Өдгөө 41 настай, дэлхийн шилдэг хөл бөмбөгчдийн нэг Златан Ибрахимович хөл бөмбөгөөс зодог тайлж буйгаа албан ёсоор зарлалаа. Тэрбээр Италийн АС Милан болон Шведийн шигшээ багийн довтлогч билээ. Энэ улиралд Сери А-гийн төлөө дөрөвхөн удаа тоглож, нэг тоглолтод оролцож, хэд хэдэн бэртлийн дараа нэг гоол оруулсан бөгөөд Сери А-д гоол оруулсан хамгийн ахмад тоглогч болсон. Ийнхүү талбайдаа эргэн ирэхдээ тэр өөрийгөө "Шведийн өнгөрсөн, ирээдүй, одоо" гэж тодорхойлсон бөгөөд түүний гэрээ энэ сард дуусах байсан юм. Ням гарагт болсон улирлын сүүлчийн тоглолтын дараа "Би та нарт биш, хөлбөмбөгт баяртай гэж хэлж байна. Хөлбөмбөгт баяртай гэх цаг болсон" хэмээн нулимс дуслуулан хэлж хөл бөмбөгийн спортоос албан ёсоор зодог тайллаа.
Түүнчлэн "Одоо миний сэтгэл маш их хөдөлж байна. Форза Милан, баяртай. Энд ирэхэд чи надад аз жаргал, хоёр дахь удаагаа хайр бэлэглэсэн. Чи намайг хоёр гараараа угтан авч, гэртээ байгаа мэт сэтгэгдэл төрүүлсэн тул би насан туршдаа Миланиста байх болно. Би бүх амьдралынхаа туршид хөл бөмбөгтэй холбогдсон. Хөлбөмбөг намайг эр хүн болгож, хэзээ ч танихгүй байсан хүмүүстэй танилцах боломжийг надад олгосон. Би хөлбөмбөгийн ачаар дэлхийг тойрон аялсан. Энэ бол маш урт карьер байсан. Надад үргэлжилсэн их хүч чадал, адреналин, сэтгэл хөдлөлийг өгсөн бүх хүнд баярлалаа" гэжээ.
Златан Ибрахимович (Zlatan Ibrahimović) 1981 оны аравдугаар сарын 3-нд Шведийн Мальмё хотод төрсөн. Ибракадабра хочтой тэрбээр 122 тоглолтод 62 гоол оруулснаар Шведийн бүх цаг үеийн мэргэн буучаар зодог тайлж байна. Ибрахимович 2020 оны эхээр Миланд хоёр дахь гараагаа эхэлсэн тул ийнхүү насан туршид Миланист байхаа зарлаж буй.
Түүний хөл бөмбөгийн замналаас дурдвал, Ибрахимович хөлбөмбөгийн гараагаа 1990-ээд оны сүүлд төрөлх орныхоо Мальмё багаас эхэлж байжээ. Улмаар Голландын Аякс багт 2002, 2004 оны лигийн аваргаар тодорч, шигшээ багтаа дуудагдаж байв. Италийн Ювентус баг 16 сая еврогоор нуруулаг, хурдтай, ур чадвартай довтлогчийг эгнээндээ элсүүлж Франц довтлогч Давид Трезегетэй хоршуулан тоглуулж хоёр улирал дараалан лигийн түрүүг авч байжээ.
2006 онд хүчирхэгдэхээ байсан Ювентусийн гол өрсөлдөгч Интер Милан баг Ибрахимовичийн төлөө дөрвөн жилийн гэрээнд 24.8 сая евро төлөн элсүүлж, Ибрахимович тоглосон лиг болгоныхоо "Оны шилдэг тоглогч"-оор шалгарч 2007, 2009 оны УЕФА-гийн бэлгэдлийн багт нэрлэгдэж байсан. 2009 оны зун Испанийн Барселона багт ирж төдийлөн гараанд гараагүйтэй холбоотойгоор Милан багт зээлээр тоглосон юм. Милан 2011 онд Ибрахимовичийг Барселона багаас 24 сая еврогийн гэрээгээр элсүүлж мөн л лигийн түрүүг авч чадсан юм. Дараа нь түүний шийдвэрээр Пари Сен-Жермен баг 2012 оны долдугаар сард гурван жилийн турш өөрийн эгнээндээ тоглуулах боломжтой болсон юм. Златан Ибрахимовичийн элсэж явсан баг бүр түүнийг байх улирал бүрд түрүүлж байсан содон түүхийн эзэн билээ. Мөн Ибрахимович 2001 оноос хойших бүх ДАШТ болон ЕАШТ-д оролцож байсан ч шигшээ баг нь амжилт тааруухан оролцдог байв.
Златан Ибрахимович Голландын Аякс, Италийн Ювентус, Интер Милан, Испанийн Барселона, Английн Манчестер Юнайтед, АНУ-ын Лос Анжелес Галакси, Францын Пари Сен-Жермен багт тус тус тоглож, нийт 988 тоглолтод 573 гоол оруулж, 32 цом авчээ.
Түүний хувийн амжилтаас онцолбол,
- Италийн Сери А лигийн мэргэн бууч
- Францын лигийн мэргэн бууч
- Шведийн оны шилдэг хөлбөмбөгчин
- Италийн оны шилдэг хөлбөмбөгчин
- Францын оны шилдэг хөлбөмбөгчин
- Аваргуудын лигийн тэмцээний оновчтой дамжуулалтаар тэргүүлэгч
- Евро 2012 тэмцээний бэлгэдлийн багийн гишүүн
- Алтан шаахай шагналын эзэн
- Пушкашийн нэрэмжит шагналын эзэн (Оны гоёмсог гоол) зэрэг шагналуудын эзэн юм.
Мөн 2016 оны хоёрдугаар сарын тоглолтод Аваргуудын лигийн хасагдах шатны шигшээ наймын тэмцээнд талбайн эзэн “Пари Сен Жермен”-ийнхан Английн аварга “Челси”-г хүлээн авч, 2:1-ээр ялалт байгуулсан юм. Тоглолтын эхний гоолыг 39 дэх минутад Златан Ибрахимович хаалттай цохилтоос оруулж 10 жил дараалан аваргуудын лигт гоол оруулсан анхны хөлбөмбөгч болж түүхэнд бичигдсэн билээ. Златан Ибрахимович бол энэ цаг үеийн хамгийн ур чадвар сайтай довтлон тоглогчдын нэг, дэлхийн хамгийн үнэтэй гурван хөл бөмбөгчийн нэгд зүй ёсоор тооцогддог.
Инстаграмдаа 59.9 сая дагагчтай хөл бөмбөгийн од Ибрахимовичийн 16 настай хүү Максимилиан Ибрахимович нь мөн хөл бөмбөгөөр хичээллэдэг бөгөөд Миланы 18 хүртэлх насны шигшээ багт тоглодог аж.
Р.Батхишиг
