нь тодорхойгүй үлдлээ. Наадам дөхсөнтэй холбоотой юу, нэг бол хавар болоод бөхчүүдийн тамир тэнхээ сульдсан уу юутай ч залуу аварга, арслангууд барилдах нь ховор болж. Тавдугаар сар гарсаар Р.Пүрэвдагваас өөр өндөр цолтон зодоглоогүй юм.   

2023 онд болсон улс, аймгийн цолтой бөхчүүдийн 19 барилдаанд түрүүлсэн бөхчүүд:

Шинэ үндсэн хууль батлагдсаны 31 жилийн ойд зориулсан барилдаанд улсын арслан Э.Оюунболд

"Хайрхан" нийслэлийн нэгдсэн захын нэрэмжит, Монгол улсын начин цолны хүндэтгэлийн барилдаанд улсын харцага Б.Зоригтбаатар

Архангай аймгийн Цэнхэр сумын 100 жилийн ойд зориулсан, "Эко констракшн" ХХК-ийн нэрэмжит барилдаанд улсын харцага Б.Зоригтбаатар

"Малчин" телевизийн 10 жилийн ойд зориулсан барилдаанд улсын гарьд М.Бадарч

"Жем Интернэшнл" ХК-ийн нэрэмжит, Монгол улсын харцага цолны хүндэтгэлийн барилдаанд улсын заан Б.Бат-Өлзий

Үзэсгэлэн болгогч хэмээх усан туулай жилийн сар шинийн баярт зориулсан улс, аймгийн цолтой бөхчүүдийн барилдаанд улсын заан Б.Бат-Өлзий

Төв аймаг байгуулагдсаны түүхт 100 жилийн ойд зориулсан, "Дүнжингаравын аваргуудаа алдаршуулах" барилдаанд улсын начин Д.Хүдэрбулга

Завхан аймгийн Тосонцэнгэл сумын 100 жилийн ойд зориулсан, Санжмятавын Шагж аваргын нэрэмжит барилдаанд улсын арслан  Б.Орхонбаяр

Өмнөговь аймгийн Манлай сумын харьяат, Улсын арслан Гомбо-Аюушийн Дэмүүлийн нэрэмжит барилдаанд улсын заан Б.Бат-Өлзий

Монгол цэргийн өдөр, Орчин цагийн зэвсэгт хүчин үүсэн байгуулагдсаны 102 жилийн ойд зориулсан барилдаанд улсын аварга О.Хангай

Наурызын баярт зориулсан барилдаанд улсын аварга П.Бүрэнтөгс

Ардчилсан нам байгуулагдсаны 33 жилийн ойд зориулсан барилдаанд улсын заан Б.Пүрэвсайхан

Архангай аймгийн 100 жилийн ойд зориулсан, Архангай нутгаас төрөн гарсан таван аваргад хүндэтгэл үзүүлэх барилдаан О.Мөнх-Эрдэнэ

Сүхбаатар аймгийн Мөнххаан сумын 100 жилийн ойд зориулсан барилдаанд улсын начин Э.Сумъяабат

Монгол улсад шинжлэх ухааны мал эмнэлэг, үржлийн алба байгуулагдсаны 100 жилийн ойд зориулсан барилдаанд улсын харцага Ц.Бямба-Отгон

Баянхонгор аймгийн Баян-Өндөр, Бөмбөгөр, Галуут, Хүрээмарал, Эрдэнэцогт сумдын 100 жилийн ойд зориулсан барилдаанд улсын аварга О.Хангай

Монгол Улсын Хөдөлмөрийн баатар, гавьяат тамирчин, даяар дуурсагдах, далай даян дархан аварга Дашдоржийн Цэрэнтогтохын нэрэмжит, Улсын аварга цолны хүндэтгэл барилдаанд улсын заан М.Лхагвагэрэл

"Арвайн Үндэс" компанийн нэрэмжит, Улсын арслан цолны хүндэтгэлийн барилдаанд улсын начин Д.Цэрэнтогтох нар түрүүлэв.